କରାଚୀ,୨୪।୭(ପି.ଟି.)- ପାକିସ୍ତାନ କ୍ରିକେଟ ବୋର୍ଡ (ପିସିବି) ଅଧ୍ୟକ୍ଷ ଏହସାନ ମାନିଙ୍କୁ ଆଉ ଏକ ଗୁରୁଦାୟିତ୍ୱ ମିଳିଛି। ସେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି)ର ବେଶ୍ ଗୁରୁତ୍ୱପୂର୍ଣ୍ଣ ତଥା ପ୍ରଭାବୀ ଫାଇନାନ୍ସ ଓ କମର୍ସିଆଲ ଆଫେୟାର୍ସ (ଏଫ୍ ଆଣ୍ଡ ସିଏ) କମିଟି ଅଧ୍ୟକ୍ଷ ଭାବେ ନିଯୁକ୍ତି ପାଇଛନ୍ତି। ଗତ ସପ୍ତାହରେ ଅନୁଷ୍ଠିତ ହୋଇଥିବା ବାର୍ଷିକ ଅଧିବେଷଣ ଅବସରରେ ତାଙ୍କୁ ନିଯୁକ୍ତି ଦିଆଯାଇଛି। ସେହିପରି ପିସିବିର ଆଉ ଜଣେ ବରିଷ୍ଠ ଅଧିକାରୀ ତଥା ସଲମାନ ନାସିରଙ୍କୁ ଆଇସିସି ସେଫ୍ଗାର୍ଡିଂ ପ୍ୟାନେଲ୍ରେ ସାମିଲ କରାଯାଇଛି। ନାସିର ପିସିବିର ଜେନେରାଲ କନ୍ସେଲ ଓ ବାରିଷ୍ଟର ହିସାବରେ କାର୍ଯ୍ୟ କରୁଛନ୍ତି। ଆଇସିସି ଅଧ୍ୟକ୍ଷ ଶଶାଙ୍କ ମନୋହର ଏହି ଦୁଇଜଣଙ୍କୁ ନିଯୁକ୍ତି ଦେଇଛନ୍ତି ବୋଲି ପିସିବି ତରଫରୁ କୁହାଯାଇଛି।
ଏହି କମିଟିରେ ସାମିଲ ହୋଇଥିବା ଅନ୍ୟ ଅଧିକାରୀମାନେ ହେଲେ ଇନ୍ଦ୍ର ନୟି, ବିସିସିଆଇ ଆକ୍ଟିଂ ସେକ୍ରେଟାରୀ ଅମିତାଭ ଚୌଧୁରୀ, କ୍ରିକେଟ ସାଉଥ୍ ଆଫ୍ରିକା (ସିଏସ୍ଏ) ଅଧ୍ୟକ୍ଷ କ୍ରିସ୍ ଖ୍ବାଜା, କ୍ରିକେଟ ଅଷ୍ଟ୍ରେଲିଆ (ସିଏ) ଅଧ୍ୟକ୍ଷ ଏର୍ଲ ଏଡିଙ୍ଗ୍ସ ଓ ଇଂଲଣ୍ଡ କ୍ରିକେଟ ବୋର୍ଡ (ଇସିବି) ଅଧ୍ୟକ୍ଷ କଲିନ ଗ୍ରେଭ୍ସ। ଶଶାଙ୍କ ଓ ଆଇସିସି ମୁଖ୍ୟ କାର୍ଯ୍ୟନିର୍ବାହୀ ମନୁ ସାହନି ଏକ୍ସ- ଅଫିସୋ ସଦସ୍ୟ ଭାବେ ଏଫ୍ ଆଣ୍ଡ ସିଏରେ ସକ୍ରିୟ ରହିବେ।
୭୪ ବର୍ଷୀୟ ମାନି ପେସାରେ ଜଣେ ଚାର୍ଟାଡ ଆକାଉଣ୍ଟାଣ୍ଟ। ସେ ପୂର୍ବରୁ ୧୯୯୬ରେ ଆଇସିସିର ପ୍ରଥମ ଏଫ୍ ଆଣ୍ଡ ସିଏ ଅଧ୍ୟକ୍ଷ ଭାବେ ନିଯୁକ୍ତି ପାଇଥିଲେ ଓ ୨୦୦୨ ପର୍ଯ୍ୟନ୍ତ ଏହି ପଦରେ ରହି କାର୍ଯ୍ୟ କରିଥିଲେ। ଏହାପରେ ସେ ଆଇସିସିର ଅଧ୍ୟକ୍ଷ ଭାବେ ୨୦୦୬ ପର୍ଯ୍ୟନ୍ତ କାର୍ଯ୍ୟ କରିଥିଲେ। ନୂଆ ଦାୟିତ୍ୱ ଦେଇଥିବାରୁ ମାନି ଶଶାଙ୍କଙ୍କୁ କୃତଜ୍ଞତା ଜଣାଇଛନ୍ତି। ସେ ମଧ୍ୟ ଆଇସିସି ଅଡିଟ କମିଟିରେ ସାମିଲ ହୋଇଛନ୍ତି। ଏହ କିମିଟିର ଅଧ୍ୟକ୍ଷ ରହିଛନ୍ତି ଭାରତର ଯୁବରାଜ ନାରାୟଣ।