ଲଣ୍ଡନ: ଯଦି କୁହାଯାଏ, ଅଫିସ୍ରେ ଚେୟାରଗୁଡ଼ିକ ସ୍ବୟଂଚାଳିତ ଅର୍ଥାତ୍ ଆପଣାଛାଏଁ ଚାଲୁଛି ତେବେ ନିଶ୍ଚିତ ଅବିଶ୍ୱସନୀୟ ଲାଗିବ। ମାତ୍ର ଏହା ସତ। ଏହା କୌଣସି ଯାଦୁଗର ଶୋ’ କିମ୍ବା ଟେକ୍ନିକାଲ ପଦ୍ଧତି ନୁହେଁ। ଇଂଲଣ୍ଡର ମଞ୍ଚେଷ୍ଟରର ଏକ ଅଫିସ୍ରେ ଏପରି ଅଜବ ଘଟଣା ଦେଖିବାକୁ ମିଳିଛି। ଏହି ଅଫିସ୍ର ସିସିଟିଭି ଯାଞ୍ଚ କରିବାରୁ ରାତିରେ ଯେଉଁ ଅଦ୍ଭୁତ ଦୃଶ୍ୟ ଦେଖିବାକୁ ମିଳିଥିଲା ତାହା ଲୋମ ଟାଙ୍କୁରାଇ ଦେବ। ଏହି ଅଫିସରେ ରାତିରେ ଚେୟାରଗୁଡ଼ିକ ଆପେ ଆପେ ଚାଲିବା ସହ ଉଡ଼ିକି ତଳେ ପଡ଼ି ଭାଙ୍ଗିଯାଇଥାଏ। ଲୋକେ ଏହି ଦୃଶ୍ୟକୁ ଭୌତିକ କାଣ୍ଡ ବୋଲି କହୁଛନ୍ତି। ଏହି ବିଲ୍ଡିଂର ନାମ କାସଲ୍ଫିଲ୍ଡ ହାଉସ୍। ଯାହା ମଞ୍ଚେଷ୍ଟର ସହରର ଲିଭରପୁଡ୍ ରୋଡ୍ରେ ଅବସ୍ଥିତ।
ଲୋକେ କୁହନ୍ତି, ଏହି ଅଫିସରେ ଅଜବ ଘଟଣା ସବୁ ଘଟିଥାଏ। କିଛି କର୍ମଚାରୀଙ୍କୁ ଲାଗେ ଯେମିତି କେହି ତାଙ୍କ ପିଛା କରୁଛି। ବେଳେବେଳେ କେହି ଧକ୍କା ମାରିବା ପରି ଅନୁଭବ ହୋଇଥାଏ। ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଉକ୍ତ ଅଫିସର ଜଣେ କର୍ମଚାରୀ କହିଛନ୍ତି, ୨୦ ବର୍ଷ ଚାକିରି କାଳ ମଧ୍ୟରେ କେବେ ଏମିତି ଘଟଣା ସେ ଦେଖି ନାହାନ୍ତି। ଏହାର ମିଥ୍ୟା ଭିଡିଓ କେହି ପ୍ରସ୍ତୁତ କରି ସୋସିଆଲ ମିଡିଆରେ ଶେୟାର କରିଥାଇପାରେ।
