ରାଜସ୍ଥାନର ଯୋଧପୁର ପାଖରେ ପାଲୀ ଜିଲାରେ ଓମ୍ ବନ୍ନା ମନ୍ଦିର ଅବସ୍ଥିତ। ପାଲି-ଯୋଧପୁର ହାଇୱେରୁ ଯିବା ସମୟରେ ଏହି ତୀର୍ଥ ସ୍ଥାନ ଚୋଟିଲା ଗ୍ରାମ ପାଖରେ ପଡ଼େ। ସେଠାରେ ଏକ ମୋଟର ସାଇକେଲ ୩୫୦ ସିସି ରୟାଲ ଏନ୍ଫିଲ୍ଡ଼ ବୁଲେଟ ଅଛି। ଏହି ମନ୍ଦିରକୁ ତିଆରି କରିବାର ଯୋଜନା ହାୱାଡ଼ାର ବାସିନ୍ଦା ଅନୁତୋଷ ବାନାର୍ଜୀ କରିଥିଲେ। ହଜାର ହଜାର ଲୋକ ନିଜର ସୁରକ୍ଷିତ ଯାତ୍ରାର ପ୍ରାର୍ଥନା କରିବାକୁ ଏଠାକୁ ଆସନ୍ତି। ୨ ଡ଼ିସେମ୍ବର ୧୯୮୮ରେ ଓମ୍ ବନ୍ନା (ଯାହାଙ୍କୁ ଲୋକମାନେ ଓମ୍ ସିଂହ ରାଠୋର ନାମରେ ଜାଣନ୍ତି) ପାଲିର ପାର୍ଶ୍ୱବର୍ତ୍ତୀ ସହର ବାଙ୍ଗଡ଼ିରୁ ଚୋଟିଲା ଯାତ୍ରା କରୁଥିଲେ। ସେ ସମୟରେ ସେ ମୋଟର ସାଇକେଲରୁ ନିଜର ନିୟନ୍ତ୍ରଣ ହରାଇ ଦେଲେ ଓ ଗୋଟେ ଗଛରେ ବାଡ଼େଇଦେଲେ। ଏହି ଦୁର୍ଘଟଣାରେ ଓମ୍ ବନ୍ନାଙ୍କର ମୃତ୍ୟୁ ହୋଇଯାଇଥିଲା ଓ ମୋଟର ସାଇକେଲ ପାହାଡ଼ ତଳକୁ ପଡ଼ିଯାଇଥିଲା। ତା’ପର ଦିନ ପୋଲିସ୍ ସେ ମୋଟର ସାଇକେଲକୁ ଜବତ କରି ପୋଲିସ୍ ଷ୍ଟେସନ୍କୁ ନେଇଯାଇଥିଲା। କିନ୍ତୁ ତା ପର ଦିନ ଷ୍ଟେସନ୍ରୁ ଅନ୍ତର୍ଦ୍ଧାନ ହୋଇ ପୁଣି ପୂର୍ବସ୍ଥାନରେ ମିଳିଲା। ଏହି ପରି ଅନେକଥର ହେବା ପରେ ସ୍ଥାନୀୟ ଲୋକମାନେ ଏହାକୁ ଚମତ୍କାର ବୋଲି ମାନିନେଲେ। ସେମାନେ ସେ ବୁଲେଟ୍କୁ ପୂଜା କରିବା ଆରମ୍ଭ କରିଦେଲେ। ଏହି ଚମତ୍କାରିତା ସମ୍ପର୍କରେ ଆଖପାଖ ଲୋକମାନେ ଜାଣିବା ପରେ ସେଠାରେ ପୂଜାର୍ଚ୍ଚନା କରିବାକୁ ଲାଗିଲେ। ମନ୍ଦିର ମଧ୍ୟ କରାଗଲା ଓ ଏହି ମନ୍ଦିରରେ ପ୍ରାର୍ଥନା କଲେ ଯାତ୍ରା ସୁରକ୍ଷିତ ହୁଏ ବୋଲି ସାଧାରଣ ଲୋକଙ୍କର ଧାରଣା।