ବେଜିଂ: ଈଶ୍ୱର ଶୁଣିବା ପାଇଁ ଦୁଇଟି କାନ ଦେଇଛନ୍ତି। ଏହାଦ୍ୱାରା ସମସ୍ତଙ୍କ କଥା ଶୁଣି ହେବ। ମାତ୍ର ଜଣେ ମହିଳାଙ୍କ କାନରେ ଏପରି ରୋଗ ହୋଇଛି ଯାହାଙ୍କୁ ପୁରୁଷଙ୍କ କଥା ଶୁଭେ ନାହିଁ। ବିଶ୍ୱାସ ହେଉ ନ ଥିଲେ ବି ସତ। ଏମିତି ଏକ ଘଟଣା ଦେଖିବାକୁ ମିଳିଛି ଚାଇନାରେ। ଏଠାକାର ଜଣେ ମହିଳାଙ୍କୁ ଏହି ଅଜବ ରୋଗ ହୋଇଛି। ତାଙ୍କ କାନକୁ ପୁରୁଷଙ୍କ କଥା ଶୁଭୁନାହିଁ।
ଏକ ରିପୋର୍ଟ ଅନୁସାରେ, ଚାଇନାର ଚେନ୍ ନାମକ ଜଣେ ମହିଳାଙ୍କ କାନକୁ କେବଳ ମହିଳାଙ୍କ କଥା ଶୁଭୁଛି। ପୁରୁଷଙ୍କ କଥା ଆଦୌ ଶୁଭୁନାହିଁ। ଦିନେ ତାଙ୍କ ବୟଫ୍ରେଣ୍ଡ ତାଙ୍କୁ କିଛି କହୁଥିବା ବେଳେ ତାଙ୍କୁ କିଛି ଶୁଭି ନ ଥିଲା। ଡାକ୍ତରଖାନା ଯାଇ ଦେଖାଇବାରୁ ଏପରି ରୋଗର ଅଜବ ଲକ୍ଷଣ ସବୁ ଜଣାପଡ଼ିଥିଲା।
ଏହି ରୋଗର ନାମ ‘ରିଭର୍ସ ସ୍ଲୋପ୍ ହିୟରିଂ ଲସ୍’। ଏହାର ଲକ୍ଷଣ ହେଲା କେବଳ ଉଚ୍ଚ ସ୍ବରରେ କହୁଥିବା ଶବ୍ଦ ଶୁଭିବ। ଡାକ୍ତର କୁହନ୍ତି, ପୁରୁଷଙ୍କ ତୁଳନାରେ ମହିଳାଙ୍କ ସ୍ବର ଉଚ୍ଚ ହୋଇଥିବାରୁ ଚେନ୍ଙ୍କୁ କେବଳ ମହିଳାଙ୍କ ଶବ୍ଦ ଶୁଭେ। ଆଉ ଏକ କଥା ମଧ୍ୟ ଜଣାପଡ଼ିଥିଲା ତାଙ୍କୁ ଚିକିତ୍ସା କରୁଥିବା ପୁରୁଷ ଡାକ୍ତରଙ୍କ କଥା ତାଙ୍କୁ କିଛି ଶୁଭୁ ନ ଥିଲା। କେବଳ ମହିଳା ଡାକ୍ତରଙ୍କ କଥା ସେ ଶୁଣିପାରୁଥିଲେ। ସବୁ ମହିଳାଙ୍କର ଯେ ଉଚ୍ଚ ସ୍ବର ସେ କଥା ମଧ୍ୟ ନୁହେଁ। ଯେଉଁ ମହିଳାଙ୍କ ସ୍ବର କ୍ଷୀଣ ସେମାନଙ୍କ କଥାକୁ ମଧ୍ୟ ଏହି ରୋଗ ହେଲେ କେହି ଶୁଣିପାରିବେ ନାହିଁ। ଡାକ୍ତରଙ୍କ ମତରେ ଏହାର ଉପଚାର ହେଲା ଶ୍ରବଣ ଯନ୍ତ୍ର କାନରେ ଲଗାଇବାକୁ ପଡ଼ିବ।