ଭୁବନେଶ୍ୱର,୩-୮(ବ୍ୟୁରୋ): ପର୍ଯ୍ୟଟନ ବିକାଶକୁ ଧ୍ୟାନରେ ରଖି ପ୍ରମୁଖ ବିମାନ ସେବା ପ୍ରଦାନକାରୀ କମ୍ପାନୀ ଏୟାର ଏସିଆ ପକ୍ଷରୁ ସ୍ଥାନୀୟ ଏସ୍ପ୍ଲାନେଡ ଓ୍ବାନ ମଲ୍ଠାରେ ‘ଟ୍ରାଭେଲ ଫେୟାର’ ଶୁକ୍ରବାରଠାରୁ ଆରମ୍ଭ ହୋଇଛି। ଏହା ତିନିଦିନ ବ୍ୟାପି ଚାଲିବାକୁ ଥିବା ବେଳେ ଦେଶ ତଥା ଅନ୍ତର୍ଜାତୀୟ ଉଡାଣ ଲାଗି ବୁକିଂ ଉପରେ ସିଧାସଳଖ ୨୦% ରିହାତି ଉପଲବ୍ଧ ହେଉଛି। ବୁକିଂ ବେଳେ ଭୁବନେଶ୍ୱରର ଗ୍ରାହକମାନେ ବାଲି ଏବଂ ବ୍ୟାଙ୍କକ ଭଳି ପର୍ଯ୍ୟଟନ ସ୍ଥାନଗୁଡିକୁ ଅଧିକ ପସନ୍ଦ କରୁଥିବା କମ୍ପାନି ସେଲ୍ସ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି।
ସେ କହିଛନ୍ତି, ଅଫରର ଲାଭ ନେବାକୁ ଲୋକଙ୍କୁ ଫେୟାର ପରିଦର୍ଶନ ନେଇ ଆମନ୍ତ୍ରଣ କରାଯାଉଛି। ଆକର୍ଷଣୀୟ ଡିଲ ସହ ବିଭିନ୍ନ ସୁବିଧା ସୁଯୋଗ ଗ୍ରାହକଙ୍କ ଲାଗି ରହିଛି। ଗତ ବର୍ଷ ଏଭଳି ଫେୟାର ଉକ୍ତ ମଲ୍ରେ ଆୟୋଜନ କରିଥିଲୁ। ଏହା ଭଲ ରେସପନ୍ସ ପାଇଥିଲା। ବୁକିଂ ଉପରେ ଆକର୍ଷଣୀୟ ରିହାତି ଥିବାରୁ ଲୋକମାନେ ଏଠାକୁ ଆସି ବୁଝୁଛନ୍ତି। ଗ୍ରାହକଙ୍କୁ ସବୁ ପ୍ରସଙ୍ଗରେ ଜଣାଇବା ଲାଗି ସ୍ବତନ୍ତ୍ର ଟିମ୍ ଏଠାରେ ରହିଛି। ଡିଲ୍ ନେଇ ଲୋକଙ୍କର ବିଭିନ୍ନ ପ୍ରଶ୍ନର ଉତ୍ତର ରଖୁଛୁ। ପ୍ରଥମ ଦିନରେ ବୁକିଂ ଭଲ ରହିଛି। ବୁକିଂ ଉପରେ କୌଣସି ପ୍ରୋସେସିଂ ଫି ରଖାଯାଇ ନାହିଁ। ଗତ ବର୍ଷ ଭଳି ଚଳିତ ବର୍ଷ ମଧ୍ୟ ଭଲ ବୁକିଂ ମିଳିବା ନେଇ ଆଶାବାଦୀ ଥିବା ସେ ପ୍ରକାଶ କରିଛନ୍ତି।
ସେ ଆହୁରୀ ମଧ୍ୟ କହିଛନ୍ତି, ଏହାବାଦ ଅନ୍ୟ ପ୍ରମୁଖ ପର୍ଯ୍ୟଟନ ଡେଷ୍ଟିନେଶନଗୁଡିକ ମଧ୍ୟରେ କାମ୍ବୋଡିଆ, ଫିଲିପାଇନ୍ସ, ଅଷ୍ଟ୍ରେଲିଆ ଏବଂ ଇଣ୍ଡୋନେସିଆ ଭଳି ସ୍ଥାନ ରହିଛି। କେବଳ ଓଡ଼ିଶା ନୁହେଁ ସାରା ଦେଶରେ ବାଲି ଏବଂ ବ୍ୟାଙ୍କକ ଭଳି ସ୍ଥାନଗୁଡିକ ଲାଗି ଗ୍ରାହକଙ୍କ ଅଧିକ ବୁକିଂ ଲାଭ କରୁଥିବା ସେ ସ୍ପଷ୍ଟ କରିଛନ୍ତି। ଏୟାର ଏସିଆ ଇଣ୍ଡିଆ ୨୨ ବିମାନ ସହଳ ସେବା ଯୋଗାଉଥିବା ବେଳେ ଏୟାର ଏସିଆ ଗ୍ରୁପ ୩୦୦ରୁ ଅଧିକ ବିମାନ ସହ ସେବା ପ୍ରଦାନ କରୁଛି। ଅନ୍ୟ ବିମାନ କମ୍ପାନୀ ତୁଳନାରେ ଭଡା କମ୍ ରଖିଛୁ। ଇଭ୍ରି ଓ୍ବାନ କ୍ୟାନ ଫ୍ଲାଏ ( ସମନ୍ତେ ଉଡନ୍ତୁ) ନୀତି ଉପରେ କାର୍ଯ୍ୟ କରୁଛୁ। ଯାହାକୁ ନେଇ ଲୋକଙ୍କର ଭଲ ରେସପନ୍ସ ପାଉଛୁ।
