ବଇଣ୍ଡା, ୨୫ା୫(ଡି.ଏନ.ଏ.)- ବିଜୟ ବାସ୍ନା ପାଉ ପାଉ ଅନେକ ପ୍ରାର୍ଥୀ ଉତ୍ସବ ଆୟୋଜନରେ ଲାଗିପଡ଼ନ୍ତି। ଫୁଲ, ତେଲ, ବାଜା, ବାଣ ଆଦି ପାଇଁ ଆଗୁଆ ବରାଦ ଦେଇଦିଅନ୍ତି। ଆଉ ବିଜୟୀ ଘୋଷିତ ହେବାମାତ୍ରେ ସେଲିବ୍ରେସନ ଆରମ୍ଭ ହୋଇଯାଏ ଶୋଭାଯାତ୍ରାରୁ। ହେଲେ ଏକ ଐତିହାସିକ ବିଜୟ ପାଇଥିଲେ ବି ଆଠମଲ୍ଲିକରୁ ନବ ନିର୍ବାଚିତ ବିଜେଡି ବିଧାୟକ ରମେଶ ଚନ୍ଦ୍ର ସାଏ ଉତ୍ସବ ପାଳନ ବଦଳରେ ମନଉଣା କରିଥିବା ଏବେ ଚାରିଆଡ଼େ ଚର୍ଚ୍ଚା। କାରଣ ବି ନିଆରା। ତାଙ୍କ ରାଜନୈତିକ ଜୀବନ ଓ ବିଜୟରେ ପ୍ରମୁଖ ଭୂମିକା ନେଇଥିବା ସମ୍ବଲପୁର ଲୋକ ସଭା ପ୍ରାର୍ଥୀ ତଥା ପୂର୍ବତନ ପୂର୍ତ୍ତ ସଚିବ ନଳିନୀ ପ୍ରଧାନ ନିର୍ବାଚନରେ ପରାଜିତ ହୋଇଥିବାରୁ ସାଏ ଉତ୍ସବ ପାଳନରୁ ବିରତ ରହିଥିବା କର୍ମୀଙ୍କ ମହଲରେ ଜୋରଦାର ଆଲୋଚନା ହେଉଛି।
ସମ୍ବଲପୁର ଲୋକ ସଭା କ୍ଷେତ୍ର ଅଧୀନରେ ଆସୁଛି ଅନୁଗୋଳ ଜିଲାର ଆଠମଲ୍ଲିକ ବିଧାନସଭା ନିର୍ବାଚନମଣ୍ଡଳୀ। ପୂର୍ବରୁ ଏଠାରେ ବିଧାୟକ ଥିବା ବିଜେଡିର ଟାଣୁଆ ନେତା ତଥା ପୂର୍ବତନ ମନ୍ତ୍ରୀ ସଞ୍ଜୀବ ସାହୁଙ୍କୁ ଦଳ ଏଥର ଟିକେଟ୍ ଦେଇ ନ ଥିଲା। ତାଙ୍କ ବଦଳରେ କଟକ ମହାନଗର ନିଗମ କମିଶନର ଦାୟିତ୍ୱରେ ଥିବା ରମେଶ ଚନ୍ଦ୍ର ସାଏଙ୍କୁ ବିଜେଡି ଆଠମଲ୍ଲିକରୁ ପ୍ରାର୍ଥୀ କରିଥିଲା। ତେବେ ସରକାରୀ ଉଚ୍ଚ ପଦବୀ ଛାଡ଼ିବାଠାରୁ ଆରମ୍ଭ କରି ବିଧାୟକ ନିର୍ବାଚିତ ହେବା ଯାଏ ତାଙ୍କ ରାଜନୈତିକ ଯାତ୍ରା ପଛରେ ନଳିନୀଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା। ଏପରି କି ଦଳର ରାଜ୍ୟ ସଭାପତି ଏକାଦିନେ ଉଭୟଙ୍କ ପ୍ରାର୍ଥତ୍ତ୍ୱ ସମ୍ପର୍କରେ ଘୋଷଣା ବି କରିଥିଲେ। ସେବେଠାରୁ ଦୁହେଁ ଏକାଠି ନିର୍ବାଚନ ପ୍ରଚାର କରୁଥିଲେ। ଆଠମଲ୍ଲିକ ଅଞ୍ଚଳରେ ନଳିନୀ ନିଜ ପାଇଁ ଭୋଟ ମାଗିବା ସହ ସାଏଙ୍କ ନିମନ୍ତେ ମଧ୍ୟ ଭୋଟରଙ୍କୁ ଅନୁରୋଧ କରୁଥିଲେ। ହେଲେ ଗୁରୁବାର ପ୍ରକାଶିତ ଫଳାଫଳ ସାଏଙ୍କ ସପକ୍ଷରେ ଯାଇଛି। ସେ ୪୭,୧୩୫ ଖଣ୍ଡ ଭୋଟରେ ଭାଜପାର ଭାଗୀରଥି ପ୍ରଧାନଙ୍କୁ ପରାସ୍ତ କରିଛନ୍ତି। ଆଠମଲ୍ଲିକ ନିର୍ବାଚନ ଇତିହାସରେ ଏତେ ବଡ଼ ବ୍ୟବଧାନରେ କେବେ ବି କୌଣସି ପ୍ରାର୍ଥୀ ବିଜୟୀ ହୋଇ ନ ଥିଲେ। ହେଲେ ସାଏ ଏପରି ଏକ ଐତିହାସିକ ବିଜୟ ପାଇ ଆଠମଲ୍ଲିକ ଇତିହାସରେ ନୂତନ ଫର୍ଦ୍ଦ ଯୋଡିଛନ୍ତି। ଶୁକ୍ରବାର ଆଠମଲ୍ଲିକ ଉପଜିଲାପାଳ ତଥା ରିଟର୍ନିଂ ଅଫିସର ସୁବାସ ଚନ୍ଦ୍ର ରାୟଙ୍କଠାରୁ ସାଏ ପ୍ରମାଣପତ୍ର ଗ୍ରହଣ କରିସାରିଛନ୍ତି। ସ୍ତ୍ରୀ ଲିନା ସାଏ ଓ ଆଠମଲ୍ଲିକ ବିଜେଡି ବ୍ଲକ ସଭାପତି ମହେଶ୍ୱର ଦେହୁରୀଙ୍କ ଉପସ୍ଥିତିରେ ସାଏ ପ୍ରମାଣପତ୍ର ନେଇ ବିନା ଆଡମ୍ବରରେ ଫେରି ଯାଇଥିଲେ। ନଳିନୀଙ୍କ ପରାଜୟର ଗ୍ଲାନି ସାଏଙ୍କୁ ଘରିଥିବାରୁ ବିଜୟ ଉତ୍ସବ ପାଳନ ନ କରିବା ପାଇଁ କର୍ମୀମାନଙ୍କୁ ପରାମର୍ଶ ଦିଆଯାଇଥିବା ବିଶେଷ ସୂତ୍ରରୁ ଜଣାପଡିଛି।