ଓଡ଼ଗାଁ,୩।୧(ସ୍ବ.ପ୍ର.): ନୟାଗଡ଼ ଜିଲା ଓଡ଼ଗାଁ ବ୍ଲକ ଅଫିସ ସାମ୍ନାରେ ଥିବା ଓଏସ୍ଆର୍ଟିସି ଗ୍ୟାରେଜ ନବ ନିର୍ମିତ ଅଫିସ କୋଠରି ଭିତରେ ଶତାଧିକ ଗହମ ବସ୍ତା ଥିବା ଦେଖିବାକୁ ମିଳିଛି। ବେଆଇନ ଭାବେ ଗହମ ମହଜୁଦ ଥିବା ଜାଣିି ପରିଷଦ ସଦସ୍ୟମାନେ ଏହା ଉପରେ ନଜର ରଖିଥିଲେ। ଗୁରୁବାର ରାତିରେ ସମ୍ପୃକ୍ତ ଠିକା କାମ କରୁଥିବା ଜଣେ ଅଫିସର ଗାଡ଼ି ଲଗାଇ ଗହମ ନେବାକୁ ଉଦ୍ୟମ କରୁଥିବା ବେଳେ ପଚରାଉଚରା କରିବାରୁ ଖାଲି ଗାଡ଼ି ନେଇ ସେମାନେ ଚାଲିଯାଇଥିଲେ। ଲୋକେ ପୋଲିସ ଓ ଉପଜିଲାପାଳଙ୍କ ଦୃଷ୍ଟି ଆକର୍ଷଣ କରିବା ପରେ ବିଳମ୍ବିତ ରାତିରେ ଯୋଗାଣ ବିଭାଗ ଅଧିକାରୀ ଜୟନ୍ତ କୁମାର ଦାଶ ଓ ଅତିରିକ୍ତ ତହସିଲଦାର ପହଞ୍ଚି ଲୋକଙ୍କ ସମ୍ମୁଖରେ ଗହମ ଥିବା କୋଠରିରେ ତାଲା ପକାଇଥିଲେ । ହେଲେ ଏଥିରେ ସମ୍ପୃକ୍ତ ଅଭିଯୁକ୍ତ ନ ଆସିବା ପର୍ଯ୍ୟନ୍ତ ତାଲା ନ ଖୋଲିବା ପାଇଁ ଲୋକେ ଜିଦ୍ ଧରିଛନ୍ତି। ଅଧିକାରୀମାନେ ପୋଲିସ ସହାୟତାରେ ସମ୍ପୃକ୍ତ ଅଭିଯୁକ୍ତଙ୍କୁ ଠାବ କରିବାକୁ ଉଦ୍ୟମ ଚଳାଇଛନ୍ତି।