ନ୍ୟୁୟର୍କ,୧।୯-ଚଳିତ ୟୁଏସ ଓପନ୍ ଗ୍ରାଣ୍ଡସ୍ଲାମ ଟେନିସ ପ୍ରତିଯୋଗିତାରେ ୧୫ତମ ସିଡ୍ ତଥା କାନାଡାର ବିନାକା ଆଣ୍ଡ୍ରେସ୍କୁ ମହିଳା ସିଙ୍ଗଲ୍ସ ଚତୁର୍ଥ ରାଉଣ୍ଡରେ ପ୍ରବେଶ କରିଛନ୍ତି। ଶନିବାର ଏକ ମହିଳା ସିଙ୍ଗଲ୍ସରେ ଏହି ୧୯ ବର୍ଷୀୟା ଖେଳାଳି ୬-୪, ୬-୪ ସେଟ୍ରେ ପୂର୍ବତନ ଅଷ୍ଟ୍ରେଲିଆନ ଓପନ ଚାମ୍ପିୟନ ଡେନମାର୍କର କାରୋଲିନ୍ ଓଜନିଆକିଙ୍କୁ ହରାଇ ଦେଇଛନ୍ତି। ଆଣ୍ଡ୍ରେସ୍କୁ ପରବର୍ତ୍ତୀ ରାଉଣ୍ଡରେ ଆମେରିକାର ଟେଲର ଟାଉନ୍ସେଣ୍ଡ୍ଙ୍କୁ ଭେଟିବେ। ଅନ୍ୟ ଏକ ମ୍ୟାଚରେ ବିଶ୍ୱର ୧୧୬ ନମ୍ବର ଖେଳାଳି ଟାଉନ୍ସେଣ୍ଡ୍ ରୋମାନିଆର ସୋରାନା ସିରଷ୍ଟିଙ୍କୁ ୭-୫, ୬-୨ ସେଟ୍ରେ ପରାସ୍ତ କରିଛନ୍ତି। ପୂର୍ବରୁ କାରୋଲିନା ମୁଚୋଭାଙ୍କ ବିପକ୍ଷରେ ସେରେନା ଓ୍ବିଲିୟମ୍ସ ୬-୩, ୬-୨ ସିଧାସଳଖ ସେଟ୍ରେ ସହଜ ବିଜୟ ହାସଲ କରିଛନ୍ତିି। ଆଶଲେ ବାର୍ଟିଙ୍କର ମଧ୍ୟ ବିଜୟ ଧାରା ଜାରି ରହିଛି। ଦ୍ୱିତୀୟ ସିଡ୍ ଖେଳାଳି ମାରିଆ ସାକାରିଙ୍କୁ ୭-୫, ୬-୩ ସେଟ୍ରେ ପରାସ୍ତ କରିଛନ୍ତି। ପୁରୁଷ ସିଙ୍ଗଲ୍ସରେ ୭ମ ସିଡ୍ କେଇ ନିଶିକୋରି ପ୍ରତିଯୋଗିତାରୁ ବିଦାୟ ନେଇଛନ୍ତି। ଅଷ୍ଟ୍ରେଲିଆର ଆଲେକ୍ସ ମିନାଉର ତାଙ୍କୁ ଏକ ୪ ସେଟ୍ ବିଶିଷ୍ଟ ମ୍ୟାଚରେ ୬-୨, ୬-୪, ୨-୬, ୬-୩ ସେଟ୍ରେ ହରାଇ ଦେଇଛନ୍ତି। କାରୋଲିନା ପ୍ଲିସକୋଭାଙ୍କୁ ପରବର୍ତ୍ତୀ ରାଉଣ୍ଡକୁ ଉନ୍ନୀତ ହେବା ଲାଗି କିଛିଟା କଷ୍ଟ ସ୍ବୀକାର କରିବାକୁ ପଡ଼ିଛି। ସେ ଓନସ ଜାବେଉରଙ୍କୁ ୬-୧, ୪-୬, ୬-୪ ସେଟ୍ରେ ହରାଇ ଦେଇଛନ୍ତି। ଅନ୍ୟପକ୍ଷରେ ବ୍ରିଟିଶ ନମ୍ବର ଓ୍ବାନ ଖେଳାଳି ଜୋହାନ କୋଣ୍ଟା ତାଙ୍କ ମ୍ୟାଚରେ ସହଜ ବିଜୟ ହାସଲ କରିଛନ୍ତି। ସେ ୬-୨, ୬-୩ ସିଧାସଳଖ ସେଟ୍ରେ ଶୁଆଇ ଝାଙ୍ଗ୍ଙ୍କୁ ପରାସ୍ତ କରିଛି।