ଭୁବନେଶ୍ୱର, ୨୦।୧୨(ବ୍ୟୁରୋ):ଗୋଆ, ମସୌରୀ, ଉଦୟପୁର ଭଳି ଓଡ଼ିଶାରେ ବି ହେବ ଡେଷ୍ଟିନେଶନ ଓ୍ବେଡିଂ। ମେହେନ୍ଦି, ସଙ୍ଗୀତ ସେରିମନିରୁ ଆରମ୍ଭ କରି ବିବାହ ପର୍ଯ୍ୟନ୍ତ ସବୁକିଛି ମହାଆଡ଼ମ୍ବରରେ ହେବ। ଏପରି କି ଚାହିଁଲେ ଓଲିଉଡ୍ ଓ ବଲିଉଡ୍ କଳାକାରଙ୍କୁ ମଧ୍ୟ ନିମନ୍ତ୍ରଣ କରାଯିବ। ଆଗାମୀ ବିବାହ ଋତୁକୁ ଦୃଷ୍ଟିରେ ରଖି ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ପକ୍ଷରୁ ପ୍ରଥମଥର ପାଇଁ ଡେଷ୍ଟିନେଶନ ଓ୍ବେଡିଂ ପ୍ୟାକେଜ୍ର ଶୁଭାରମ୍ଭ କରାଯାଇଛି। ପ୍ରାକୃତିକ ପରିବେଶ ମଧ୍ୟରେ ରହିଥିବା ଓଟିଡିସିର କିଛି ପ୍ରମୁଖ ପାନ୍ଥନିବାସରେ ଏହି ପ୍ୟାକେଜ୍ ଉପଲବ୍ଧ ହେବ। ପ୍ରଥମ ପର୍ଯ୍ୟାୟରେ ଚିଲିକା କୂଳରେ ଥିବା ରମ୍ଭା ଓ ବଡ଼କୁଳ ପାନ୍ଥନିବାସ, ଗୋପାଳପୁର, ଚାନ୍ଦିପୁର, ପୁରୀ ଓ କୋଣାର୍କ ପାନ୍ଥନିବାସରେ ଏହି ବ୍ୟବସ୍ଥା ଆରମ୍ଭ କରାଯିବ ବୋଲି କହିଛନ୍ତି ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର।
ଗୁରୁବାର ଭୁବନେଶ୍ୱର ପାନ୍ଥନିବାସରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇ ମିଶ୍ର କହିଥିଲେ, ରାଜ୍ୟ ଏବଂ ରାଜ୍ୟ ବାହାରର ପର୍ଯ୍ୟଟକମାନେ ନିଜ ବନ୍ଧୁ ପରିଜନଙ୍କ ବିବାହ ଉତ୍ସବ ଉପରୋକ୍ତ ପାନ୍ଥନିବାସ ଗୁଡ଼ିକରେ କରିପାରିବେ। ସାଜସଜ୍ଜାରୁ ଆରମ୍ଭ କରି କ୍ୟାଟରିଂ ପର୍ଯ୍ୟନ୍ତ, ସମ୍ପୂର୍ଣ୍ଣ ବିବାହ ଉତ୍ସବର ଦାୟିତ୍ୱ ଓଟିଡିସି ବହନ କରିବ। ଅତିଥିଙ୍କ ରହଣି ସହ ଖାଦ୍ୟ, ପାନୀୟ, ବ୍ୟାଣ୍ଡ୍ବାଜା, ଫ୍ଲୋରାଲ ଡେକୋରେଶନ, ମେହେନ୍ଦି ଓ ସଙ୍ଗୀତ କାର୍ଯ୍ୟକ୍ରମ, ସ୍ବତନ୍ତ୍ର ବିଉଟିସିଆନ୍, ସାଂସ୍କୃତିକ କାର୍ଯ୍ୟକ୍ରମ, ଭିଡ଼ିଓଗ୍ରାଫି ଓ ନିକଟସ୍ଥ ପର୍ଯ୍ୟଟନସ୍ଥଳୀକୁ ଭ୍ରମଣ ସୁବିଧା ସବୁକିଛି ଯୋଗାଇ ଦିଆଯିବ। କେବଳ ଏତିକି ନୁହେଁ, ନିଗମ ପକ୍ଷରୁ ବର ଓ କନ୍ୟାଙ୍କୁ ମାଗଣାରେ ୨ ରାତି ଓ ୩ ଦିନର ଏକ ହନିମୁନ୍ ପ୍ୟାକେଜ୍ ମଧ୍ୟ ଉପହାରଭାବେ ଦିଆଯିବ। ଏହାସହ ଦୁଇଟି ଆନିଭର୍ସାରି ପ୍ୟାକେଜ୍ ବି ମାଗଣାରେ ମିଳିବ। ମୋଟ ୫୦ ଅତିଥିଙ୍କ ପାଇଁ ଅତିକମ୍ରେ ପ୍ୟାକେଜ୍ର ଦାମ୍ ୨ଲକ୍ଷ ୧୭ ହଜାର ରହିଥିବାବେଳେ ଅନ୍ୟାନ୍ୟ ସୁବିଧା ସୁଯୋଗ ଉପଲବ୍ଧ କରାଇବାକୁ ହେଲେ ପ୍ରାୟ ୪ଲକ୍ଷ ୭୫ ହଜାର ଦେବାକୁ ପଡ଼ିବ। ଏଥିପାଇଁ ଗ୍ରାହକ ଓଟିଡିସି ଓ୍ବେବ୍ସାଇଟ ସହ ମେକ୍ ମାଇଁ ଟ୍ରିପ୍ (ଏମ୍ଏମ୍ଟି), ଗୋଆଇବିବୋ ଓ ଯାତ୍ରା ଡଟ୍ କମ୍ରେ ବୁକିଂ କରିପାରିବେ। ଏହାବ୍ୟତୀତ ପାନ୍ଥନିବାସରେ ରହଣି ପାଇଁ ମଧ୍ୟ ପର୍ଯ୍ୟଟକମାନେ ଏହି ଆପ୍ ଏବଂ ଓ୍ବେବ୍ସାଇଟରେ ବୁକିଂ କରିପାରିବେ ବୋଲି ମିଶ୍ର ସୂଚନା ଦେଇଛନ୍ତି। ଏହାଛଡ଼ା ପଶ୍ଚିମ ଓଡ଼ିଶାର କଳାହାଣ୍ଡି ଓ ବଲାଙ୍ଗୀର ଜିଲା ପର୍ଯ୍ୟଟନସ୍ଥଳୀଗୁଡ଼ିକ ଭ୍ରମଣ ପାଇଁ ୨ଟି ବସ୍ ଯୋଗାଇ ଦିଆଯିବ। ପ୍ରଥମଥର ପାଇଁ ରାଜ୍ୟ, ଅନ୍ୟ ରାଜ୍ୟ ଏବଂ କେନ୍ଦ୍ର ସରକାରଙ୍କ ଅଧୀନରେ କାମ କରୁଥିବା ସରକାରୀ କର୍ମଚାରୀମାନଙ୍କୁ ପାନ୍ଥନିବାସରେ ୩୦% ରିହାତି ମିଳିବ ବୋଲି ଘୋଷଣା କରାଯାଇଛି।