ବାଲେଶ୍ୱର ଅଫିସ, ୨୧।୩-ବାଲେଶ୍ୱର ସହରର ମୁଖ୍ୟରାସ୍ତା ଓଟିରୋଡ୍ ସମ୍ପ୍ରସାରଣ ପାଇଁ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି। ଶୁକ୍ରବାର ଆଇଟିଆଇସ୍ଥିତ ଲକ୍ଷ୍ମୀନାରାୟଣ ମନ୍ଦିରର ତୋରଣ, ଗରୁଡ଼ଖମ୍ଭ ଓ ନାଟମଣ୍ଡପ ଜେସିବି ଦ୍ୱାରା ଭଙ୍ଗା ଯାଇଥିବାବେଳେ କେବଳ ଠାକୁରଙ୍କ ଆସ୍ଥାନ ରହିଛି।
ଜିଲାର ମୁଖ୍ୟ ରାସ୍ତା ଓଟିରୋଡ୍ର ସମ୍ପ୍ରସାରଣ ତଥା ଡ୍ରେନ୍ ବ୍ୟବସ୍ଥା ପାଇଁ ଆବଶ୍ୟକ ଜାଗାକୁ ଲକ୍ଷ୍ୟ ରଖାଯାଇ ପ୍ରଶାସନ ପକ୍ଷରୁ କଠୋରତା ଅବଲମ୍ବନ କରାଯାଇଥିଲା। ଲୋକଙ୍କର ବିରୋଧକୁ ଆଖି ଆଗରେ ରଖି ଗୁରୁବାର ଅପରାହ୍ନରେ ପ୍ରଶାସନ ମନ୍ଦିର ନିକଟସ୍ଥ ଅଞ୍ଚଳରେ ୧୪୪ ଧାରା ଜାରି କରିବା ସହ ୬ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରିଥିଲା। ଶୁକ୍ରବାର ପୂର୍ବାହ୍ନ ୧୦ଟାରେ ଉପଜିଲାପାଳ ନୀଲୁ ମହାପାତ୍ର ମାଜିଷ୍ଟ୍ରେଟ୍ ଦାୟିତ୍ୱରେ ଅତିରିକ୍ତ ଜିଲା ଆରକ୍ଷୀ ଅଧୀକ୍ଷକ ତୁଷାରକାନ୍ତି ଜେନାଙ୍କ ନେତୃତ୍ୱରେ ଡିଏସ୍ପି (ସିଟି) ମନୋଜ ରାଉତ, ଏସ୍ଡ଼ିପିଓ ପ୍ରଭାସ ଚନ୍ଦ୍ର ପାଲ, ସଦର ଥାନା ଆଇଆଇସି କ୍ଷମାସାଗର ପଣ୍ଡା, ଶିଳ୍ପାଞ୍ଚଳ ଥାନା ଆଇଆଇସି ପରେଶ ରାଉତ, ଟାଉନ ଥାନା ଆଇଆଇସି ସରୋଜିନୀ ନାୟକ, ୧୪ଜଣ ଏସ୍ଆଇ ଓ ଏଏସ୍ଆଇଙ୍କ ସହିତ ସଦର ତହସିଲଦାର ପଞ୍ଚାନନ ପାତ୍ର, ରେମୁଣା ତହସିଲଦାର ଚାର୍ଲସ ନାୟକ, ସଦର ଆର୍ଆଇ, ପୂର୍ତ୍ତବିଭାଗର ଅଧିକାରୀ ପ୍ରମୁଖ ଉପସ୍ଥିତ ରହି କାର୍ଯ୍ୟକୁ ସମ୍ପାଦନ କରିଥିଲେ।
ଜିଲା ପ୍ରଶାସନ ପକ୍ଷରୁ ଦୀର୍ଘଦିନ ଧରି ମନ୍ଦିର ପରିଚାଳନା କମିଟିକୁ ନୋଟିସ୍ ଦିଆଯାଇଥିଲା। ପୂର୍ବରୁ ଲୋକମାନଙ୍କ ବିରୋଧ ପରେ ପ୍ରଶାସନ ବିଫଳ ହୋଇ ଫେରୁ ଥିବା ବେଳେ ଗତ ଜାନୁୟାରୀ ୨୮ ତାରିଖରେ ଏହାର ଉଚ୍ଛେଦ ପାଇଁ ପ୍ରଶାସନ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ କେବଳ ମନ୍ଦିରର ସମ୍ମୁଖ ଭାଗ ଭଙ୍ଗାଯାଇଥିଲା।