ଓଡଗାଁ,୨୫।୪(ସ୍ବ.ପ୍ର.)- କରୋନା ମୁକାବିଲାକୁ ନେଇ ସମ୍ପ୍ରତି ସାରା ରାଜ୍ୟରେ ଲକ୍ଡାଉନ୍ ଜାରି ରହିଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ପିଲାଙ୍କୁ ଘରେ ଘରେ ବୁଲି ଶିକ୍ଷକ ମାନେ ବହି ବାଣ୍ଟିବା ପାଇଁ ନିର୍ଦ୍ଦେଶ ଦେଇଛନ୍ତି। ହେଲେ କିଛି ସ୍କୁଲ କର୍ତ୍ତୃପକ୍ଷ ଏ ନିୟମକୁ ବେଖାତିର କରି ପିଲାଙ୍କୁ ସ୍କୁଲକୁ ଡକାଇ ବହି ବାଣ୍ଟୁଥିବା ଦେଖିବାକୁ ମିଳିଛି। ଏହିପରି ଘଟଣା ଖୋଦ ନୟାଗଡ଼ ଜିଲା ଓଡ଼ଗାଁ ବ୍ଲକ ଶିକ୍ଷା ଅଧିକାରୀ କାର୍ଯ୍ୟାଳୟ ସମ୍ମୁଖରେ ଥିବା ସରକାରୀ ଏମ୍ଇ ସ୍କୁଲରେ ଶନିବାର ଦେଖିବାକୁ ମିଳିଥିଲା। ପିଲାମାନେ ଗହଳି କରି ବହି ପାଇଁ ଠିଆ ହୋଇଥିବା ବେଳେ କାଁ ଭାଁ ମାସ୍କ ପିନ୍ଧିଥିଲେ। ସାମାଜିକ ଦୂରତା ପ୍ରତି ଶିକ୍ଷକମାନେ ଆଦୌ ଧ୍ୟାନ ଦେଇ ନ ଥିଲେ। ପଚାରିବାରେ ଏମିତିକା ବାଣ୍ଟିଲେ ହେଲେ ହେବ ବୋଲି କହିଥିଲେ। ଏନେଇ ବିଇଓ ମୋବାଇଲରେ କୌଣସି ଉତ୍ତର ନ ଦେବାରୁ ଡିଇଓଙ୍କୁ ଅବଗତ କରାଯାଇଥିଲା, ଏପରିକି ଏନ୍ଏସି କର୍ତ୍ତୃପକ୍ଷଙ୍କୁ ମଧ୍ୟ ଶିକ୍ଷକମାନେ ବେଖାତିର କରିଥିବା ସେ କହିଛନ୍ତି। ଅନୁରୁପ ଭାବେ ତହସିଲଦାର, ଉପଜିଲାପାଳ ଓ ଜିଲାପାଳଙ୍କ ମୋବାଇଲକୁ ଫଟୋ ଦ୍ୱାରା ଅବଗତ କରାଯାଇଥିବା ବେଳେ ବହି ବଣ୍ଟା ଚାଲିଥିବା ଦେଖିବାକୁ ମିଳିଛି।