ସୋନି ଟିଭି ପକ୍ଷରୁ ପ୍ରସାରିତ ଇଣ୍ଡିଆନ ଆଇଡଲ-୧୧ରେ ନଜର ଆସିଛନ୍ତି ପୁଣି ଜଣେ ଓଡିଆ ଝିଅ। ସେ ହେଉଛନ୍ତି ଚେଲ୍ସି ବେଉରା। ଇଶକ୍ଜାଦେ ଫିଲ୍ମର ‘ମେଁ ପରେଶାନ..’ ଗୀତ ଗାଇ ସେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି। ନିଜ ପ୍ରତିଭା ଜରିଆରେ ସେ ଶେଷ ୧୫ ପ୍ରତିଯୋଗୀଙ୍କ ମଧ୍ୟରେ ସ୍ଥାନ ପାଇଛନ୍ତି। ତାଙ୍କ ଗୀତକୁ ଜଜ୍ମାନେ ପ୍ରଶଂସା କରିବା ସହ ଚେଲ୍ସିଙ୍କୁ ‘ଫ୍ୟୁଚର୍ ଷ୍ଟାର’ ଆଖ୍ୟା ଦେଇଛନ୍ତି। କେବଳ ଶୋ’ର ଜଜ୍ମାନେ ନୁହେଁ, ମାଷ୍ଟରବ୍ଲାଷ୍ଟର ସଚିନ ତେନ୍ଦୁଲକର ମଧ୍ୟ ତାଙ୍କ ଦିଓ୍ବାନା ହୋଇଛନ୍ତି। ସଚିନ ନିଜ ଟୁଇଟରେ ଚେଲ୍ସିଙ୍କ ସହ ଶୋ’ର ଆଉ ୩ଜଣଙ୍କ ପ୍ରତିଭାର ପ୍ରଶଂସା କରିଛନ୍ତି। ଏହି ୪ଜଣ ନିଶ୍ଚିତ ଆଗକୁ ଯିବେ ବୋଲି ସେ ଭବିଷ୍ୟବାଣୀ କରିଛନ୍ତି। ଅପରପକ୍ଷରେ ଅନ୍ୟତମ ଓଡ଼ିଆ ସିଙ୍ଗର୍ ସୋନା ମହାପାତ୍ର ସଚିନଙ୍କ ଟୁଇଟକୁ ନାପସନ୍ଦ କରିଛନ୍ତି। ସେ କହିଛନ୍ତି, ଇଣ୍ଡିଆନ୍ ଆଇଡଲ୍ ଶୋ’ର ଜଜ୍ ଅନୁ ମଲିକ ଯୌନ ଉତ୍ପୀଡନ କେସ୍ ରହିଛି। ଏଭଳି ଶୋ’ର ପ୍ରଚାର କରୁଛନ୍ତି ସଚିନଙ୍କ ଭଳି ଜଣେ ମହାନ୍ ଖେଳାଳି। ଏହାସହ ଅନୁଙ୍କୁ ପଣିଥରେ ଜଜ୍ ଭାବେ ଆଣିଥିବାରୁ ସେ ସୋନି ଟିଭି ଉପରେ ବର୍ଷିଛନ୍ତି।