ଭୁବନେଶ୍ୱର,୧୭।୧୦(ବ୍ୟୁରୋ): ସୋସାଇଟି ଫର୍ ଆକ୍ନଲେଜ୍ମେଣ୍ଟ୍ ଇନ୍ ୱାର୍କ ଏକ୍ସିଲେନ୍ସ (ଏସ୍ଏଡବ୍ଲ୍ୟୁଇ) ପକ୍ଷରୁ ଓଡ଼ିିଆ ଚଳଚ୍ଚିତ୍ର ନିର୍ମାତାଙ୍କୁ ସମ୍ମାନିତ କରାଯାଇଛି। ନିକଟରେ ଦୁବାଇରେ ଅନୁଷ୍ଠିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଓଡିଶାର ଯୁବ ଚଳଚ୍ଚିତ୍ର ନିର୍ମାତା ଅମୃତେନ୍ଦୁ ବରାଳଙ୍କୁ ଇଣ୍ଡିଆ ଇଣ୍ଟରନ୍ୟାଶ୍ନାଲ ଏକ୍ସିଲେନ୍ସ ଆୱାର୍ଡ ପ୍ରଦାନ କରାଯାଇଛି। ପ୍ରତିଭାଶାଳୀ ବ୍ୟକ୍ତିବିଶେଷଙ୍କୁ ସେମାନଙ୍କ ଅସାଧାରଣ କାର୍ଯ୍ୟ ନିମନ୍ତେ ପ୍ରଦାନ କରାଯାଉଥିବା ଏହି ସମ୍ମାନ ପାଇବାରେ ଅମୃତେନ୍ଦୁ ପ୍ରଥମ ଓଡ଼ିଆ। ଅମୃତେନ୍ଦୁଙ୍କୁ ‘ଫିଲ୍ମ ମେକିଂ ଅଫ୍ ଦ ଇୟର’ ବିଭାଗରେ ଏହି ସମ୍ମାନ ପ୍ରଦାନ କରାଯାଇଛି। ନିଜ ଡକ୍ୟୁମେଣ୍ଟାରୀ ଫିଲ୍ମ ‘ମିଶନ୍ ଗଙ୍ଗେ’ ପାଇଁ ସେ ଏହି ଆୱାର୍ଡ ପାଇଛନ୍ତି। ଏହା ପୂର୍ବରୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ପ୍ରଶଂସିତ ହେବାସହ ଗଙ୍ଗାନଦୀ ତଟରୁ ୫୦ ଟନ୍ ଆବର୍ଜନା ସଫା କରିବାରେ ମଧ୍ୟ ସଫଳ ହୋଇଥିଲେ ା ବଲିଉଡ୍ର ଲୋକପ୍ରିୟ ଅଭିନେତା ଅନିଲ୍ କପୁର ଏବଂ ପୂର୍ବତନ କ୍ୟାବିନେଟ୍ ମନ୍ତ୍ରୀ ସାହେଦ୍ ଶାହାନୱାଜ୍ ହୁସେନ୍ଙ୍କଠାରୁ ଅମୃତେନ୍ଦୁ ଏହି ଆୱାର୍ଡ ଗ୍ରହଣ କରିଥିଲେ। କଠିନ ପରିଶ୍ରମକୁ ସ୍ବୀକୃତି ମିଳିଥିବାରୁ ଇଣ୍ଡିଆ ଇଣ୍ଟରନ୍ୟାଶ୍ନାଲ ଏକ୍ସିଲେନ୍ସ ଆୱାର୍ଡକୁ ସେ ଧନ୍ୟବାଦ ଦେବାସହ ଓଡ଼ିଶାକୁ ଅନ୍ତର୍ଜାତୀୟସ୍ତରରେ ପ୍ରତିନିଧିତ୍ୱ କରିଥିବାରୁ ଖୁସି ବ୍ୟକ୍ତ କରିଛନ୍ତି। ପୂର୍ବରୁ ଅମୃତେନ୍ଦୁ ଓଡ଼ିଶା ସରକାରଙ୍କ ଦ୍ୱାରା ନିର୍ମିତ ଡକ୍ୟୁମେଣ୍ଟାରୀ ଚଳଚ୍ଚିତ୍ର ‘ବିଜୁ ପଟ୍ଟନାୟକ ହିମାଳୟାନ୍’ରେ ମଧ୍ୟ ନିଜର ପ୍ରତିଭା ଦେଖାଇଥିଲେ।