ଭୁବନେଶ୍ୱର,୨୩ା୧୧(ବ୍ୟୁରୋ): ଭାରତୀୟ କଳା, ସଂସ୍କୃତି, ପରମ୍ପରା ଓ ପାରିବାରିକ ମୂଲ୍ୟବୋଧ ସମ୍ପର୍କରେ ଅବଗତ ହେବାକୁ ୭ ରାଷ୍ଟ୍ରରୁ ଭାରତ ଆସିଥିବା ୩୨ଜଣିଆ ମହିଳା ପ୍ରତିନିଧି ଦଳ ଓଡ଼ିଶା ଗସ୍ତରେ ଆସିଛନ୍ତି। ଏହି ଅବସରରେ ସେମାନେ ସୋଆ ବିଶ୍ୱବିଦ୍ୟାଳୟ ପରିସରରେ ଅନୁଷ୍ଠିତ ସ୍ବତନ୍ତ୍ର କାର୍ଯ୍ୟକ୍ରମରେ ଯୋଗଦେଇ ଶିକ୍ଷାବିତ୍ ଏବଂ ଗୃହିଣୀମାନଙ୍କ ସହ ଭାବର ଆଦାନପ୍ରଦାନ କରିଥିଲେ। ‘ବସୁଧୈବ କୁଟୁମ୍ବକମ୍’ କାର୍ଯ୍ୟକ୍ରମ ମାଧ୍ୟମରେ ସେମାନେ ଏହି ଭ୍ରମଣ କରୁଥିବାବେଳେ ଭୁବନେଶ୍ୱରଠାରେ ସେମାନେ ବିଭିନ୍ନ ପରିବାର ସହ ସମୟ ଅତିବାହିତ କରି ଓଡ଼ିଆ ସଂସ୍କୃତି ଓ ପାରିବାରିକ ମୂଲ୍ୟବୋଧ ସମ୍ପର୍କରେ ଜାଣିବାକୁ ପାଇଥିଲେ। ନୂଆଦିଲ୍ଲୀ ଓ ଜୟପୁର ପରେ ଭୁବନେଶ୍ୱର ଏବଂ ପରେ ସେମାନେ ବାଙ୍ଗାଲୋର ଓ ପୁଣେ ଯାଇ ସେଠାରୁ ନିଜ ନିଜ ଦେଶକୁ ଫେରିଯିବେ। ଫାଉଣ୍ଡେଶନ ଫର୍ ହୋଲିଷ୍ଟିକ୍ ଡେଭଲପମେଣ୍ଟ ଇନ୍ ଏକାଡେମିକ୍ ଫିଲ୍ଡ(ଏଫ୍ଏଚ୍ଡିଏଏଫ୍) ସହ ଇନ୍ଦିରାଗାନ୍ଧୀ ନ୍ୟାଶନାଲ ସେଣ୍ଟର ଫର୍ ଆର୍ଟସ, ଭାରତୀୟ ଶିକ୍ଷାମଣ୍ଡଳ ଏବଂ ବିଶ୍ୱଗ୍ରାମର ମିଳିତ ଆୟୋଜନରେ ଏହି କାର୍ଯ୍ୟକ୍ରମ କରାଯାଇଥିଲା। ଏଫ୍ଏଚ୍ଡିଏଏଫ୍ ଅଧ୍ୟକ୍ଷା ମାଧୁରୀ ସହସ୍ରବୁଦ୍ଧେ କାର୍ଯ୍ୟକ୍ରମରେ ଯୋଗଦେଇ ମା’ ମାନେ ଚାହିଁଲେ ସମାଜକୁ ପରିବର୍ତ୍ତନ କରିପାରିବେ ବୋଲି କହିଥିଲେ। ଏହି ଅବସରରେ ସୋଆ କୁଳପତି ପ୍ରଫେସର ଅମିତ ବାନାର୍ଜୀ, ସୋଆ ଆଡ୍ଭାଇଜରି ବୋର୍ଡ ଅଧ୍ୟକ୍ଷ ପ୍ରଫେସର ଦାମୋଦର ଆଚାର୍ଯ୍ୟ, ସୋଆ ମେଡିକାଲ ପ୍ରୋଗ୍ରାମ ନିର୍ଦ୍ଦେଶକ ପ୍ରଫେସର ଅଶୋକ ମହାପାତ୍ର ପ୍ରମୁଖ ଉପସ୍ଥିତ ଥିଲେ।