ଭୁବନେଶ୍ୱର, ୨୪।୯(ବ୍ୟୁରୋ): ରାଜ୍ୟର ବିଭିନ୍ନ ଜେଲରେ ପ୍ରାୟ ୧୮ ହଜାର କଏଦୀ ରହୁଛନ୍ତି। ସେମାନେ ଯେପରି ଜେଲ ଭିତରେ ସୁବିଧାରେ ରହିବେ ସେଥିଲାଗି ଜେଲ କର୍ତ୍ତୃପକ୍ଷଙ୍କ ପକ୍ଷରୁ ନୂଆ ନୂଆ ପଦକ୍ଷେପ ନିଆଯାଉଛି। ଏଣିକି କଏଦୀମାନେ ଜେଲ୍ ଭିତରେ ସ୍ମାର୍ଟ କାର୍ଡ ବ୍ୟବହାର କରିପାରିବେ। ଏ ନେଇ ଗୃହ ବିଭାଗକୁ ଜେଲ କର୍ତ୍ତୃପକ୍ଷ ଅବଗତ କରାଇଛନ୍ତି। ଖୁବ୍ଶୀଘ୍ର ଏହି ସ୍ମାର୍ଟକାର୍ଡ ବ୍ୟବସ୍ଥା କରାଯିବ। କଏଦୀମାନେ ଜେଲ ଭିତରେ କାର୍ଡ ସାହାଯ୍ୟରେ ଟଙ୍କା ଦେଇ ନିଜର ଆବଶ୍ୟକ ସାମଗ୍ରୀ କିଣିପାରିବେ। ଏହାଦ୍ୱାରା ଜେଲ ବ୍ୟବସ୍ଥାରେ ସ୍ବଚ୍ଛତା ଆସିବ ବୋଲି ଜେଲ ଡିଜି ସତ୍ୟଜିତ୍ ମହାନ୍ତି କହିଛନ୍ତି।
ଜେଲ୍ରେ ଥିବା କଏଦୀଙ୍କୁ ପରିବାର ଲୋକେ ଦେଖା କରିବାକୁ ଆସିଲେ ସାଧାରଣତଃ ସେମାନେ ଟଙ୍କା ଦେଇଥାନ୍ତି। କିନ୍ତୁ ଏହି ଟଙ୍କାକୁ କଏଦୀଙ୍କୁ ଦିଆଯାଏ ନାହିଁ। ଏହାର ମୂଲ୍ୟ ଅନୁଯାୟୀ କଏଦୀକୁ ଏକ ଟୋକନ ଦିଆଯାଇଥାଏ। କଏଦୀମାନେ ତାହାକୁ ଜେଲ କ୍ୟାଣ୍ଟିନରେ ଦେଖାଇ ବିଭିନ୍ନ ସାମଗ୍ରୀ କିଣିଥାନ୍ତି। ସେମାନଙ୍କ ଟଙ୍କା ଜେଲ କର୍ମଚାରୀଙ୍କ ପାଖରେ ରହୁଥିବାରୁ ବାଟମାରଣା ହେବାର ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ନୂଆ ବ୍ୟବସ୍ଥା କରାଯାଉଥିବା ଜେଲ ଡିଜି ପ୍ରକାଶ କରିଛନ୍ତି। ତିହାର, ମାଡ୍ରାସ, ହାଇଦ୍ରାବାଦ ଭଳି ଅନେକ ବଡ ସହରରେ ଥିବା ଜେଲରେ ଏହି ବ୍ୟବସ୍ଥା କରାଯାଇଛି। ଓଡ଼ିଶାରେ ପ୍ରଥମ ଥର ଚୌଦ୍ୱାର ଏବଂ ଝାରପଡ଼ା ଜେଲ୍ରେ ଏଭଳି ବ୍ୟବସ୍ଥା କରାଯିବ। ଏହା ସଫଳ ହେଲେ ଅନ୍ୟ ଜିଲାରେ ଥିବା ଜେଲରେ ଲାଗୁ କରାଯିବ। ଏହି ସ୍ମାର୍ଟ କାର୍ଡ ବ୍ୟବସ୍ଥା ଲାଗୁ ହେଲେ କଏଦୀଙ୍କ ସମ୍ପର୍କୀୟମାନେ ଆଉ ଜେଲ ବିଭାଗର ଅଫିସରଙ୍କୁ ଟଙ୍କା ଦେବେ ନାହିଁ। କଏଦୀଙ୍କ ସ୍ମାର୍ଟକାର୍ଡ ଆକାଉଣ୍ଟରେ ଟଙ୍କା ଜମା କରିପାରିବେ। ଏହି କାର୍ଡ ଦ୍ୱାରା କଏଦୀମାନେ ଜେଲ ଭିତରେ ବିଭିନ୍ନ ସାମଗ୍ରୀ ସୁବିଧାରେ କିଣିପାରିବେ। ଏଥିପାଇଁ କ୍ୟାଣ୍ଟିନ ସହ ଜେଲ ପରିସରରେ ସ୍ବାଇପ୍ ମେଶିନ୍ ରଖାଯିବ। ଏ ନେଇ ଏକ ବ୍ୟାଙ୍କକୁ ପ୍ରସ୍ତାବ ଦିଆଯାଇଛି। ସେହିପରି କଏଦୀଙ୍କ ପାଇଁ ହେଡ୍ଫୋନ୍ ଓ ମାଇକ୍ରୋ ଫୋନ୍ର ବ୍ୟବସ୍ଥା କରାଯିବ। ବିଶେଷକରି କଏଦୀଙ୍କୁ ପରିବାର ଲୋକେ ଭେଟିବାକୁ ଆସିଲେ ସେମାନେ ଏକ ଝରକା ଭଳି ଗେଟ୍ରେ କଥା ହୋଇଥାନ୍ତି। ଏକାଧିକ କଏଦୀ ଏକସମୟରେ ପରିବାର ଲୋକଙ୍କୁ ଦେଖା କରୁଥିବାରୁ ହୋହଲ୍ଲା ସୃଷ୍ଟି ହୋଇଥାଏ। କେହି କାହା କଥା ଭଲ ଭାବେ ଶୁଣି ପାରି ନ ଥାନ୍ତି। ତେଣୁ ପରିଜନଙ୍କ ସହ କଥା ହେବା ସମୟରେ ସେମାନଙ୍କୁ ହେଡଫୋନ ଏବଂ ମାଇକ୍ରୋ ଫୋନ୍ ଦିଆଯିବ। ଏହି ସମୟରେ କଏଦୀଙ୍କ କଥା ରେକର୍ଡିଂ ହେବା ସହ ସିସିଟିଭିରେ ସେମାନଙ୍କ ଗତିବିଧି ଉପରେ ନଜର ରଖାଯିବ।