ଭୁବନେଶ୍ୱର,୨୫।୪(ବ୍ୟୁରୋ): ଲକ୍ଡାଉନ୍ ସମୟସୀମା ସରିବା ପରେ ଓଡ଼ିଶାକୁ ପ୍ରବାସୀ ଓଡ଼ିଆ ଫେରିବାର ଯଥେଷ୍ଟ ରହିଛି। ଯେହେତୁ ସେମାନେ ସଂକ୍ରମିତ ଦେଶ/ରାଜ୍ୟରୁ ଆସୁଥାଇ ପାରନ୍ତି ତେଣୁ ସଂକ୍ରମଣ ହେବାର ସମ୍ଭାବନା ରହିଛି। ଏନେଇ ଆଗୁଆ ପଦକ୍ଷେପ ସ୍ବରୂପ ରାଜ୍ୟ ସରକାର ପଞ୍ଜୀକରଣ ବ୍ୟବସ୍ଥା କରାଯାଇଛି।
ଶନିବାର ଗୀତଗୋବିନ୍ଦ ସଦନରେ ଆୟୋଜିତ ଖବରଦାତା ସମ୍ମିଳନୀରେ ଏ ନେଇ ଅଧୀକ ସୂଚନା ଦେଇଛନ୍ତି ନିରଞ୍ଜନ କୁମାର ସିଂହ। ସେ କହିଛନ୍ତି, ଓଡ଼ିଶା ବାହାରେ ଯେଉଁ ଓଡ଼ିଆମାନେ ରହିଛନ୍ତି ଏବଂ ଯେଉଁମାନେ ରାଜ୍ୟକୁ ଫେରିବାକୁ ଅତି ବ୍ୟଗ୍ର ଅଛନ୍ତି, ସେମାନେ କିପରି ଫେରିବେ ସେ ନେଇ ରାଜ୍ୟ ସରକାର ପଦକ୍ଷେପ ଗ୍ରହଣ କରିଛନ୍ତି। ପ୍ରଥମେ ସରକାରଙ୍କ ତରଫରୁ ସେମାନଙ୍କୁ ଆଶ୍ୱସ୍ତ କରାଯାଉଛି। ସେମାନଙ୍କର ସମସ୍ୟା ଏବଂ ବ୍ୟଗ୍ରତା ବିଷୟରେ ସରକାର ଚିନ୍ତିତ ଅଛନ୍ତି। ସମସ୍ତଙ୍କୁ ସରକାର ଓଡ଼ିଶା ଫେରିବାକୁ ସୁଯୋଗ ଦେବେ।
କେହି ଓଡ଼ିଶା ଆସିବାକୁ ଚାହୁଁଥିଲେ ତାଙ୍କୁ ପଞ୍ଜୀକରଣ କରିବାକୁ ପଡ଼ିବ। ସେ ସହରାଞ୍ଚଳ ହେଉ ଅଥବା ଗ୍ରାମାଞ୍ଚଳ, ସମସ୍ତଙ୍କ ପାଇଁ ପଞ୍ଜିକରଣ ବାଧ୍ୟତାମୂଳକ ଅଟେ। ସେଥିପାଇଁ ପ୍ରଥମେ ରାଜ୍ୟ ସରକାରଙ୍କ ପକ୍ଷରୁ ଦିଆଯାଇଥିବା ପୋର୍ଟାଲ https://covid19.odisha.gov.in/ କୁ ଯିବାକୁ ପଡ଼ିବ। ସବୁ ପଞ୍ଚାୟତରେ ନୋଡାଲ ଅଫିସର, ସହରର ବିଭିନ୍ନ ଓ୍ବାର୍ଡରେ ଓ୍ବାଡ୍ ନୋଡାଲ ଅଫିସର ନିଯୁକ୍ତ କରାଯାଇଛି। ସେମାନେ ରେଜିଷ୍ଟ୍ରେଶନ ପାଇଁ ସମସ୍ତଙ୍କୁ ସାହାଯ୍ୟ କରିବେ। ପଞ୍ଜିକରଣ ପାଇଁ ତିନୋଟି ଉପାୟ ରହିଛି।
-ନିଜେ ନିଜର ପଞ୍ଜୀକରଣ କରିପାରିବେ।
-ସ୍ଥାନୀୟ ବ୍ୟକ୍ତିଙ୍କ ସହଯୋଗରେ ପଞ୍ଜୀକରଣ କରାଇପାରିବେ।
-ପଞ୍ଚାୟତ ନୋଡାଲ ଅଫିସର/ଓ୍ବାର୍ଡ ନୋଡାଲ ଅଫିସରଙ୍କ ସହଯୋଗରେ ପଞ୍ଜୀକରଣ କରିପାରିବେ।
୨୪ ତାରିଖରୁ ଏହା ଆରମ୍ଭ ହୋଇଛି। ଯେଉଁମାନେ ଓଡ଼ିଶା ଫେରିବେ ସେମାନେ ୧୪ ଦିନ ପଞ୍ଚାୟତ ଅଥବା ସରକାରୀ କ୍ୱାରାଣ୍ଟାଇନ୍ ସେଣ୍ଟରରେ ରହିବାକୁ ବାଧ୍ୟ। ଏହି ସମୟ ମଧ୍ୟରେ ତାଙ୍କ ସ୍ବାସ୍ଥ୍ୟ ପରୀକ୍ଷା କରାଯିବ। ଯଦି ସେ ସୁସ୍ଥ ଥାଆନ୍ତି ତେବେ ଘରକୁ ଫେରିବେ। ନଚେତ ପଜିଟିଭ୍ ଆସିଲେ ତାଙ୍କୁ ଚିିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯିବ ବୋଲି ସେ କହିଛନ୍ତି।