ଭୁବନେଶ୍ୱର, ୧୭।୧୦(କ୍ରୀଡ଼ା ପ୍ରତିନିଧି)- ଇଣ୍ଡିଆନ ସୁପର ଲିଗ୍ (ଆଇଏସଏଲ)ର ନୂଆ ଦଳ ଓଡ଼ିଶା ଏଫସିର ଜର୍ସି ଉନ୍ମୋଚନ ଉତ୍ସବ ବୁଧବାର ସ୍ଥାନୀୟ ଏକ ହୋଟେଲରେ ଅନୁଷ୍ଠିତ ହୋଇ ଯାଇଛି। ଏଥିସହିତ ଆନୁଷ୍ଠାନିକଭାବେ ଓଡ଼ିଶାର ଏକ ଜାତୀୟ ଫୁଟବଲ କ୍ଲବର କାର୍ଯ୍ୟାରମ୍ଭ ହୋଇଛି। ସାଂସ୍କୃତିକ କାର୍ଯ୍ୟକ୍ରମରୁ ଆରମ୍ଭ ହୋଇଥିବା ଏହି ଉତ୍ସବରେ ରାଜ୍ୟ ସରକାରଙ୍କ କ୍ରୀଡ଼ା ବିଭାଗର ନିର୍ଦ୍ଦେଶକ ଭିନିଲ କ୍ରିଷ୍ଣା, ଓଡ଼ିଶା ଏଫସି ନିର୍ଦ୍ଦେଶକ ରୋହନ ଶର୍ମା, ମୁଖ୍ୟ କାର୍ଯ୍ୟନିର୍ବାହୀ ଅନିଶ୍ ଶାହ, କୋଚ୍ ଜୋସେପ ଗାମ୍ବାଉ ଏବଂ ଖେଳାଳିମାନେ ଯୋଗଦେଇ ଜର୍ସି ଉନ୍ମୋଚନ କରିଥିଲେ। ଦଳର ଓଡ଼ିଆ ଖେଳାଳି ଶୁଭମ୍ ଷଡ଼ଙ୍ଗୀ ଆକର୍ଷଣର କେନ୍ଦ୍ରବିନ୍ଦୁରେ ରହିଥିଲେ। ଏହି ଅବସରେ ନିର୍ଦ୍ଦେଶକ ରୋହନ କହିଲେ ଯେ, ଆମେ ନୂଆ କିଟ୍ ଉନ୍ମୋଚନକୁ ଅପେକ୍ଷା କରିଥିଲୁ, କାରଣ ଏହା ନୂଆ ଆରମ୍ଭର ସଙ୍କେତ ବହନ କରୁଛି। ଓଡ଼ିଶା ଫୁଟବଲ ପାଇଁ ଏହା ଆମର ନୂଆ ଆରମ୍ଭ। ଏହାର ଏକ ଅଂଶବିଶେଷ ହୋଇଥିବାରୁ ମୁଁ ଅତ୍ୟନ୍ତ ଖୁସି। ପ୍ରଶଂସକମାନେ ଯେଉଁଠାକୁ ଗଲେ ମଧ୍ୟ ଆମର କିଟ୍ ପରିଧାନ କରି ନିଜକୁ ଗର୍ବିତ ମନେ କରିବେ ବୋଲି ଆଶା। ଅନ୍ୟପକ୍ଷରେ ”କିଟ୍ ଉନ୍ମୋଚନ କ୍ଲବ ପାଇଁ ସ୍ବତନ୍ତ୍ର ମାନ୍ୟତା ରଖିଥାଏ। ନୂଆ ଲୋଗୋ ଦଳକୁ ନୂଆ ପରିଚୟ ଦେଇଛି। କୋଚ୍ ଏବଂ ଖେଳାଳିମାନେ ଭୁବନେଶ୍ୱର ପରିବେଶ ସହିତ ଅଭ୍ୟସ୍ତ ହୋଇ ଯାଇଛନ୍ତି। ଏଠାରେ ଉପଲବ୍ଧ ଟ୍ରେନିଂ ସୁବିଧାରେ ସେମାନେ ବହୁତ ଖୁସି। ପଡ଼ିଆରେ ମଧ୍ୟ ଦଳ ପ୍ରଦର୍ଶନ କରି ଗୌରବ ଆଣିବ ବୋଲି ଆମର ଆଶା। ଓଡ଼ିଶାକୁ ଫୁଟବଲ ରାଜଧାନୀଭାବେ ଗଢ଼ିତୋଳିବାରେ ଏହି କ୍ଲବ ନିଶ୍ଚିତ ସହାୟକ ହେବ ବୋଲି ସିଇଓ ଆଶିଷ ପ୍ରକାଶ କରିଛନ୍ତି। ଓଡ଼ିଶା ସରକାରଙ୍କ ସହଯୋଗରେ ଅତ୍ୟନ୍ତ ଉତ୍ସାହିତ ହୋଇଛନ୍ତି କୋଚ୍ ଜୋସେପ୍ ଗାମ୍ବାଉ। ଏଠାରେ ପହଞ୍ଚତ୍ବା ପରଠାରୁ ଆମେ ପାଇଥିବା ଭିତ୍ତିଭୂମି, ସୁବିଧା ସୁଯୋଗ, ଆତିଥେୟତା ଏବଂ ପ୍ରଶଂସକଙ୍କ ସମର୍ଥନରେ ବହୁତ ଖୁସି। ଜର୍ସି ଉନ୍ମେଚନ ସହ ଏକ ନୂଆ ଆରମ୍ଭ ହେଲା। ଏବେ ଟିମ୍ ଆଗକୁ ବଢ଼ିବାକୁ ବ୍ୟଗ୍ର ବୋଲି ଗାମ୍ବାଉ କହିଛନ୍ତି। ପ୍ରକାଶ ଯୋଗ୍ୟ ଯେ, ପୂର୍ବରୁ ପୂର୍ବରୁ ଦିଲ୍ଲୀ ଡାଇନାମସ ନାମରେ ଖେଳୁଥିବା ଫ୍ରାଞ୍ଚାଇଜ୍ ଗତ ଅଗଷ୍ଟ ୩୧ରେ ଓଡ଼ିଶା ସରକାରଙ୍କ ସହ ବୁଝାମଣାପତ୍ରରେ ସ୍ବାକ୍ଷର କରିବାପରେ ଓଡ଼ିଶା ଏଫସିରେ ପରିଣତ ହୋଇଥିଲା।