ନୂଆଦିଲ୍ଲୀ, ୧୯।୧୨ (ପି.ଟି.)-ଡିଡିଏ ସ୍ପୋର୍ଟସ କମ୍ପ୍ଲେକ୍ସରେ ଚାଲିଥିବା ଜାତୀୟ ମହିଳା ଦୃଷ୍ଟିହୀନ ଟି୨୦ କ୍ରିକେଟ୍ ଟୁର୍ନାମେଣ୍ଟର ପ୍ରଥମ ସଂସ୍କରଣର ଫାଇନାଲ ଲାଇନ୍ ଅପ୍ ଚୂଡ଼ାନ୍ତ ହୋଇଛି। ଗୁରୁବାର ଫାଇନାଲରେ କର୍ନାଟକୁ ଭେଟିବ ଓଡ଼ିଶା। ଗ୍ରୁପ୍-ଏ’ରେ କର୍ନାଟକ ଏହାର ୩ଟି ଯାକ ମ୍ୟାଚ୍ ଜିତି ୯ ପଏଣ୍ଟ ସହ ଶୀର୍ଷରେ ରହି ଫାଇନାଲକୁ ଯୋଗ୍ୟତା ହାସଲ କରିଥିଲା। ଅପରପକ୍ଷରେ ଗ୍ରୁପ୍-ବି’ରେ ଓଡ଼ିଶା ମଧ୍ୟ ଶୀର୍ଷରେ ରହି ଫାଇନାଲରେ ପ୍ରବେଶ କରିଛି। ବୁଧବାର ଅନୁଷ୍ଠିତ ମ୍ୟାଚ୍ରେ କର୍ନାଟକ ୧୦ ଉଇକେଟ୍ରେ ପଶ୍ଚିମବଙ୍ଗ ବିପକ୍ଷରେ ବୃହତ୍ ବିଜୟ ହାସଲ କରିଥିଲା। ପ୍ରଥମେ ବ୍ୟାଟିଂ କରି ପଶ୍ଚିମବଙ୍ଗ ୨୦ ଓଭରରେ ୩ ଉଇକେଟ୍ ହରାଇ ୧୦୧ ରନ କରିଥିଲା। ଜବାବରେ କର୍ନାଟକ ୧୦.୩ ଓଭରରେ କୌଣସି ଉଇକେଟ୍ ନ ହରାଇ ଲକ୍ଷ୍ୟ ହାସଲ କରିନେଇଥିଲା। ସେହିଭଳି ଅନ୍ୟ ଏକ ମ୍ୟାଚ୍ରେ ଓଡ଼ିଶା ୧୧୦ ରନର ବୃହତ୍ ବ୍ୟବଧାନରେ ମହାରାଷ୍ଟ୍ରକୁ ମାତ୍ ଦେଇଛି। ପ୍ରଥମେ ବ୍ୟାଟିଂ କରି ଓଡ଼ିଶା ମୁନୀ ପୂର୍ତ୍ତୀ (୮୯ ରନ, ୬୯ ବଲ) ଓ ବାସନ୍ତି ହାଁସଦା (୭୧ ରନ, ୫୮ ବଲ)ଙ୍କ ଅର୍ଦ୍ଧଶତକ ବଳରେ ୨୦ ଓଭରରେ କୌଣସି ଉଇକେଟ୍ ନ ହରାଇ ୨୪୨ ରନ କରିଥିଲା। ଜବାବରେ ମହାରାଷ୍ଟ୍ର ନିର୍ଦ୍ଧାରିତ ଓଭରରେ ୨ ଉଇକେଟ୍ ହରାଇ ୧୩୨ ରନ କରିବାକୁ ସକ୍ଷମ ହୋଇଥିଲା। ପୂର୍ବରୁ ଓଡ଼ିଶା ଏହାର ପ୍ରଥମ ମ୍ୟାଚ୍ରେ କେରଳକୁ ୧୮୦ ରନରେ ହରାଇଥିଲା।