ଭୁବନେଶ୍ୱର, ୨୧ା୨-କଟକ ଟାଙ୍ଗିସ୍ଥିତ ଡ୍ରିମ୍ସ ଗ୍ରାଉଣ୍ଡରେ ଚାଲିଥିବା ବେଙ୍ଗଲ ବିପକ୍ଷ ରଣଜୀ ଟ୍ରଫି କ୍ୱାର୍ଟର ଫାଇନାଲରେ ପ୍ରଥମ ଶ୍ରେଣୀ କ୍ରିକେଟ କ୍ୟାରିୟର ଆରମ୍ଭ କରିଛନ୍ତି ପ୍ରୀତ୍ କନଓ୍ବର ସିଂ ଚୌହାନ। କେବଳ କ୍ୟାରିୟର ଆରମ୍ଭ କରିନାହାନ୍ତି, ନିଜ ପ୍ରଥମ ଓଭରରେ ଉଇକେଟ ହାସଲ କରି ଉଜ୍ଜ୍ୱଳ ଭବିଷ୍ୟତର ସୂଚନା ଦେଇଛନ୍ତି ଏହି ପ୍ରତିଭା ସମ୍ପନ୍ନ ଦ୍ରୁତ ବୋଲର। ପ୍ରୀତ୍ ପ୍ରଥମ ଓଭରର ଦ୍ୱିତୀୟ ବଲ୍ରେ ଅର୍ନବ ନନ୍ଦିଙ୍କୁ ଏବଂ ଓଡ଼ିଶା ପାଇଁ ବ୍ରେକ୍ ଥ୍ରୁ ଆବଶ୍ୟକ ଥିବାବେଳେ ଶ୍ରୀବତ୍ସ ଗୋସ୍ବାମୀଙ୍କୁ ଆଉଟ କରିଥିଲେ। ସେ ପ୍ରଥମ ଦିବସରେ ୫୨ ରନ ବିନିମୟରେ ୨ଟି ଉଇକେଟ ନେଇଛନ୍ତି। ପ୍ରୀତଙ୍କ ପିତା ଗୁରଜିତ୍ ସିଂ ଚୌହାନ ୮୦ ଦଶକ ପ୍ରାରମ୍ଭରେ ଓଡ଼ିଶା ପକ୍ଷରୁ ୨ଟି ପ୍ରଥମଶ୍ରେଣୀ କ୍ରିକେଟ ମ୍ୟାଚ ଖେଳିଛନ୍ତି। ଓଡ଼ିଶା କ୍ରିକେଟରେ ଦ୍ୱିତୀୟ ପିତାପୁତ୍ର ଭାବେ ଗୁରଜିତ-ପ୍ରୀତ୍ ଓଡ଼ିଶା ପକ୍ଷରୁ ପ୍ରତିନିଧିତ୍ୱ କରିଛନ୍ତି। ପୂର୍ବରୁ ମଦନ ମୋହନ ମହାନ୍ତି ଓ ଯଶପାଲ ମହାନ୍ତି ଏହି କ୍ଲବର ସଦସ୍ୟ ଥିଲେ।