ଭୁବନେଶ୍ୱର,୨୨।୯ (ବ୍ୟୁରୋ): ବିକାଶର ନଭଶ୍ଚୁମ୍ବୀ ସୋପାନରେ ଆଜିବି କବି ଓ ସାହିତି୍ୟକଙ୍କ ଲେଖାର ମର୍ଯ୍ୟାଦା ରହିଛି। ବିଭିନ୍ନ ସମୟରେ ସେହି ଲେଖାଗୁଡିକ ବୈଜ୍ଞାନିକ ଅଭିସନ୍ଧିର ମୂଳକାରଣ। ଉଦ୍ଭାବନାର ନୂତନ ଦିଗଦର୍ଶନ କରିଥାଏ। ଓଡ଼ିଶା ହେଉଛି କଳା ଓ କାରୁକାର୍ଯ୍ୟର ମାଟି। ଏଠାରେ ଅନେକ ଯଶସ୍ବୀ ସାହିତି୍ୟକ, କବି ଓ କବିତା ସୃଷ୍ଟି ହୋଇ ସାହିତ୍ୟ ଆକାଶକୁ ରୁଦ୍ଧିମନ୍ଥ କରିଛନ୍ତି ବୋଲି ରାଜ୍ୟପାଳ ପ୍ରଫେସର ଗଣେଶୀ ଲାଲ ମତବ୍ୟକ୍ତ କରିଥିଲେ।
ସ୍ଥାନୀୟ ଏକ ହୋଟେଲରେ ଶନିବାର ଦ ନ୍ୟୁ ଇଣ୍ଡିଆନ ଏକ୍ସପ୍ରେସ ପକ୍ଷରୁ ଆୟୋଜିତ କଳିଙ୍ଗ ଲିଟେରାରି ଫେଷ୍ଟିଭାଲ କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଯୋଗଦେଇ ରାଜ୍ୟପାଳ ଏହା କହିଥିଲେ। ଦେଶର ଜାତୀୟ ପତାକା ଉତ୍ତୋଳନ କରିବାର ମହାନ କାର୍ଯ୍ୟ ଜଣେ କବି କିମ୍ବା ନିଷ୍ପାପ ଶିଶୁ ଦ୍ବାରା ହେବା ଦରକାର। କାରଣ କବିର କବିତା ଓ ଶିଶୁର ମନରେ ମଳିନତା ନ ଥାଏ। କବିର କବିତା ହେଉଛି ମହାକାଶଠାରୁ ବ୍ୟାପ୍ତ ଏବଂ ସମୁଦ୍ରଠାରୁ ଗଭୀର। କବି ତା’ର ନିଜର ସୃଷ୍ଟିର ସ୍ରଷ୍ଟା। କେତେବେଳେ ସେ କେଉଁ ଚରିତ୍ରକୁ ଜୀବନ୍ୟାସ ଦେଇଥାଏ, ତା’ର ଠିକଣା ନ ଥାଏ। କବି ନିଜ ଚିନ୍ତାଧାରାରେ ସାଧାରଣକୁ ଅସାଧାରଣ ଭାବେ ପରିପ୍ରକାଶ କରିଥାଏ। ତେଣୁ କବି ବା ସାହିତି୍ୟକଙ୍କୁ ଦ୍ବିତୀୟ ବ୍ରହ୍ମା ଭାବେ ଭାରତୀୟ ସମାଜ ସବୁବେଳେ ପୂଜା କରି ଆସିଛି ବୋଲି ରାଜ୍ୟପାଳ ଲାଲ କହିଥିଲେ।
କାର୍ଯ୍ୟକ୍ରମରେ ମୁଖ୍ୟବକ୍ତା ଭାବେ ଖ୍ୟାତ ନାମା ଲେଖକ ପଦ୍ମଶ୍ରୀ ଜୟନ୍ତ ମହାପାତ୍ର ଯୋଗଦେଇ କହିଥିଲେ, କବିର କବିତା ତା’ ନିଜର ନିଜତ୍ୱକୁ ପରିପ୍ରକାଶ କରେ। କବିତା ହେଉଛି ଅନୁଭବର କାହାଣୀ। ରାଜ୍ୟରେ ଅନେକ ମହାନ କବି ଏବଂ ସାହିତି୍ୟକ ସେମାନଙ୍କର ନିଜସ୍ବ କାହାଣୀ ଓ ଅନୁଭୂତିକୁ ନିଜର ଲେଖାରେ ସ୍ଥାନ ଦେଇ ପ୍ରସିଦ୍ଧି ଲାଭ କରିଛନ୍ତି। କବିର କବିତା ରସପୂର୍ଣ୍ଣ , ବିରହ ଓ ବେଦନା ଭରା। ଦରଦଭରା ହୃଦୟ ନ ଥିଲେ ଜଣେ କବି ବା ଲେଖକ ହୋଇପାରିବ ନାହଁି ବୋଲି ମହାପାତ୍ର କହିଥିଲେ। ଦ ନ୍ୟୁ ଇଣ୍ଡିଆନ ଏକ୍ସପ୍ରେସର ଏଡିଟୋରିଆଲ ଡାଇରେକ୍ଟର ପ୍ରଭୁ ଚାୱଲାଙ୍କ ଅଧ୍ୟକ୍ଷତାରେ ଆୟୋଜିତ ଲିଟେରାରୀ ପେଷ୍ଟିଭାଲର ପ୍ରଥମ ଅଧିବେଶନ ୪ଟି ସୋପାନରେ ଶେଷ ହୋଇଥିଲା। କାର୍ଯ୍ୟକ୍ରମରେ ପ୍ରଫେସର ଯତୀନ ନାୟକ, ଖ୍ୟାତନାମା ଅଭିନେତ୍ରୀ ନନ୍ଦୀତା ଦାସ ପ୍ରମୁଖ ଯୋଗଦେଇଥିଲେ।
