ଅଦମ୍ୟ ବିଶ୍ୱାସ ଏବଂ ପ୍ରଗାଢ଼ ଚେଷ୍ଟା ବଳରେ ନିଜର ସ୍ବପ୍ନକୁ ସାକାର କରିହୁଏ। ଗୋଟିଏ ପଟେ ଶିକ୍ଷାଦାନ ଅନ୍ୟପଟେ ଓଡ଼ିଶୀ ନୃତ୍ୟରେ ନିଜର ଦକ୍ଷତା ପ୍ରତିପାଦନ କରାଇବାରେ ସଫଳ ହୋଇଛନ୍ତି ମନୀଷା ମନସ୍ବିନୀ। ଛୋଟବେଳେ ବିଶେଷ କିଛି ସ୍ବପ୍ନ ନ ଥିଲା। ଖେଳକୁଦରେ ସମୟ କଟି ଯାଉଥିଲା। ବିଶ୍ୱସୁନ୍ଦରୀ ପ୍ରତିଯୋଗିତାରେ ଭାଗନେବାକୁ ମଧ୍ୟ ତାଙ୍କର ଇଚ୍ଛା ଥିଲା। ଏ ସମ୍ପର୍କରେ ମନୀଷା କହନ୍ତି, ‘ମାଧୁରୀଙ୍କ ନାଚ ମୋତେ ବହୁତ ଭଲ ଲାଗେ। ପିଲାବେଳେ ତାଙ୍କ ନାଚ ଦେଖି ଟିଭି ସାମ୍ନାରେ ନାଚେ। ଅବିକଳ ନକଲ କରିବାକୁ ଚେଷ୍ଟା କରେ। ନାଚରେ ଆଗ୍ରହ ଦେଖି ମୋ ପାପା ମାମା ମୋତେ ଓଡିଶୀ ଶିଖାଇବା ପାଇଁ ନିଷ୍ପତ୍ତି ନେଲେ। ୪/୫ ବର୍ଷ ବୟସରେ ଓଡିଶା ଡ୍ୟାନ୍ସ ଏକାଡେମୀରେ ନାଚ ଶିଖିବା ଆରମ୍ଭ କରିଥିଲି। ଦଳଗତ ନୃତ୍ୟ ୫ ବର୍ଷ ବୟସରେ କରିଥିଲି। କିନ୍ତୁ ଷ୍ଟେଜ୍ରେ ଏକକ ନୃତ୍ୟ ୬ ବର୍ଷ ବୟସରେ କରିଥିଲି। ମୁଁ ଗାନ୍ଧୀନଗର ନ୍ୟାଶନାଲ ଲ’ ୟୁନିଭର୍ସିଟିରୁ ଏଲ୍ଏଲ୍ଏମ୍ କରିଛି। ଆଇପିଆର୍ (ଇଣ୍ଟେଲେକ୍ଚୁଆଲ୍ ପ୍ରପର୍ଟି ରାଇଟ୍ସ)ରେ ସ୍ପେସିଆଲାଇଜେଶନ୍ କରିଛି। ବର୍ତ୍ତମାନ ଭୁବନେଶ୍ୱରସ୍ଥ କିଟ୍ ଲ’ ସ୍କୁଲରେ ଅଧ୍ୟାପିକା ଅଛି। ଓଡିଶୀ ମୋର ଜୀବନ ଏବଂ ଅଧ୍ୟାପନା ଜୀବିକା। ଉଭୟକୁ ମୁଁ ବହୁତ ଭଲ ପାଏ। ବିଶେଷକରି ଛୋଟପିଲାଙ୍କୁ ଓଡ଼ିଶୀ ଶିଖାଇବା ସମୟରେ ମୋତେ ଯେଉଁ ଆତ୍ମତୃପ୍ତି ମିଳେ, ତାହା ମୁଁ ବର୍ଣ୍ଣନା କରିପାରିବି ନାହିଁ। ମୋଟ୍ ଉପରେ କହିବାକୁ ଗଲେ, ଓଡିଶୀ ନୃତ୍ୟ ମୋର ପ୍ରାଣ, ଜୀବନ ଓ ନିଶା। ଓଡ଼ିଶୀ ମୋତେ ବହୁତ ନାମ, ଯଶ, ସମ୍ମାନ ଏବଂ ଖ୍ୟାତି ଆଣି ଦେଇଛି। ଦର୍ଶକଙ୍କ କରତାଳି ଏବଂ ପ୍ରଶଂସା ଯେଉଁ ଆତ୍ମତୃପ୍ତି ଆଣିଦିଏ ତାହା ଭାଷାରେ ପ୍ରକାଶ କରିବା ଅସମ୍ଭବ। ଏହାବ୍ୟତୀତ ନୂଆ ନୂଆ ଜାଗା ଦେଖିବାକୁ ଭଲପାଏ। ସମୟ ମିଳିଲେ ପରିବାର ସହ ବୁଲିବାକୁ ଯାଏ। ରୋଷେଇ କରିବାକୁ ବହୁତ ଭଲପାଏ। ହେଲେ ଓଡ଼ିଶୀ ନୃତ୍ୟର ପ୍ରଚାର ଏବଂ ପ୍ରସାର ମୋର ପ୍ରଧାନ ଲକ୍ଷ୍ୟ।’ ଭୁବନେଶ୍ୱର ଜାଭିୟର ସ୍କୋୟାର ନିକଟସ୍ଥ ଏଲଆଇସି ନଗରରେ ରହୁଥିବା ଶାରଦା ପ୍ରସାଦ ସାମନ୍ତରାୟ ଏବଂ ନିବେଦିତା ସାମନ୍ତରାୟଙ୍କ ଏହି କନ୍ୟା ଏବେ ନିଜ ସ୍କୁଲ ‘ଆତ୍ମନ୍’ ମାଧ୍ୟମରେ ଗରିବ ଏବଂ ଅବହେଳିତ ପିଲାମାନଙ୍କୁ ମଧ୍ୟ ଶିକ୍ଷାଦାନରେ ନିଜକୁ ନିୟୋଜିିତ ରଖିଛନ୍ତିି। ସୁଯୋଗ ମିଳିଲେ ରାଜ୍ୟ ଏବଂ ଦେଶ ବାହାରେ ଓ୍ବାର୍କଶପ୍ ଏବଂ ସେମିନାର ମାଧ୍ୟମରେ ପ୍ରଚାର ପ୍ରସାର କରିବାର ଇଚ୍ଛା ରଖିଛି। କେବଳ ଓଡ଼ିଶା ନୁହେଁ, ଭାରତର ବିଭିନ୍ନ ସ୍ଥାନରେ ଏପରି କି ବିଦେଶରେ ମଧ୍ୟ ଓଡ଼ିଶୀ ନୃତ୍ୟ ପରିବେଷଣ କରି ମନୀଷା ସାଉଣ୍ଟିଛନ୍ତି ଅନେକ ପ୍ରଶଂସା। ଓଡ଼ିଶୀ ନୃତ୍ୟର ପ୍ରଚାର ପ୍ରସାର ପାଇଁ ଏହି ଓଡ଼ିଶୀ ନୃତ୍ୟାଙ୍ଗନା କେତେ ପ୍ରତିଶ୍ରୁତିବଦ୍ଧ ତାହା ତାଙ୍କ ଚେଷ୍ଟାରୁ ସ୍ପଷ୍ଟ ବାରିହୋଇପଡ଼ିଥାଏ।