ବଡବିଲ, ୧ା୪(ସ୍ବ.ପ୍ର.)-କେନ୍ଦୁଝର ଜିଲା ବଡବିଲ ପୌରାଞ୍ଚଳ ଝାଡଖଣ୍ଡ ରାଜ୍ୟ ସୀମାରେଖାକୁ ଲାଗି ରହିଛି। ରାଜ୍ୟର ବଡବିଲ ପୌରାଞ୍ଚଳର ୱାର୍ଡ ନଂ.୧ସ୍ଥିତ ନାଲଦା ଅଞ୍ଚଳ ଭିତରକୁ ସୋମବାର ଝାଡଖଣ୍ଡ ପୋଲିସ ପଶି ଟେଣ୍ଟ ବାନ୍ଧୁଥିବା ବେଳେ ବିରୋଧ ହୋଇଥିଲା। ସ୍ଥାନୀୟ ପ୍ରଶାସନ ପହଞ୍ଚି ଝାଡଖଣ୍ଡ ପୋଲିସକୁ ଝାଡଖଣ୍ଡ ରାଜ୍ୟ ସୀମାକୁ ଚାଲିଯିବାକୁ କହିବା ପରେ ଝାଡଖଣ୍ଡ ପୋଲିସ ନିଜ ସୀମାରେଖାକୁ ଚାଲିଯାଇଥିବା ଦେଖାଯାଇଛି।
ଉଭୟ ରାଜ୍ୟ ସୀମାକୁ ପୋଲିସ ସିଲ୍ କରି ସଜାଗ ରହିଛି। ସୋମବାର ରାତିରେ ଓଡିଶାରୁ ୩୯ଜଣ ଶ୍ରମିକ ଚାଲି ଚାଲି ପଶ୍ଚିମବଙ୍ଗର ମୁର୍ଶିଦାବାଦ ଅଞ୍ଚଳକୁ ଯାଉଥିବା ବେଳେ ପୋଲିସ ସେମାନଙ୍କୁ ଅଟକାଇ ଭୁଷୁଗାଁ ଉଚ୍ଚ ପ୍ରାଥମିକ ବିଦ୍ୟାଳୟସ୍ଥିତ କ୍ୱାରାଣ୍ଟାଇନରେ ରଖିଛି। ହେଲେ ସେଠାରେ ଘର ବାରଣ୍ଡା ଓ ଖୋଲା ପଡିଆରେ ଶ୍ରମିକମାନଙ୍କୁ ଆଶ୍ରୟ ନେବାକୁ କୁହାଯିବାରୁ ସେମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଫଳରେ ନିଜେ ଧରିଥିବା ଜରି ପକାଇ କେତେକ ଶ୍ରମିକ ଶୋଇଥିଲା ବେଳେ ଆଉ କେତେକ ଖୋଲା ପଡିଆରେ ଶୋଇଥିବା ଦେଖିବାକୁ ମିଳିଥିଲା। ମଙ୍ଗଳବାର ଭୋର ସମୟରେ ସେଠାରୁ କେତେକ ଶ୍ରମିକ ପଳାୟନ କରିଥିବା କୁହାଯାଉଛି। ତେବେ ଉକ୍ତ କ୍ୱାରାଣ୍ଟାଇନ ସେଣ୍ଟରରେ ବିଛଣା, ଚାଦର, ତକିଆ, ପାନୀୟଜଳ ଆଦି ସୁବିଧା ନ ଥିବା ବେଳେ ଅଟକ ଥିବା ଶ୍ରମିକମାନଙ୍କ ମଧ୍ୟରେ ସାମାଜିକ ଦୂରତା ନିମନ୍ତେ କୌଣସି ସୁବିଧା ନ ଥିବାରୁ ଶ୍ରମିକମାନେ ଅସନ୍ତୋଷ ବ୍ୟକ୍ତ କରିଛନ୍ତି। ସେମାନେ ଘରମୁହାଁ ହୋଇଥିବାରୁ ଖାଇବାକୁ ମନା କରି ଘରକୁ ଯିବାକୁ ଜିଦ୍ ଧରିଛନ୍ତି। ଘରକୁ ଚାଲି ଚାଲି ଯିବା ନିମନ୍ତେ ସେମାନେ ସରକାରଙ୍କୁ ଅନୁମତି ମାଗିଛନ୍ତି। ସେହିପରି ମଙ୍ଗଳବାର ଭୋର ସମୟରେ କଟକରୁ ୪୦ଜଣ ଶ୍ରମିକ ଝାଡଖଣ୍ଡ ରାଜ୍ୟର ବିଭିନ୍ନ ଅଞ୍ଚଳ ଓ ପଶ୍ଚିମବଙ୍ଗର ମୁର୍ଶିଦାବାଦ ଅଞ୍ଚଳକୁ ଚାଲି ଚାଲି ଯାଉଥିବା ବେଳେ ପୋଲିସ ସେମାନଙ୍କ ଅଟକାଇ ଭଦ୍ରାସାହି ପଞ୍ଚାୟତର ନାଲଦା ହାଇସ୍କୁଲ କ୍ୱାରାଣ୍ଟାଇନ ସେଣ୍ଟରରେ ଆଣି ରଖିଛି। ତେବେ ସେଠାରେ ଫ୍ୟାନ ଥିଲେ ମଧ୍ୟ ଆଲୋକ ବ୍ୟବସ୍ଥା ନ ଥିବାରୁ ରହିବା କଷ୍ଟକର ବୋଲି ଶ୍ରମିକମାନେ କହିଛନ୍ତି।