![](https://www.dharitri.com/wp-content/uploads/2020/02/4-17-1568x912.jpg)
ବ୍ରହ୍ମପୁର ଅଫିସ,୮ା୨-ଦକ୍ଷତା ବିକାଶରେ ବ୍ରହ୍ମପୁର ଆଇଟିଆଇ ସାରା ବିଶ୍ୱରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛି। ଏହା ରାଜ୍ୟର ଅନ୍ୟ ଆଇଟିଆଇ ଓ ବୈଷୟିକ ଅନୁଷ୍ଠାନ ପାଇଁ ଦକ୍ଷତା ବିକାଶର ସ୍ବାଭିମାନ, ଆଦର୍ଶର ଏକ ଜ୍ୱଳନ୍ତ ଉଦାହରଣ ପାଲଟିଛି ବୋଲି ରାଜ୍ୟ ଦକ୍ଷତା ବିକାଶ କର୍ତ୍ତୃପକ୍ଷ ଅଧ୍ୟକ୍ଷ ସୁବ୍ରତ କୁମାର ବାଗ୍ଚି କହିଛନ୍ତି। ଶୁକ୍ରବାର ବ୍ରହ୍ମପୁର ଆଇଟିଆଇ ପରିସରରେ ‘ମାଇଣ୍ଡ, ହାର୍ଟ ଆଣ୍ଡ୍ ହ୍ୟାଣ୍ଡସ୍ ଶୋ’ ନାମରେ ନାମିତ ଓପୋନ୍ ସ୍କ୍ରାପ୍ ମ୍ୟୁଜିୟମ ଲୋକାର୍ପଣ ଉତ୍ସବରେ ବାଗ୍ଚି ଏହା କହିଛନ୍ତି। ସେ ଆହୁରି କହିଛନ୍ତି, ଅନୁଷ୍ଠାନର ଛାତ୍ରୀଛାତ୍ରଙ୍କ ଦ୍ୱାରା ପ୍ରସ୍ତୁତ ମେଟାଲ ସ୍କ୍ରାପ୍ର ବିଭିନ୍ନ ମଡେଲ ସମସ୍ତ ଅନୁଷ୍ଠାନର ଛାତ୍ରୀଛାତ୍ରଙ୍କୁ ଦକ୍ଷତାର ବିକାଶ ପାଇଁ ପ୍ରେରଣା ଯୋଗାଇବ। ଆଗାମୀ ଦିନରେ ଆଇଟିଆଇରେ ଛାତ୍ରୀଛାତ୍ରଙ୍କ ଦକ୍ଷତା ବିକାଶ ପାଇଁ ଏକ ସେଣ୍ଟର ଅଫ୍ ଏକ୍ସଲେନ୍ସି ସ୍ଥାପନ କରାଯିବା ଯୋଜନା ହୋଇଛି। ବିଭିନ୍ନ ଟ୍ରେଡର ଛାତ୍ରୀଛାତ୍ରଙ୍କ ସହ ମଡେଲ ସମ୍ପର୍କରେ ଆଲୋଚନା କରିବା ସହ ଅନୁଷ୍ଠାନରେ କ୍ୟାମ୍ପସ ଚୟନରେ ୩୩ ପ୍ରତିଶତ ଛାତ୍ରୀଙ୍କୁ ଚୟନ କରିବା ଦିଗରେ ପଦକ୍ଷେପ ଗ୍ରହଣ କରିବାକୁ ବାଗ୍ଚି ଘୋଷଣା କରିଥିଲେ। ଲୋକାର୍ପଣ ଉସତ୍ବରେ ଅନ୍ୟମାନଙ୍କ ମଧ୍ୟରେ ଟାଟା ଆଡଭାନ୍ସ ସିଷ୍ଟମସ୍ ଲିମିଟେଡର ସିଇଓ ତଥା ମୁଖ୍ୟ ମସୁଦ ହୁସେନି, ଦକ୍ଷତା ବିକାଶ ଓ ବୈଷୟିକ ଶିକ୍ଷାର କମିଶନର ତଥା ସଚିବ ସଞ୍ଜୟ କୁମାର ସିଂ, ଟାଟାର ଟେକ୍ନିକାଲ ତାଲିମ ମୁଖ୍ୟ କେ.କେ ଗୁପ୍ତା, ଏମ୍ପ୍ଲଏମେଣ୍ଟର ନିର୍ଦ୍ଦେଶିକା ରଶ୍ମିତା ପଣ୍ଡା, ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ, ବିଏମ୍ସି କମିଶନର ଚକ୍ରବର୍ତ୍ତୀ ସିଂ ରାଠୋର, ଟେକ୍ନିକାଲ ଏଜୁକେଶନର ଡାଇରେକ୍ଟର ରଘୁ ଜୀ, ବ୍ରହ୍ମପୁର ଉପଜିଲାପାଳ ସିନ୍ଧେ ଦତ୍ତାତ୍ରୟ ଭାଉସାହେବ, ଆଇଟିଆଇର ଅଧ୍ୟକ୍ଷ ଡ. ରଜତ କୁମାର ପାଣିଗ୍ରାହୀ ପ୍ରମୁଖ ଉପସ୍ଥିତ ଥିଲେ।
ଓପନ ମୁଜିୟମରେ ଛାତ୍ରୀଛାତ୍ରଙ୍କ ଦ୍ୱାରା ସ୍କାର୍ପରେ ପ୍ରସ୍ତୁତ ୭ରୁ ୭୦ ଫୁଟରୁ ଉର୍ଦ୍ଧ୍ୱ ପର୍ଯ୍ୟନ୍ତ ଉଚ୍ଚର ୨୦ଟି ବିଭିନ୍ନ ମଡେଲ ସ୍ଥାନିତ ହୋଇଛି। ସେଥିମଧ୍ୟରେ ୭୩ ଫୁଟ ଉଚ୍ଚର ଗିଟାର, ୨୨ ଫୁଟ ୮ ଇଞ୍ଚ ଉଚ୍ଚର ବଂଶୀକଣ୍ଟା ମାଛ, ୩୨ ଫୁଟ ଉଚ୍ଚର ଜିରାଫ କଳାକୃତି ଉଭୟ ଇଣ୍ଡିଆ ବୁକ ଅଫ ରେକର୍ଡ ଓ ଏସିଆ ବୁକ ଅଫ ରେକର୍ଡରେ ସ୍ଥାନ ପାଇଛି। ଏହାବ୍ୟତୀତ ମ୍ୟୁଜିୟମ ମଧ୍ୟରେ ସରକାରଙ୍କ ସୁଦକ୍ଷା ଯୋଜନାରେ ଛାତ୍ରୀମାନଙ୍କ ଦକ୍ଷତା ବିକାଶ ପାଇଁ ରହିଥିବା ବିିଭିନ୍ନ ଯୋଜନା ସମ୍ପର୍କରେ ଏକ ସୁଦକ୍ଷା ରଥ ମଧ୍ୟ ସ୍ଥାନିତ ହୋଇଛି। ସେହିପରି ୨୮ ଫୁଟ ଉଚ୍ଚର ପ୍ରେଡିଏଟର, ୨୨ ଫୁଟ ୩ ଇଞ୍ଚର ଆଇରନ ମ୍ୟାନ, ୬ ଫୁଟ ଉଚ୍ଚର ଟର୍ମିନେଟର, ୧୮ ଫୁଟ ଉଚ୍ଚର ଡଲଫିନ୍, ଅଲିଭରିଡଲେ କଳାକୃତି, ୮ ଫୁଟ ଉଚ୍ଚ ଓ ୧୭ ଫୁଟ ଲମ୍ବର ହେଲିକପ୍ଟର, ୯ ଫୁଟର ଚେତକ, ୧୩ ଫୁଟ ଉଚ୍ଚର ପ୍ରେଡିଏଟର, ୧୬ ଫୁଟ ଉଚ୍ଚର ହରିଣ ସହ ୬ ଫୁଟର ରୋବର୍ଟ, ୧୭ ଫୁଟର ରେଇଣ୍ଡର, ୨୨ ଫୁଟ ଲମ୍ବର ଝିଟିପିଟି, ୧୩ ଫୁଟ ଉଚ୍ଚତାର ମୟୂର, ୩ଡି ଆର୍ଟର ଗାଈ, ୧୫ ଫୁଟ ଉଚ୍ଚର କିଙ୍ଗକଙ୍ଗ୍, ଯୁଦ୍ଧ ଟ୍ୟାଙ୍କ୍ ପ୍ରମୁଖ କଳାକୃତି ପ୍ରଦର୍ଶିତ ହୋଇଛି। ଏହି ମ୍ୟୁଜିୟମ ସାରା ରାଜ୍ୟର ବୈଷୟିକ ତାଲିମ ଅନୁଷ୍ଠାନର ଛାତ୍ରୀଛାତ୍ରଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିବା ନେଇ ଅଧ୍ୟକ୍ଷ ଡ. ପାଣିଗ୍ରାହୀ କହିଛନ୍ତି।