ନୂଆଗାଁ,୧୧।୩ (ଡି.ଏନ୍.ଏ): ନୟାଗଡ଼ ଜିଲା ନୂଆଗାଁ ବ୍ଲକ ଡିମିରିଝରୀ ଗ୍ରାମ ନିକଟ ଖୋର୍ଦ୍ଧା- ବଲାଙ୍ଗୀର ୫୭ ନମ୍ବର ଜାତୀୟ ରାଜପଥରେ ମଙ୍ଗଳବାର ବିଳମ୍ବିତ ରାତିରେ ଏକ ତୀର୍ଥଯାତ୍ରୀ ବସ୍ ଓଲଟି ପଡ଼ିଛି। ଫଳରେ ବସ୍ରେ ଥିବା ୪୧ ଯାତ୍ରୀଙ୍କ ମଧ୍ୟରୁ ୧୯ ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୩ ଜଣ ଗୁରୁତର ଥିବା ଜଣାପଡ଼ିଛି।
ପ୍ରକାଶ ଯେ, ଘରୋଇ ବସ୍ ଚନ୍ଦନ (ନଂ. ସିଜି ୧୧ ଡିବି ୨୬୭୬) ଗୁରୁବାର ଛତିଶଗଡ଼ ଜିଲା ନୋୟାଗଡ଼ ଗ୍ରାମର ୪୧ ଯାତ୍ରୀଙ୍କୁ ନେଇ ପୁରୀ, କୋଣାର୍କ ଆଦି ତୀର୍ଥ ସ୍ଥାନ ଦର୍ଶନ ପାଇଁ ବାହାରିଥିଲା। ଯାତ୍ରୀମାନେ ଦର୍ଶନସାରି ମଙ୍ଗଳବାର ଗ୍ରାମକୁ ଫେରୁଥିବା ବେଳେ ନୂଆଗଁା ବ୍ଲକ ଡିମିରିଝରୀଠାରେ ବସ୍ଟି ଭାରସାମ୍ୟ ହରାଇ ରାଜପଥ କଡ଼କୁ ଓଲଟି ପଡ଼ିଥିଲା। ଖବର ପାଇ ନୟାଗଡ଼ ଓ ନୂଆଗାଁ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚିି ସ୍ଥାନୀୟ ଲୋକଙ୍କ ସହାୟତାରେ ଆହତଙ୍କୁ ଉଦ୍ଧାରକରି ନୟାଗଡ଼ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ୩ ଜଣଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି। ବସ୍ରେ ଥିବା ଅନ୍ୟ ଯାତ୍ରୀମାନଙ୍କୁ ଡିମିରିଝରୀ ଗ୍ରାମବାସୀ ଡିମିରିଝରୀ ସ୍କୁଲ ଗୃହରେ ରଖିବା ସହିତ ସେମାନଙ୍କ ଘର ଲୋକଙ୍କ ସହ ଯୋଗାଯୋଗ କରୁଛନ୍ତି।
