କଟକ ଅଫିସ,୧।୮- ଓଡ଼ିଶା କ୍ରିକେଟ ଆସୋସିଏଶନ(ଓସିଏ)କୁ ପୂର୍ଣ୍ଣ ଅନୁମୋଦନ ମିଳିଛି, ଯାହା ଫଳରେ ଆଗାମୀ ଦିନରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ବିଭିନ୍ନ ଅନୁଦାନ ପାଇବା ପାଇଁ ବାଟ ଫିଟିଛି । ଦେଶର ୧୩ଟି କ୍ରିକେଟ ସଂଘକୁ ବିସିସିଆଇର କମିଟି ଅଫ ଆଡମିନିଷ୍ଟ୍ରେଟର(ସିଓଏ) ପୂର୍ଣ୍ଣ ଅନୁମୋଦନ ପ୍ରଦାନ କରିଥିବା ବେଳେ ଏହା ମଧ୍ୟରେ ଓସିଏ ସାମିଲ ଅଛି । ପୂର୍ଣ୍ଣ ଅନୁମୋଦନ ପାଇବା ନିମନ୍ତେ ଗୋଟିଏ ପାଦ ଦୂରରେ ଅଛୁ ବୋଲି ପୂର୍ବରୁ ଓସିଏ ପକ୍ଷରୁ ସୂଚନା ଦିଆଯାଇଥିଲା । ୯୯ ପ୍ରତିଶତ କାର୍ଯ୍ୟଧାରାକୁ ସିଓଏ ଅନୁମୋଦନ ପ୍ରଦାନ କରିଥିବା ବେଳେ ଗୋଟିଏ ପ୍ରତିଶତ ବାକି ରହିଥିଲା । ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ଲୋଧା କମିଟି ଦ୍ୱାରା ପ୍ରଣୀତ ନିୟମଧାରା ୪୪ ଏଯାଏ ପୂରଣ ହୋଇନି ବୋଲି ଓସିଏର ଜଣେ ଅଧିକାରୀ କହିଥିଲେ । ଏପରିକି ପୂର୍ଣ୍ଣ ଅନୁମୋଦନ ପାଇବା ପାଇଁ ପୂର୍ବରୁ ୬ ଥର ସିଓଏର ଦ୍ୱାରସ୍ଥ ହୋଇଛି ଓସିଏ । ଏବେ ଓସିଏର ଅଧିକାରୀମାନେ ଆଶ୍ୱସ୍ତ ହୋଇଛନ୍ତି। ଫନୀ ବାତ୍ୟାର କ୍ଷତିପୂରଣ ସମେତ ଅନ୍ୟ ସମସ୍ତ ଅନୁଦାନ ପାଇବାକୁ ଯୋଗ୍ୟତା ହାସଲ କରିଛି ଓସିଏ । ମାମଲା ସୁପ୍ରିମକୋର୍ଟରେ ବିଚାରାଧୀନ ଥିବାରୁ ଚୂଡ଼ାନ୍ତ ରାୟ ପ୍ରକାଶ ପାଇବା ପରେ ପୂର୍ଣ୍ଣ ଅନୁମୋଦନ ହାସଲ କରିଥିବା ସମସ୍ତ କ୍ରୀଡ଼ା ସଂଘ ଫାଇଦା ପାଇବେ ।
ବିହାରରୁ ଆସିବେ ନିର୍ବାଚନ ଅଧିକାରୀ
ଓସିଏର କର୍ମକର୍ତ୍ତା ନିର୍ବାଚନ ନିମନ୍ତେ କଣ୍ଟା ସାଜିଥିବା ନିର୍ବାଚନ ଅଧିକାରୀ ନିଯୁକ୍ତି ପ୍ରସଙ୍ଗ ସାମାନ୍ୟ ଟଳିଛି । ଓଡ଼ିଶାରୁ କୌଣସି ନିର୍ବାଚନ ଅଧିକାରୀ ନିଯୁକ୍ତ ନ କରାଯିବା ଫଳରେ ନିର୍ବାଚନ କରାଯିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଥିଲା । ସିଓଏର ପରାମର୍ଶ ଲୋଡାଯାଇ ପଡ଼ୋଶୀ ରାଜ୍ୟରୁ ନିର୍ବାଚନ ଅଧିକାରୀ ଅଣାଯିବାକୁ ନିଷ୍ପତ୍ତି ହୋଇଥିଲା । ପ୍ରାଥମିକ ସ୍ତରରେ ପଶ୍ଚିମବଙ୍ଗ, ବିହାର ଓ ଝାଡ଼ଖଣ୍ଡ ସହ ଯୋଗାଯୋଗ କରାଯାଇଥିଲା । ଉକ୍ତ ୩ ରାଜ୍ୟର ନିର୍ବାଚନ କମିଶନରଙ୍କୁ ଏ ନେଇ ଇ-ମେଲ କରାଯାଇଥିଲା ବୋଲି ଓସିଏ କାର୍ଯ୍ୟକାରୀ କମିଟି ଅଧ୍ୟକ୍ଷ ଧୀରେନ ପଲାଇ କହିଥିଲେ । ତେବେ ବିହାର ନିର୍ବାଚନ ଅଧିକାରୀ ପ୍ରଦାନ କରିବ ବୋଲି ସ୍ପଷ୍ଟ କରିଥିବା ଧୀରେନ କହିଛନ୍ତି । ସେମାନଙ୍କ ସହ ଯୋଗାଯୋଗ ଜାରି ରହିଛି । ଖୁବଶୀଘ୍ର ଏହି କାର୍ଯ୍ୟ ସମ୍ପନ୍ନ ହେବ ବୋଲି ସେ ପ୍ରକାଶ କରିଛନ୍ତି ।
ସଜାଡ଼ିବ ‘ଦେବ ମସ୍କୋ’, ଅର୍ଥ ଦେବ ବିସିସିଆଇ
କପିଳଦେବଙ୍କ କମ୍ପାନୀ ‘ଦେବ ମସ୍କୋ’ ଖୁବଶୀଘ୍ର କଟକରେ ପହଞ୍ଚିବ । ବାରବାଟୀ ଷ୍ଟାଡିୟମରେ ଫନୀ ବାତ୍ୟାରେ କ୍ଷୟକ୍ଷତି ହୋଇଥିବା ଫ୍ଲଡ ଲାଇଟ ସଜାଡ଼ିବାକୁ ଏହି କମ୍ପାନୀ ଆଗ୍ରହ ପ୍ରକାଶ କରିଛି । ମରାମତି କରାଯିବା ପୂର୍ବରୁ ସ୍ଥିତି ଅନୁଧ୍ୟାନ କରିବାକୁ କପିଳ ଦେବ ମଧ୍ୟ ଆସିବେ । ମରାମତି ଦାୟିତ୍ୱ ସମ୍ପୂର୍ଣ୍ଣ ଭାବେ କପିଳଙ୍କ କମ୍ପାନୀ ଦେବ ମସ୍କୋ ଉଠାଇବ। ହେଲେ ଏଥି ନିମନ୍ତେ ଯାହା ଖର୍ଚ୍ଚ ହେବ ତାହା ବିସିସିଆଇ ପକ୍ଷରୁ ସେମାନେ ଗ୍ରହଣ କରିବାକୁ ଆଲୋଚନା ହୋଇଛି ବୋଲି ଧୀରେନ କହିଛନ୍ତି । ସୂଚନା ଥାଉକି, ୨୦୦୩ ମସିହାରେ ବାରବାଟୀ ଷ୍ଟାଡିୟମରେ ଫ୍ଲଡଲାଇଟ ଉଦ୍ଘାଟନ ହୋଇଥିଲା। ୨୦୦୧ ମସିହାରୁ ଫ୍ଲଡ ଲାଇଟ ଲଗାଯିବା କାର୍ଯ୍ୟ ଆରମ୍ଭ ହୋଇଥିବା ବେଳେ ଏଥିରେ ୪ କୋଟି ଟଙ୍କା ଖର୍ଚ୍ଚ ହୋଇଥିଲା ।