ନୂଆଦିଲ୍ଲୀ, ୨୩।୭(ପି.ଟି.)- ସମ୍ମାନଜନକ ଓ୍ବାଲର୍ଡ ଲିଗ୍ସ ଫୋରମ(ଡବ୍ଲ୍ୟୁଏଲଏଫ)ରେ ସାମିଲ ହୋଇଛି ଇଣ୍ଡିଆନ ସୁପରଲିଗ୍ (ଆଇଏସଏଲ)। ପ୍ରିମିୟର ଲିଗ୍, ଲା ଲିଗା ଓ ବୁନ୍ଦେସଲିଗାପରି ପ୍ରଫେଶନାଲ ଫୁଟବଲ ଲିଗ୍ କ୍ଲବ ଗୁଡ଼ିକ ଏଥିରେ ପୂର୍ବରୁ ରହିଛନ୍ତି। ଦକ୍ଷିଣ ଏସିଆର ପ୍ରଥମ ଏବଂ ଏସିଆର ୭ମ ଲିଗ୍ଭାବେ ଆଇଏସଏଲ ଡବ୍ଲ୍ୟୁଏଲଏଫରେ ସାମିଲ ହୋଇଛି ବୋଲି ପ୍ରକାଶ କରାଯାଇଛି। ବର୍ତ୍ତମାନ ଡବ୍ଲ୍ୟୁଏଲଏଫରେ ୫ ମହାଦେଶର ପାଖାପାଖି ୧୨୦୦ କ୍ଲବ ସାମିଲ ଅଛନ୍ତି। ଏହା ଫୁଟବଲର ସର୍ବୋଚ୍ଚ ସଂସ୍ଥା ଫିଫା ସହିତ ମିଳିତଭାବେ ପ୍ରଫେଶନାଲ ଫୁଟବଲର ଉନ୍ନତି ପାଇଁ କାର୍ଯ୍ୟ କରୁଛି। ଓ୍ବାଲର୍ଡ ଲିଗ୍ ଫୋରମ ଟେବୁଲରେ ସ୍ଥାନ ପାଇବା ଏକ ବଡ଼ ସମ୍ମାନ ବୋଲି ଆଇଏସଏଲ ଆୟୋଜକ ଫୁଟବଲ ସ୍ପୋଟର୍ସ ଡେଭଲପମେଣ୍ଟ ଲିମିଟେଡର ପ୍ରତିଷ୍ଠାତା ତଥା ଚେୟାରପର୍ଶନ ନୀତା ଅମ୍ବାନୀ ପ୍ରକାଶ କରିଛନ୍ତି। ”ଡବ୍ଲ୍ୟୁଏଲଏଫର ସ୍ବୀକୃତି ବିଶ୍ୱସ୍ତରରେ ଭାରତୀୟ ଫୁଟବଲର ଉତ୍ଥାନକୁ ସୂଚାଉଛି। ଏଥିରେ ଆଇଏସଏଲର ବଡ଼ ଭୂମିକା ରହିଛି। ଆମେ ଡବ୍ଲ୍ୟୁଏଲଏଫ ସହ ମିଳିତଭାବେ କାର୍ଯ୍ୟ କରି ବିଶ୍ୱରେ ଏହି କ୍ରୀଡ଼ାର ଉନ୍ନତି ପାଇଁ କାର୍ଯ୍ୟ କରିବୁ“ ବୋଲି ସେ କହିଛନ୍ତି। ”ପ୍ରଫେଶନାଲ ଫୁଟବଲ ପରିବାରକୁ ଆଇଏସଏଲକୁ ସ୍ବାଗତ କରି ଆମେ ଖୁବ୍ ଆନନ୍ଦିତ। ନିକଟ ଅତୀତରେ ଆଇଏସଏଲ ଅନେକ ସଫଳତା ପାଇଛି। ଏହା ଏବେ ସେହି ଅଞ୍ଚଳରେ ଏକ ବଡ଼ ଲିଗ୍ରେ ପରିଣତ ହୋଇଛି“ ବୋଲି ଓ୍ବାଲର୍ଡ ଲିଗ୍ସ ଫୋରମର ସାଧାରଣ ସମ୍ପାଦକ ଜେରୋମି ପେର୍ଲେମୁଟର ପ୍ରକାଶ କରିଛନ୍ତି।