ଲଣ୍ଡନ, ୧୧।୭ (ଏଏଫ୍ପି)- ଏଠାରେ ଚାଲିଥିବା ଚଳିତ ବର୍ଷର ୩ୟ ଗ୍ରାଣ୍ଡସ୍ଲାମ ଓ୍ବିମ୍ବେଲଡନ ଓପନ୍ରେ ଚାରିଥରର ଚାମ୍ପିୟନ ସର୍ବିୟା ତାରକା ନୋଭାକ ଜୋକୋଭିଚ୍ଙ୍କ ସମେତ ସୁଇଜରଲାଣ୍ଡର ରୋଜର ଫେଡରର ଓ ସ୍ପେନର ରାଫାଲ ନାଡାଲ ସେମିଫାଇନାଲରେ ପ୍ରବେଶ କରିଛନ୍ତି। ବିଶ୍ୱର ଏକ ନମ୍ବର ଖେଳାଳି ତଥା ଟପ୍ ସିଡ୍ ଜୋକୋଭିଚ୍ ବୁଧବାର ଅନୁଷ୍ଠିତ ପୁରୁଷ ସିଙ୍ଗଲ୍ସ କ୍ୱାର୍ଟର ଫାଇନାଲ ମୁକାବିଲାରେ ୬-୪, ୬-୦, ୬-୨ ସିଧାସଳଖ ସେଟ୍ରେ ବେଲ୍ଜିୟମର ୨୧ତମ ସିଡ୍ ଡେଭିଡ୍ ଗୋଫିନ୍ଙ୍କୁ ପରାସ୍ତ କରିଥିଲେ। ଅଲ୍ଇଂଲଣ୍ଡ କ୍ଲବରେ ଜୋକୋଭିଚ୍ଙ୍କ ଏହା ୭୦ତମ ବିଜୟ ଥିବାବେଳେ ସେ ୯ମଥର ପାଇଁ ଏହି ସମ୍ମାନଜନକ ପ୍ରତିଯୋଗିତାର ସେମିଫାଇନାଲରେ ସ୍ଥାନ ପକ୍କା କରିବାରେ ସକ୍ଷମ ହୋଇଛନ୍ତି। ସେହିଭଳି ୪ଟି ଯାକ ଗ୍ରାଣ୍ଡସ୍ଲାମକୁ ମିଶାଇଲେ ଜୋକୋଭିଚ୍ ୩୬ଥର ପାଇଁ ଅନ୍ତିମ-୪ରେ ପହଞ୍ଚତ୍ଛନ୍ତି। ସ୍ପେନର ରବର୍ଟ ବୌସ୍ତିତା ଅଗଟ ଓ ଆର୍ଜେଣ୍ଟିନାର ଗୁଡିଓ ପେଲ୍ଲାଙ୍କ ମଧ୍ୟରେ ଖେଳାଯିବାକୁ ଥିବା ମ୍ୟାଚ୍ର ବିଜେତା ସେମିଫାଇନାଲରେ ଜୋକୋଭିଚ୍ଙ୍କୁ ଭେଟିବ। ସେହିଭଳି ପୁରୁଷ ସିଙ୍ଗଲ୍ସର ଅନ୍ୟ ଏକ କ୍ୱାର୍ଟର ଫାଇନାଲରେ ସୁଇଜରଲାଣ୍ଡ ତାରକା ରୋଜର ଫେଡ୍ରର ୪-୬, ୬-୧, ୬-୪, ୬-୪ ସେଟ୍ର ଜାପାନର କେଇ ନିଶିକୋରୀଙ୍କୁ ହରାଇ ସେମିଫାଇନାଲ ଟିକେଟ୍ ହାସଲ କରିଛନ୍ତି। ଏଥିସହ ୩୭ ବର୍ଷୀୟ ଫେଡ୍ରର ଓ୍ବିମ୍ବେଲଡନରେ ତାଙ୍କର ୧୦୦ତମ ବିଜୟ ଲାଭ କରିଛନ୍ତି। ଶୁକ୍ରବାର ହେବାକୁ ଥିବା ସେମିଫାଇନାଲରେ ଏକ ରୋମାଞ୍ଚକ ମୁକାବିଲ ଦେଖିବାକୁ ମିଳିବ। ଫେଡରରଙ୍କ ମୁକାବିଲା ସ୍ପେନର ରାଫାଲ ନାଡାଲଙ୍କ ସହ ହେବ। ଅନ୍ୟ ଏକ କ୍ୱାର୍ଟରରେ ନାଡାଲ ୭-୫, ୬-୨, ୬-୨ ସେଟ୍ରେ ଅଷ୍ଟ୍ରେଲିଆର ସାମ୍ କ୍ୟୁରୀଙ୍କୁ ହରାଇଛନ୍ତି।