ନୂଆଦିଲ୍ଲୀ,୨୫।୬: ସୁପ୍ରିମ୍କୋର୍ଟଙ୍କ ରାୟ ଯୋଗୁ କଂଗ୍ରେସକୁ ଝଟ୍କା ଲାଗିଛି। ଗୁଜରାଟର ୨ଟି ରାଜ୍ୟ ସଭା ଆସନ ପାଇଁ ଉପନିର୍ବାଚନ ଏକାଠି କରାଇବା ଲାଗି କଂଗ୍ରେସ ପକ୍ଷରୁ ସୁପ୍ରିମ୍କୋର୍ଟରେ ଏକ ଆବେଦନ କରାଯାଇଥିଲା। ତେବେ ଏହାର ବିଚାର କରି ସୁପ୍ରିମ୍କୋର୍ଟ ନିର୍ବାଚନ କମିଶନଙ୍କ ଦ୍ୱାରା ଜାରି ହୋଇଥିବା ଅଧିସୂଚନାରେ ଦଖଲ ଦେବାକୁ ମନା କରିଛନ୍ତି। ଅମିତ ଶାହ ଏବଂ ସ୍ମୃତି ଇରାନୀ ଲୋକ ସଭା ଆସନରୁ ବିଜୟୀ ହେବା ପରେ ଗୁଜରାଟର ଏହି ଦୁଇ ରାଜ୍ୟ ସଭା ଆସନ ଏବେ ଖାଲି ପଡ଼ିଛି। ଏଥି ପାଇଁ ଜୁଲାଇ ୫ରେ ପୃଥକ୍ ପୃଥକ୍ ଭାବେ ନିର୍ବାଚନ କରାଯିବ। ଏହାଦ୍ୱାରା ଭାଜପା ଏହି ୨ଟି ଆସନରେ ସହଜରେ ବିଜୟୀ ହୋଇପାରିବ ବୋଲି କୁହାଯାଉଛି। ଏହାକୁ ବିରୋଧ କରି ଏକାଠି ନିର୍ବାଚନ କରାଇବାକୁ କଂଗ୍ରେସ ନେତା ପରେଶ ଭାଇ ଧନାନି ସୁପ୍ରିମ୍କୋର୍ଟରେ ଆବେଦନ କରିଥିଲେ।
