ତାଳଚେର,୩ା୮(ନି.ପ୍ର.)
ତାଳଚେରସ୍ଥିତ ଭରତପୁର ଖଣି ଦୁର୍ଘଟଣାରେ ମୃତାହତ ଶ୍ରମିକଙ୍କୁ ନେଇ ଭାଜପା ଏବଂ ବିଜେଡି ରାଜନୀତି କରୁଥିବା କଂଗ୍ରେସ ଅଭିଯୋଗ କରିଛି। ଏକ ଖବରଦାତା ସମ୍ମିଳନୀରେ ଦଳ ପକ୍ଷରୁ କୁହାଯାଇଛି ଯେ, ଦୁର୍ଘଟଣା ବେଳେ ଘଟଣାସ୍ଥଳରେ କେତେ ଶ୍ରମିକ କାର୍ଯ୍ୟ କରୁଥିଲେ ତାହାର ବିବରଣୀ ସମ୍ପର୍କରେ ସ୍ପଷ୍ଟ କୁହାଯାଉନାହିଁ। ମୃତ ଶ୍ରମିକଙ୍କ ପରିବାରକୁ ସରକାରୀ ସହାୟତା ରାଶି ବ୍ୟତୀତ ଅନ୍ୟ କୌଣସି ସହାୟତା ପ୍ରଦାନ କରାଯାଇନାହିଁ। ତୁରନ୍ତ ମୃତ ଶ୍ରମିକଙ୍କ ପରିବାରକୁ ଏମ୍ସିଏଲରେ ସ୍ଥାୟୀ ନିଯୁକ୍ତି ସହ ୮୦ ଲକ୍ଷ ଟଙ୍କା ଲେଖାଏ କ୍ଷତିପୂରଣ, ଉଚ୍ଚସ୍ତରୀୟ ତଦନ୍ତ କରାଯାଇ ଦୋଷୀମାନଙ୍କୁ ଦଣ୍ଡବିଧାନ, ସମସ୍ତ କୋଇଲା ଖଣିରେ ସୁରକ୍ଷା ସମ୍ବନ୍ଧରେ ଜନସାଧାରଣଙ୍କୁ ଅବଗତ କରାଯିବା, କାର୍ଯ୍ୟରତ ଶ୍ରମିକମାନଙ୍କୁ ସ୍ପତନ୍ତ୍ର ପରିଚୟପତ୍ର ପ୍ରଦାନ ପାଇଁ କଂଗ୍ରେସ ଦାବି କରିଛି। ଖଣି ଅଞ୍ଚଳରେ ଏସ୍ମା ଲାଗୁ ଥିଲେ ବି ଶାସକ ଦଳଗୁଡ଼ିକ ଆନ୍ଦୋଳନ କଲେ ତାହା ଲାଗୁ ହେଉ ନାହିଁ। କିନ୍ତୁ ଖଣି କ୍ଷତିଗ୍ରସ୍ତ ପ୍ରଜା ଆନ୍ଦୋଳନ କଲେ ସେମାନଙ୍କୁ ଦମନ କରିବାକୁ ଏସମା ଲାଗୁ କରାଯାଉଥିବା କଂଗ୍ରେସ ଅଭିଯୋଗ କରିଛି। ଜିଲା ପ୍ରଶାସନ ଓ ଏମ୍ସିଏଲ୍ ଏହାର ସମାଧାନ ଖୁବ୍ଶୀଘ୍ର ନ କଲେ ଆଗାମୀ ୬ ତାରିଖରୁ ସମସ୍ତ କୋଇଲା ଖଣିକୁ ବନ୍ଦ କରାଯିବ ବୋଲି ବରିଷ୍ଠ କଂଗ୍ରେସ ନେତା ପ୍ରଫୁଲ୍ଲ ଚନ୍ଦ୍ର ଦାସ, ବ୍ଲକର ପୂର୍ବତନ ଅଧ୍ୟକ୍ଷ ଦିଗମ୍ବର ଗଡ଼ନାୟକ, ପୂର୍ବତନ ନଗରପାଳ କେଶବ ଭୂତିଆ, ନଗର କଂଗ୍ରେସ ସଭାପତି ମାନସ ରଞ୍ଜନ ବାଇ, ଛାତ୍ର କଂଗ୍ରେସ ସଭାପତି ସତ୍ୟଜିତ ନନ୍ଦ, ନଗର କାର୍ଯ୍ୟକାରୀ ସଭାପତି ମହମ୍ମଦ ଜାଭିର ପ୍ରମୁଖ ସୂଚନା ଦେଇଛନ୍ତି।
