ଭୁବନେଶ୍ୱର,୨।୧୦(ବ୍ୟୁରୋ): ଆଉ ନିର୍ବାଚନ ଲଢ଼ିବେ ନାହିଁ କଂଗ୍ରେସ ନେତା ଭକ୍ତ ଦାସ। ବୁଧବାର କଂଗ୍ରେସର ପଦଯାତ୍ରା ଅବସରରେ ସେ ଏହା ଘୋଷଣା କରିଛନ୍ତି। ସେ କହିଛନ୍ତି, ମୁଁ ଆଉ ଲୋକସଭା ନିର୍ବାଚନ ଲଢ଼ିବି ନାହିଁ। ୩ ଥର ଏମ୍ପି ହୋଇଥିବା ବେଳେ ୬ ଥର ହାରିଛି। ଲୋକଙ୍କ ଉପରେ ବୋଝ କାହିଁକି ହେବି। ଏଥର ନୂଆ ପିଲାଙ୍କୁ ସୁଯୋଗ ଦେବା। ତେବେ ମୁଁ କଂଗ୍ରେସରେ ଅଛି, ଲୋକଙ୍କ ପାଇଁ ଏବଂ ଦଳ ପାଇଁ ସଂଗ୍ରାମ କରିବି ବୋଲି ଭକ୍ତ କହିଛନ୍ତି।
ସେ କୋଶଳ ରାଜ୍ୟ ଗଠନକୁ ପରୋକ୍ଷରେ ସମର୍ଥନ ଜଣାଇଛନ୍ତି। ସେ କହିଛନ୍ତି, ଛୋଟ ଛୋଟ ରାଜ୍ୟ କରି ଲୋକଙ୍କୁ ନ୍ୟାୟ ଦେବାର ଆବଶ୍ୟକତା ରହିଛି। ପଶ୍ଚିମ ଓଡ଼ିଶାରେ ମିନି ରାଜଧାନୀ ହେଉ। ଓଡ଼ିଶାକୁ ବିଭାଜନରୁ ରକ୍ଷା କରିବାକୁ ହେଲେ ମିନି ରାଜଧାନୀର ଆବଶ୍ୟକତା ରହିଛି। ମିନି ରାଜଧାନରେ ବର୍ଷକରେ ଥରେ ବିଧାନସଭା ଅଧିବେଶନ ହେଉ। ହାଇକୋର୍ଟ ପ୍ରତିଷ୍ଠା ହେଉ। ଓଡ଼ିଶାକୁ ଏକ ରଖିବାକୁ ହେଲେ ଆଞ୍ଚଳିକ ବୈଷମ୍ୟ ଦୂର ହେଉ ବୋଲି ସେ କହିଛନ୍ତି।