ବ୍ରହ୍ମପୁର ଅଫିସ,୨୩ା୫: କିଛିଦିନର ନୀରବତା ପରେ ପୁଣି ଥରେ ବ୍ରହ୍ମପୁରରେ ଦୁର୍ବୃତ୍ତଙ୍କ ଆତଙ୍କରାଜ ଦେଖିବାକୁ ମିଳିଛି। ଗୁରୁବାର ସାଧାରଣ ନିର୍ବାଚନର ଭୋଟ ଗଣତି ହେବାକୁ ଥିବାବେଳେ ବୁଧବାର ରାତି ପ୍ରାୟ ୯ଟାବେଳେ ଆସିକା କଂଗ୍ରେସ ବିଧାୟକ ପ୍ରାର୍ଥୀ ମନୋଜ ଜେନାଙ୍କୁ ମରଣାନ୍ତକ ଆକ୍ରମଣ ସହ ଗୁଳିମାଡ଼ ହୋଇଛି। ଦୁର୍ବୃତ୍ତମାନେ ପ୍ରଥମେ ମନୋଜଙ୍କ ଗଳା କାଟିବା ପରେ ୨ ରାଉଣ୍ଡ ଗୁଳି ଚଳାଇଥିଲେ। ଗୋଟିଏ ଗୁଳି ତାଙ୍କ ପେଟରେ ବାଜିଥିବାବେଳେ ଅନ୍ୟଟି ପିଚାରେ ବାଜିଥିଲା। ଅବସ୍ଥା ସଙ୍କଟାପନ୍ନ ଥିବାରୁ ପ୍ରଥମେ ତାଙ୍କୁ ବ୍ରହ୍ମପୁର ବଡ ମେଡିକାଲରେ ଭର୍ତ୍ତି କରାଯାଇଥିଲା। ରାତି ସାଢେ ୧୦ଟାରେ ମନୋଜଙ୍କ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଥିବା ବ୍ରହ୍ମପୁର ଏସ୍ଡିପିଓ ବିଷ୍ଣୁ ପ୍ରସାଦ ପତି ସୂଚନା ଦେଇଛନ୍ତି। ମନୋଜଙ୍କ ସହ ଥିବା ଅନୀଲ ସ୍ବାଇଁ ନାମକ ଜଣେ ଯୁବକ ମଧ୍ୟ ଆକ୍ରମଣର ଶିକାର ହୋଇଛନ୍ତି। ସେ ମଧ୍ୟ ବ୍ରହ୍ମପୁର ବଡମେଡିକାଲରେ ଚିକିତ୍ସାଧୀନ ଥିବା ଏସ୍ପି ପିନାକ ମିଶ୍ର ସୂଚନା ଦେଇଛନ୍ତି। ଆକ୍ରମଣ ପରେ ଦୁର୍ବୃତ୍ତମାନେ ବାଇକରେ ଖସି ପଳାଉଥିବାବେଳେ ଗୋଳନ୍ଥରା ଗଁା ନିକଟରେ ଟ୍ୟୁସନରୁ ଫେରୁଥିବା ୨ ଜଣ ଛାତ୍ରଙ୍କୁ ଧକ୍କା ଦେଇଥିଲେ। ୨ଛାତ୍ର ପାଟି କରିବାରୁ ସ୍ଥାନୀୟ ଲୋକେ ପହଞ୍ଚତ୍ଥିଲେ। ଫଳରେ ଭୟରେ ଦୁର୍ବୃତ୍ତମାନେ ଗାଡ଼ି ଛାଡି ବିଲମାଳକୁ ଦୌଡି ପଳାଇଥିଲେ। ସେଠାରେ ସେମାନଙ୍କ ଗୁଳି ଭର୍ତ୍ତି ଏକ ବନ୍ଧୁକ ଖସି ପଡିଥିଲା। ଗୋଳନ୍ଥରା ପୋଲିସ ଘଟଣାସ୍ଥଳରେ ପହଞ୍ଚତ୍ ବାଇକ୍ (ନଂ-ଓଡି୩୨ଏ-୨୮୭୪) ଓ ବନ୍ଧୁକ ଜବତ କରିଛି। ଅପରାଧୀଙ୍କୁ ଧରିବା ପାଇଁ ୨ଟି ସ୍ବତନ୍ତ୍ର ଟିମ୍ ବିଭିନ୍ନ ସ୍ଥାନରେ ଚଢାଉ ଜାରି ରଖିଥିବା ଏସ୍ପି ମିଶ୍ର କହିଛନ୍ତି। ପ୍ରକାଶ ଯେ, ବୁଧବାର ମନୋଜ ଓ ଅଶ୍ୱିନୀ କୌଣସି କାମରେ ଭୁବନେଶ୍ୱର ଯାଇ କାରରେ ବ୍ରହ୍ମପୁର ଦେଇ ଆସିକା ଫେରୁଥିଲେ। ରାତି ପ୍ରାୟ ୯ଟାବେଳେ ବାବାଜି ଢାବା ନିକଟରେ ଗାଡି ରଖି ପରିସ୍ରା କରିବାକୁ ବାହାରକୁ ଓହ୍ଲାଇଥିଲେ। ସେମାନଙ୍କ କାର୍କୁ ପିଛା କରୁଥିବା ୨ଟି ବାଇକ୍ରେ ୪ଜଣ ଦୁର୍ବୃତ୍ତ ଅତର୍କିତ ଆକ୍ରମଣ କରିଥିଲେ।