ଭୁବନେଶ୍ୱର,୨୯।୫(ବ୍ୟୁରୋ): ଓଡ଼ିଶାରେ କଂଗ୍ରେସ ବିପର୍ଯ୍ୟୟର ମୁଖ୍ୟ କାରଣ କ’ଣ ସେନେଇ ଆରମ୍ଭ ହେବ ତର୍ଜମା। ଏଥିପାଇଁ ପିସିସି(ପ୍ରଦେଶ କଂଗ୍ରେସ କମିଟି) ପକ୍ଷରୁ ଏକ ୨୧ଜଣିଆ କମିଟି ଗଠନ ହୋଇଥିବା ପିସିସି ସଭାପତି ନିରଞ୍ଜନ ପଟ୍ଟନାୟକ କହିଥିଲେ। ହେଲେ ଏହି କମିଟିରେ ଥିବା ନେତାଙ୍କ ମଧ୍ୟରୁ ୨ ଜଣ ବରିଷ୍ଠ ନେତା ଏ ସମ୍ପର୍କରେ ଜାଣି ନ ଥିବା ମତ ରଖିଛନ୍ତି। ସେହିପରି କମିଟିରେ ଥିବା ନେତାମାନଙ୍କ ମଧ୍ୟରେ ବର୍ତ୍ତମାନଠାରୁ ମତଭେଦ ଆରମ୍ଭ ହୋଇଯାଇଛି। ଏକଥା ଆସନ୍ତା ୩୦ରେ ଦଳୀୟ କାର୍ଯ୍ୟାଳୟରେ ହେବାକୁ ଥିବା ବୈଠକରେ ଉଠାଇବେ ବୋଲି କେତେଜଣ ନେତା କହିବା ଆରମ୍ଭ କଲେଣି। ପିସିସି ସଭାପତି ଏବଂ ଦଳୀୟ କାର୍ଯ୍ୟାଳୟରୁ ଆସିଥିବା କମିଟିର ତାଲିକା ଅନୁଯାୟୀ ବରିଷ୍ଠ ନେତା ନରସିଂହ ମିଶ୍ର, ତାରା ପ୍ରସାଦ ବାହିନୀପତି, ସୁରେଶ ରାଉତରାୟ, ପ୍ରଦୀପ ମାଝୀ, ଚିରଞ୍ଜୀବ ବିଶ୍ୱାଳ, ମହମ୍ମଦ ମୋକିମଙ୍କ ନାମ ରହିଛି। ହେଲେ ଏମାନଙ୍କ ମଧ୍ୟରୁ ୨ ଜଣ ନେତା ଏଭଳି କିଛି ଚିଠି ପାଇ ନ ଥିବା ମତ ରଖିଛନ୍ତି। ନରସିଂହ ମିଶ୍ର ଏବଂ ତାରା ବାହିନୀପତି ଚଳିତ ନିର୍ବାଚନରେ ଦଳର ବିପର୍ଯ୍ୟୟ କାରଣ ଖୋଜିବା ପାଇଁ ସେମାନଙ୍କ ନିକଟରେ କୌଣସି ଚିଠି ପହଞ୍ଚି ନ ଥିବା କହିଛନ୍ତି। ଏହାସହ ପ୍ରଦୀପ ମାଝୀ ଏବଂ ଚିରଞ୍ଜୀବ ବିଶ୍ୱାଳଙ୍କୁ ମଧ୍ୟ କମିଟିରେ ରଖାଯିବା ନେଇ ଆଉ କିଛି ନେତା ଆପତ୍ତି ଉଠାଇବା ଆରମ୍ଭ କରିଛନ୍ତି। ଆସନ୍ତା ଗୁରୁବାର କେନ୍ଦ୍ରୀୟ ନେତାଙ୍କ ଉପସ୍ଥିତିରେ ହେବାକୁ ଥିବା ବୈଠକରେ ଏ ସମ୍ପର୍କରେ କହିବାକୁ କେତେଜଣ ନେତା କହିଛନ୍ତି।
ଅପରପକ୍ଷରେ ଗୋଟିଏ ପରିବାରରୁ ୨ଟି ଲେଖାଏ ଟିକେଟ ଦିଆଯିବା ପ୍ରସଙ୍ଗରେ ତାରା ବାହିନୀପତି ମୁହଁ ଖୋଲିଛନ୍ତି। ତାରା କହିଛନ୍ତି, କଂଗ୍ରେସର ଗୋଟିଏ ପରିବାରକୁ ଗୋଟିଏ ଟିକେଟ ଫର୍ମୁଲା ଯେହେତୁ ପାଳନ କରାଗଲା ନାହିଁ ସେଥିପାଇଁ ଉଭୟ ଲୋକ ସଭା ଏବଂ ବିଧାନସଭା ନିର୍ବାଚନରେ ଖରାପ ଫଳ ଆସିଲା। କଂଗ୍ରେସର ମାନବସମ୍ବଳ ଏବଂ ଅର୍ଥ ବଳ କମ୍ରେ ନିର୍ବାଚନ ଲଢିଲା। ଏହାସହ ଦଳ ପୂରା ଏକତ୍ରିତ ହୋଇ କାମ କଲାନାହିଁ। ଯୋଉଁଥିଲାଗି ଦଳର ବହୁତ କ୍ଷତି ହେଲା। ବିଜେଡି ବହୁ କଂଗ୍ରେସ ନେତାଙ୍କୁ ନିଜ ଦଳରେ ସାମିଲ କରିବା ଦ୍ୱାରା ମଧ୍ୟ ବହୁତ କ୍ଷତି ହେଲା। ନବ ଦାସଙ୍କ ଭଳି ବହୁ ନେତା ଦଳ ଛାଡ଼ିବା ଯୋଗୁ ମଧ୍ୟ କ୍ଷତି ହେଲା। ଭାଜପା ଏଥର ୨୩ଟି ଆସନ ପାଇ ମୁଖ୍ୟ ବିରୋଧୀ ଦଳ ଆସନରେ ବସିବ। ହେଲେ କଂଗ୍ରେସ ମୁଖ୍ୟ ଭୂମିକା ତୁଲାଇବ। ଦଳର ୯ ବିଧାୟକ ବିଜେଡି ଉପରେ ଭାରି ପଡିବୁ ବୋଲି ତାରା କହିଛନ୍ତି।
ଅପରପକ୍ଷରେ କେତେଜଣ ବରିଷ୍ଠ ନେତା ଆସନ୍ତା ଗୁରୁବାର ପିସିସି ସଭାପତିଙ୍କୁ ଘେରିବାକୁ ଯୋଜନା ରଖିଛନ୍ତି। ଏହା ଭିତରେ ନିରଞ୍ଜନ ଗଠନ କରିଥିବା ୨୧ ଜଣିଆ କମିଟିକୁ ନେଇ ଦ୍ୱନ୍ଦ୍ୱ ଆରମ୍ଭ ହୋଇଯାଇଛି। ଚଳିତ ନିର୍ବାଚନରେ ସଙ୍ଗଠନ ଦାୟିତ୍ୱ ପାଇଥିବା କେତେଜଣ ନେତା କମିଟିରେ ରହିବା ନେଇ ଅନେକ ନେତା ପ୍ରଶ୍ନ ଉଠାଇଛନ୍ତି। ଗୁରୁବାର ହେବାକୁ ଥିବା ବୈଠକରେ ପ୍ରଥମେ ସେହି ବିଷୟରେ ଆଲୋଚନା ହେବ ବୋଲି ଶୁଣିବାକୁ ମିଳୁଛି।