ବିଜେପୁର, ୨୦।୩ (ଡି.ଏନ୍.ଏ.)-
ଆଝିର୍ ଦୁନିଆଁଥି କିଛି ଅସମ୍ଭବ ନୁହେ। ବାହାଜାଂଗଲ ମାଜ୍ଲେ ପେଟ୍ କେଭେ ଅପୁଷା ନାଇଁ ରହେ। ହେଲେ ଏଛେନ୍ ବି ନିଜର୍ ଭାଏଗ୍କେ ଦୋଷ ଦେଇ କିଛି ଲୋକ୍ କବାର୍ବୁତା ନାଇଁକରି କରି ଅଭାବ୍ ଅସୁବିଧାଥି ଦିନ୍ ବିତଉଥିବାର ଦେଖ୍ବାକେ ମିଲୁଛେ। ଏନ୍ତା ସମିଆଥି କଅଁଲି ବଏସେ ବହିପତର୍ ଧର୍ବାର ଜାଗାରେ ପରିବାରର ବୋଝ୍ ଉଠଉଛନ୍ ଝନେ ନାବାଲକ୍।
ବରଗଡ଼ ଜିଲା ବିଜେପୁର ଏନ୍ଏସି ସଦର ମହକୁମାଥି ବମ୍ବେ ଲଡୁ ବିକୁଥିବାର ଇ କମିହଁା ନାବାଲକୁଁ ଭେଟିଥିଲେ ଆମର୍ ବିଜେପୁର ଖବରଦାତା। ସେ ହେଉଛନ୍ ବରୁଣ ଗୁପ୍ତା(୧୧)। ଜନମ୍ ଠାନ୍ ଉତ୍ତରପ୍ରଦେଶ୍ ରାଏଜ୍ର କାନପୁର। ପଏସା ପତର୍ର ଅଭାବ ଲାଗି ସେ ସାତ୍ କିଲାସନୁ ପାଠ୍ ଛାଡ଼ିଛନ୍। ଗଲା ବଛର୍ କମେଇ କୁଢ଼େଇ ଖାଏବାକେ କାନ୍ପୁରରୁ ବରଗଡ଼କେ ଆସିଛନ୍। ଅମାପାଲିଠାନେ ଘରଭଡ଼ା ନେଇ ସେ ନିଜର ପରିବାର ସଂଗେ ରହୁଛନ୍। ମା’ ପୁଲା, ବାପା ସିନ୍ଧୁ , ଭାଏ ଅନିକେତ ଆର ଦେଢ଼ ବଛର୍ର ବହେନ୍ ପ୍ରାଂଶୀକୁଁ ନେଇ ତାକର ପରିବାର। ଫିଦିନ୍ କୁକ୍ରା ଡକା ଆଗ୍ରୁ ବାପ୍ପୁଓ ଘରେ ବମ୍ବେ ଲଡୁ ତିଆରିବାର ଆରମ୍ କରସନ୍। ତାକେ ଜରିଥି ପେକିଂ କରସନ୍ । ଇ ଫିଦିନିଅଁା କାମ୍ ସାରି ବାପ୍ ପୁଓ ଲଡୁ ବିକି ବାହାରସନ୍। ବାପ୍ ସିଦ୍ଧୁ ବରଗଡ଼ ସହରରେ ରହୁଥିଲାବେଲେ ପୁଓ ବରୁଣ ବେପାର ଲାଗି ୨୮ କି.ମି. ବସ୍ରେ ବିଜେପୁର ଏରିଆକେ ଆସୁଛନ୍। ସେ ଖଁଦେ ବମ୍ବେ ଲଡୁର ଭାର ବୁହି ହାତେ ହରନ୍ ବଜେଇ ବଜେଇ ଗଲିକଁଦି ବୁଲି ଲଡୁ ବିକୁଛନ୍। ଲାଲେ ଲାଲ୍ ବମ୍ବେ ଲଡୁ, ଖାଏଲେ ସୁଆଦ ଜାନବ୍ ସଢୁ ମିତାର ଅନେକ ମଜାକିଆ କଥା କହି ଛୁଆପୁତାନୁ ବୁଢ଼ାତ ତକ୍ ମନ୍ମୁହି ଲଡୁ ବିକୁଛନ୍। ତାକର କଥା ଶୁନି ଛୁଆମାନେ ବି ଉଷତ୍ରେ ଦଶ ଟଁକାକେ ଦୁଇଟା ଲେଖଁା ଲଡୁ ଘିନି ନେଉଥିବାର ଦେଖ୍ବାକେ ମିଲିଥିଲା। ଆଏଜକେ ୩ରୁ ୪ ମାସ ହେଲା ବରୁଣ ଇ ଏରିଆକେ ବେପାର କରି ଆସୁଛନ୍। ଫିଦିନ ୩ଶହରୁ ୪ଶହ ଟଁକା ତକ୍ ସେ ବେପାର କରୁଛନ୍। ସେନ୍ତା ଇଥି ଦେଢ଼ଶହନୁ ଦୁଇଶହ ତକ୍ ଲାଭ ମିଲୁଥିବାର ସେ କହିଛନ୍। ତାକର ପାଠ ପଢ଼ା ବାବ୍ଦେ ପଚ୍ରାଲାରୁ କଁାକରବେ ଆଗିଅଁା ପଢ଼ବାର ମନ୍ଥିଲେ ବି ଅଭାବ୍ ଅନାଟନ ସବୁବେଲେ ଘଁାଟି ମାରୁଛେ। କାହାର ଠାନେ ହାତ ପତାଲେ ସିନେ ଲାଜ୍ ଲାଗ୍ବା। ଖରାତରା ସହି ଗଲିକଁଦି ବୁଲି ଯେନ୍ ଦୁଇ ପଏସା ମିଲୁଛେ ହେଥି ବଡା ଖୁସି ଲାଗୁଛେ ବଲି ବରୁଣ ହଁସ ହଁସ ମୁହେଁ କହିଥିଲେ।