ଓଡଗାଁ, ୨୭।୬(ସ୍ବ.ପ୍ର.)- ୨୪ ଘଣ୍ଟା ନପୁରୁଣୁ ପୁଣି ଥରେ ଗୁରୁବାର ମଧ୍ୟାହ୍ନରେ ଓଡଗାଁ ବନାଞ୍ଚଳ ଓ ବାହାଡାଝୋଲା ସେକ୍ସନ ଅଞ୍ଚଳରୁ ୧୦ ମୂଲ୍ୟବାନ ଶାଳଗଣ୍ଡି ଓ ୬ ଖଣ୍ଡ ପଟ୍ଟା ବନବିଭାଗ ଜବତ କରାଯାଇଛି। ବାହାଡାଝୋଲା ନିକଟସ୍ଥ ଆମ୍ବପଡା କଇଠପଲ୍ଲୀ ଗାଁ ମୁଣ୍ଡ ତୋଟାରେ ଶାଳ ଗଣ୍ଡି ଗଚ୍ଛିତ ଥିବା ବନପାଳ ଜାଣିବା ପରେ ସଦଳବଳେ ଚଢାଉ କରିଥିଲେ। ତୋଟା ଭିତରେ ଥିବା ବୁଦୁବୁଦୁକିଆ ଅଞ୍ଚଳରେ ଲୁଚାଇ ରଖାଯାଇଥିବା ଶାଳଗଣ୍ଡି ଓ ପଟ୍ଟା ଠାବ କରିବା ସହିତ ଜବତ କରିଥିବା ଜଣାଯାଇଛି। ତେବେ ସେଠାରେ କାଠ କଟା ଗୁଣ୍ଡ ପଡ଼ିଥିବା ଦେଖି ଗଣ୍ଡି କଟା ଯାଉଥିବା ସନ୍ଦେହରେ ଖୋଜାଖୋଜି କରାଯାଇଥିଲା। ପରେ ବୁଦା ଭିତରୁ ଏକ କରତ ମିଳିଥିଲା । ବନପାଳ ସରିତା ବରାଳ, ବନରକ୍ଷୀ ଅରିନ୍ଦ ସାହୁ, ଶୁଭେନ୍ଦୁ ପ୍ରସାଦ ନାୟକଙ୍କ ସହିତ ଫରେଷ୍ଟ ପ୍ରୋଟେକ୍ସନ ସ୍କ୍ବାର୍ଡ ଚଢାଉରେ ସାମିଲ ହୋଇଥିଲେ। ଜବତ କାଠର ଆନୁମାନିକ ମୂଲ୍ୟ ୭୦ ହଜାର ଟଙ୍କା ହେବ ବୋଲି ବନପାଳ ସୂଚନା ଦେଇଛନ୍ତି।
