ରାୟପୁର, ୨୦।୬: ଛତିଶଗଡର ବିଳାଶପୁରରେ ଜଣେ ୬ ବର୍ଷର ଝିଅ ଜୀବନ ବଦଳାଇ ଦେଇଛନ୍ତି ଜିଲାପାଳ। ଝିଅଟିର ଜନ୍ମ ପରେ ତାଙ୍କ ମା’ଙ୍କ ମୃତ୍ୟୁ ହୋଇଯାଇଥିଲା। ପିତା ଅପରାଧ କରି ଜେଲ ଦଣ୍ଡାଦେଶ ଭୋଗୁଥିବାବେଳେ ଝିଅଟିଏ ଯତ୍ନ ନେବାକୁ କେହି ନ ଥିଲେ। ଫଳରେ ତାଙ୍କୁ ଜେଲ ଅଣାଯାଇଥିଲା। ଏଠାରେ ଜେଲ ପ୍ରଶାସନ ଏବଂ ମହିଳା କଏଦୀମାନେ ଶିଶୁଟିର ଯତ୍ନ ନେଲେ। ଧୀରେ ଧୀରେ ବଡ ହୋଇ ଜେଲ କମ୍ପାଉଣ୍ଡ ଭିତରେ ଥିବା ଏକ ପ୍ଲେ ସ୍କୁଲରେ ପଢିଲେ। ସାଧାରଣ ପିଲାଙ୍କ ଭଳି ଖେଳକୁଦ ଏବଂ ଟିଭି ଦେଖିବାକୁ ସେ ପସନ୍ଦ କରୁଥିଲେ। ଏହାସହ ପାଠପଢା ପ୍ରତି ଥିଲା ତାଙ୍କର ପ୍ରବଳ ଇଚ୍ଛା। ବିଳାଶପୁର ଜିଲାପାଳ ଡା. ସଞ୍ଜୟ ଅଲଙ୍କ ଜେଲ ପରିଦର୍ଶନରେ ଆସିଥିଲେ। ତୁମେ କ’ଣ କରିବାକୁ ଚାହୁଁଛ ବୋଲି ଜିଲାପାଳ ଝିଅଟିକୁ ପଚାରିଥିଲେ। ମୁଁ ଜେଲ୍ରୁ ବାହାରି ସ୍କୁଲ ଯିବାକୁ ଚାହୁଁଛି ବୋଲି ଝିଅଟି ଉତ୍ତରରେ କହିଥିଲେ। ଜିଲାପାଳ ତୁରନ୍ତ ଜେଲ ଅଧିକାରୀଙ୍କ ସହ କଥାବାର୍ତ୍ତା କରି ତାଙ୍କୁ ଜିଲାର ଏକ ଭଲ ସ୍କୁଲରେ ଆଡମିଶନ କରିଦେଇଥିଲେ। ସେବେଠୁ ଝିଅଟିର ଜୀବନ ସମ୍ପୂର୍ଣ୍ଣ ବଦଳି ଯାଇଛି।