ବାହାନଗା,୧୬ା୧୧(ଡି.ଏନ.ଏ.)-ଖନ୍ତାପଡା ଥାନା ଅଧୀନ ୧୬ ନମ୍ବର ଜାତୀୟ ରାଜପଥ ଟୋଲଗେଟ ନିକଟରେ ସାମୁଦ୍ରିକ କଙ୍କଡା ଓ ଗେଣ୍ଢା ଭର୍ତ୍ତି ହୋଇ ରପ୍ତାନୀ ହେଉଥିବା ଦୁଇଟି ଯାତ୍ରୀବାହୀ ବସ୍କୁ ଜିଲା ମତ୍ସ୍ୟବିଭାଗ ଅଧିକାରୀ ରବିନାରାୟଣ ପଟ୍ଟନାୟକ ଖନ୍ତାପଡା ପୋଲିସ ସହାୟତାରେ ଜବତ କରିଥିଲେ ା ମାତ୍ର ପୂର୍ବାହ୍ନ ସାଢେ ୧୧ ଟାରେ ତଦନ୍ତ କରି ସାମୁଦ୍ରକ କଙ୍କଡା ଓ ଗେଣ୍ଢାଗୁଡିକ ସେମାନଙ୍କ ଗାଇଡଲାଇନ ପରିସରରେ ଆସୁ ନ ଥିବା କହି ଛାଡିଦେଇଛନ୍ତି। ତେବେ ଆରଟିଓ ବିଭାଗ ବସ୍କୁ ଯାତ୍ରୀ ପରିବହନ ପାଇଁ ଅନୁମତି ଦେଇଥିବା ବେଳେ ସେହି ବସ୍ରେ କିପରି ସାମୁଦ୍ରିକ ଗେଣ୍ଢା ଓ କଙ୍କଡା ରାଜ୍ୟ ବାହାରକୁ ଚାଲାଣ ହେଉଛି ତାହା ସାଧାରଣରେ ଆଲୋଚନା ହେଉଛି।
ଶୁକ୍ରବାର ଭୋର ସମୟରେ ଧାମରା ଅଞ୍ଚଳରୁ ଦୁଇଟି ଘରୋଇ ବସ୍ ନମ୍ବର (ଓଆର-୦୧ଏସ-୮୭୭୧), (ଓଡି-୦୧ଏକ୍ସ-୧୫୭୫) କଲିକତା ଯାଉଥିଲା। ବସ୍ ଆଗରେ କଲିକତା ନମ୍ବର ପ୍ଲେଟ ଲଗାଇ ଯାତ୍ରୀବାହୀ ଭାବେ ଦର୍ଶାଇ ୪ଶହରୁ ଊର୍ଦ୍ଧ୍ୱ ବସ୍ତା ସାମୁଦ୍ରିକ କଙ୍କଡା ଓ ସାମୁଦ୍ରିକ ଗେଣ୍ଢା ବା କୁଚି ଶାମୁକା ଚାଲାଣ ହେଉଥିଲା। ଜିଲା ମତ୍ସ୍ୟ ଅଧିକାରୀ ରବିନାରାୟଣ ପଟ୍ଟନାୟକ, ଅତିରିକ୍ତ ମତ୍ସ୍ୟ ଅଧିକାରୀ ଚିତ୍ତରଞ୍ଜନ ସାହୁ, ଡେପୁଟି ଡାଇରେକ୍ଟର (ମତ୍ସ୍ୟ)ଅଜୟ ଭୂୟଁା ଆସି ତଦନ୍ତ କରିଥିଲେ ା ତଦନ୍ତ ପରେ ବସ୍ ଭିତରେ ଥିବା ସାମୁଦ୍ରିକ ସାମଗ୍ରୀ ବିଭାଗୀୟ ଗାଇଡଲାଇନ୍ ଭିତରେ ନୁହେଁ ବୋଲି ପ୍ରକାଶ କରି ଫେରିଯାଇଥିଲେ ା ଏହାପରେ ବନ ବିଭାଗ ଆସି ବସ୍ରେ ଥିବା ଶାମୁକା, ଗେଣ୍ଢା ଓ କଙ୍କଡାକୁ ତଦନ୍ତ କରିବା ପରେ ଗାଇଡଲାଇନ୍ ଭିତରେ ଆସୁନାହିଁ କହି ଫେରିଯାଇଥିଲେ। ପରେ ଖନ୍ତାପଡା ଥାନାରେ ଜବତ ବସ୍ ଓ ସେଥିରେ ଥିବା ସାମୁଦ୍ରିକ ସାମଗ୍ରୀ, ବସ୍ କର୍ମଚାରଙ୍କ ସମେତ ୭ଜଣ ବେପାରୀଙ୍କ କାଗଜପତ୍ର ତନଖି ପରେ ଛାଡିଦେଇଥିବା ଜଣାପଡିଛି ା ଜବତ ସାମଗ୍ରୀ ବନବିଭାଗ ଓ ମତ୍ସ୍ୟବିଭାଗର ଗାଇଡଲାଇନରେ ଯାଉ ନ ଥିବାରୁ ସେମାନେ ତାହାକୁ ଛାଡିଦେଇଛନ୍ତି ବୋଲି ଖନ୍ତାପଡା ଥାନା ଅଧିକାରୀ ଶ୍ରୀବଲ୍ଲଭ ସାହୁ କହିଛନ୍ତି।