ବମ୍ବେ: ଫିଲ୍ମ ନିର୍ମାତା କରନ୍ ଜୋହର- ଅଭିନେତ୍ରୀ କଙ୍ଗନା ରାଣାଓ୍ବତଙ୍କ ମଧ୍ୟରେ ତୁ ତୁ ମେଁ ମେଁ କଥା ସମସ୍ତେ ଜାଣନ୍ତି। ଉଭୟ ପରସ୍ପର ବିରୋଧରେ କଡ଼ା ମନ୍ତବ୍ୟ ଦେବାକୁ ପଛାନ୍ତି ନାହିଁ। ହେଲେ ଏବେ କିଛି ଅଲଗା ଘଟଣା ଘଟିଛି। ନିକଟରେ ପଦ୍ମଶ୍ରୀ ପୁରସ୍କାର ଘୋଷଣା ହୋଇଥିବା ବେଳେ ଉଭୟ କରନ୍ ଏବଂ କଙ୍ଗନା ଏହାକୁ ପାଇବାକୁ ଯୋଗ୍ୟ ବିବେଚିତ ହୋଇଛନ୍ତି। ଏ ନେଇ କିଭଳି ଅନୁଭବ କରୁଛନ୍ତି ବୋଲି କରନ୍ଙ୍କୁ ପଚରାଯାଇଥିଲା। ଉତ୍ତରରେ କରନ୍ କଙ୍ଗନାଙ୍କ ଭୂରିଭୂରି ପ୍ରଶଂସା କରିଛନ୍ତି, ଯାହା ଅନେକଙ୍କୁ ଆଶ୍ୱର୍ଯ୍ୟାନ୍ବିତ କରିଛି।
ଏକ ଖବରଦାତା ସଂସ୍ଥା ସହ ସାକ୍ଷାତ୍କାର ସମୟରେ କରନ୍ କହିଛନ୍ତି, ଆମ ଭିତରେ ତିକ୍ତତା ତ ରହିଆସିଛି। ହେଲେ ଆମେ ବାହାରେ ଭେଟହେଲେ ବିନମ୍ରତାର ସହ କଥା ହେଉ, ଶୁଭେଚ୍ଛା ଜଣାଉ। ଜଣେ ଫିଲ୍ମ ନିର୍ମାତା ଭାବେ କଙ୍ଗନାଙ୍କ ପ୍ରତିଭା, କ୍ରାଫ୍ଟକୁ ମୁଁ ସମ୍ମାନ କରେ। ନିଜକୁ ପ୍ରମାଣିତ କରିପାରିଥିବା ଅଭିନେତ୍ରୀମାନଙ୍କ ମଧ୍ୟରୁ ସେ ଜଣେ। ଏଣୁ ସେ ସମ୍ମାନର ପାତ୍ରୀ। ଏକତା କପୁର ଏବଂ ଅଦନାନ ସାମୀଙ୍କ ଛଡ଼ା କଙ୍ଗନାଙ୍କ ସହ ପଦ୍ମଶ୍ରୀ ପାଇବା ସମ୍ମାନର କଥା।
ଏଭଳି ଉତ୍ତର ଶୁଣି ଆଗାମୀ ଦିନରେ ସେ କଙ୍ଗନାଙ୍କ ସହ ଫିଲ୍ମରେ କାମ କରିବେ ବୋଲି ପ୍ରଶ୍ନ ପଚରା ଯାଇଥିଲା। ଏହାର ଉତ୍ତରରେ କଙ୍ଗନାଙ୍କ ଆବଶ୍ୟକତା ଫିଲ୍ମରେ ଥିଲେ ସେ ନିଶ୍ଚିତ ଫୋନ୍ କରିବେ ବୋଲି କହିଛନ୍ତି। ଯାହା ବି ସମସ୍ୟା ଥାଉନା କାହିଁକି ଶେଷରେ ମୁଁ ଜଣେ ଫିଲ୍ମ ନିର୍ମାତା। ତେଣୁ ଜଣେ କଳାକାରଙ୍କୁ ଫିଲ୍ମରେ ନେବା ବଡ଼ କଥା ନୁହେଁ। ମୁଁ ଏଥିରେ ବିଶ୍ୱାସ କରେ ବୋଲି କରନ୍ କହିଛନ୍ତି। ଏହା ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଆଗାମୀ ଦିନରେ କଙ୍ଗନା କ’ଣ ଏହାର ଉତ୍ତର ରଖୁଛନ୍ତି ଜଣାପଡ଼ିବ।