ହିଞ୍ଜିଳିକାଟୁ,୨୧ା୧୦(ଡ଼ି.ଏନ୍.ଏ.)-ଗଞ୍ଜାମ ଜିଲା ହିଞ୍ଜିଳିକାଟୁ ବ୍ଲକ ବଡ଼ଖଣ୍ଡି ଗ୍ରାମ କମିଟି ନିଷ୍ପତ୍ତି କରି ଗ୍ରାମର ଏକ ପରିବାରକୁ ବାସନ୍ଦ କରିବା ଘଟଣାରେ ରବିବାର ପ୍ରଶାସନିକ ତତ୍ପରତା ପ୍ରକାଶ ପାଇଛି। ବାସନ୍ଦ ପରିବାର ପକ୍ଷରୁ ସୋସିଆଲ ମିଡ଼ିଆରେ ଭିଡ଼ିଓ ଜାରି ଓ ଏହାକୁ ନେଇ ଖବର ପ୍ରକାଶ ପରେ ବଡ଼ଖଣ୍ଡି ଗ୍ରାମ୍ୟ କମିଟି ପକ୍ଷରୁ ରବିବାର ମଧ୍ୟାହ୍ନରେ ଏକ ବୈଠକ ବସିଥିଲା। ଗ୍ରାମର ନାଡ଼ି ଭଗବାନଙ୍କ ପରିବାରକୁ ବାସନ୍ଦ କରାଯାଇନାହିଁ। ଭଗବାନଙ୍କ ପରିବାର ବହୁ ଦିନ ଧରି ଗ୍ରାମରେ ଅନୁପସ୍ଥିତ ରହିଛନ୍ତି ଏବଂ ସେମାନେ ଗ୍ରାମରେ ରହିଲେ ଗ୍ରାମବାସୀଙ୍କ କାୈଣସି ଆପତ୍ତି ନାହିଁ ବୋଲି ନିଷ୍ପତ୍ତି ନେଇଛନ୍ତି। ଏନେଇ ୧୨ଜଣ ଗ୍ରାମବାସୀଙ୍କ ସ୍ବାକ୍ଷର ଥିବା ଚିଠି ରବିବାର ଆସିକା ଏସ୍ଡିପିଓ ସୂର୍ଯ୍ୟମଣି ପ୍ରଧାନଙ୍କୁ ପ୍ରଦାନ କରିଛନ୍ତି। ବୈଠକରେ ନିଜେ ଏସ୍ଡ଼ିପିଓ ପ୍ରଧାନଙ୍କ ସମେତ ବ୍ଲକ ଅଧ୍ୟକ୍ଷ ଏନ୍. ରଘୁନାଥ, ସରପଞ୍ଚ କେ. ଦୁର୍ଗା ପ୍ରସାଦ ରାଓ, ଗ୍ରାମବାସୀଙ୍କ ମଧ୍ୟରେ କେ. ଗୁରୁନାଥ, ଏସ. ରବୀନ୍ଦ୍ର, ପି. ଭୀମରାଜୁ, ପି. ଦୀନବନ୍ଧୁ ପ୍ରମୁଖ ଉପସ୍ଥିତ ଥିଲେ।
ପ୍ରକାଶ ଯେ, ଗ୍ରାମର ନାଡ଼ି ଭଗବାନ ଓ ତାଙ୍କ ସ୍ତ୍ରୀ ସାମାଜିକ ଗଣମାଧ୍ୟମରେ ଶୁକ୍ରବାର ଏକ ଭିଡ଼ିଓରେ ମୁଖ୍ୟମନ୍ତ୍ରୀ, ପୋଲିସ ଓ ଗ୍ରାମବାସୀଙ୍କୁ ବାସନ୍ଦ ଉଠାଇବା ଓ ଗ୍ରାମରେ ଶାନ୍ତିରେ ବସବାସ ପାଇଁ ସୁଯୋଗ ଦେବାକୁ ନେହୁରା ହୋଇ ଭିଡ଼ିଓ କରିଥିଲେ। ଏହା ଭାଇରାଲ ପରେ ରାଜ୍ୟବ୍ୟାପୀ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଫଳରେ ପ୍ରଶାସନିକ କଳ ସହ ପୋଲିସ ପକ୍ଷରୁ ତତ୍ପରତା ପ୍ରକାଶ ପାଇଛି।
