ଝାରସୁଗୁଡା ଅଫିସ,୮।୫-କରୋନା ଭୂତାଣୁର ସଂକ୍ରମଣକୁ ରୋକିବା ପାଇଁ ସମଗ୍ର ଦେଶକୁ ଲକ୍ଡାଉନ୍ କରାଯାଇଛି। ଝାରସୁଗୁଡା ଜିଲାରେ ମଧ୍ୟ ଦୁଇଜଣଙ୍କଠାରେ କରୋନା ପଜିଟିଭ ଚିହ୍ନଟ ହୋଇଛି। ଏହି ଜିଲାକୁ ଅରେଞ୍ଜ ଜୋନ୍ ଭାବେ ଘୋଷଣା କରାଯାଇଛି। ତେବେ ଇତି ମଧ୍ୟରେ କୋହଳ କଟକଣା ପାଇଁ ବହୁ ଦୋକାନ ବଜାର ଖୋଲିଛି। ସକାଳୁ ସନ୍ଧ୍ୟା ରାସ୍ତାରେ ଗାଡ଼ିମୋଟର ଗଡ଼ୁଛି। ଲୋକେ ବି ବାହାରେ ବୁଲୁଛନ୍ତି। ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ଲକ୍ଡାଉନ୍ ବେଳେ ଝାରସୁଗୁଡା ସହରର କିଷାନ ଛକ, ବସ୍ଷ୍ଟାଣ୍ଡ ଛକ, ରେଳ ଷ୍ଟେଶନ ଛକ ଓ ଥାନା ଛକରେ ମାଳ ମାଳ ପୋଲିସ କର୍ମଚାରୀ ଉପସ୍ଥିତ ରହୁଥିଲେ। ସହରରେ ବିନା କାରଣରେ ଯିବା ଆସିବା କରୁଥିବା ଗାଡ଼ିମୋଟର ଯାଞ୍ଚ କରି କାର୍ଯ୍ୟାନୁଷ୍ଠାନ ଗ୍ରହଣ କରୁଥିଲେ। ହେଲେ ଏବେ କଟକଣା କୋହଳ ହେବା ପରଠାରୁ ପୋଲିସ ଛକରେ ଛାଇରେ ବସି ରହୁଛି। ଗାଡ଼ିମୋଟର ଯାଞ୍ଚ କରାଯାଉ ନାହିଁ। ଏବେ ସନ୍ଧ୍ୟା ୭ରୁ ସକାଳ ୭ ପର୍ଯ୍ୟନ୍ତ କୌଣସି ଲୋକ ବାହାରକୁ ନ ବାହାରିବାକୁ ସରକାରୀ ନିର୍ଦ୍ଦେଶ ରହିଛି। ହେଲେ ଏଠାରେ ରାତି ୧୧ଟା ପର୍ଯ୍ୟନ୍ତ ଲୋକେ ବାହାରେ ବୁଲୁଛନ୍ତି। ତେବେ ଏ ସମ୍ପର୍କରେ ଝାରସୁଗୁଡା ଥାନା ଅଧିକାରୀ ସାବିତ୍ରୀ ବଳ କହିଛନ୍ତି ଯେ, ସବୁ ଛକରେ ପୋଲିସ ଯାଞ୍ଚ କରୁଛି। ଗୁରୁବାର ୬୫ଟି ଗାଡି ଜବତ କରାଯାଇଛି। ଶୁକ୍ରବାର ମଧ୍ୟ ପୋଲିସ ଯାଞ୍ଚ ପ୍ରକ୍ରିୟା ଚାଲୁ ରଖିଥିବା ସେ ସୂଚନା ଦେଇଛନ୍ତି।