ଆରଡ଼ି,୧୩ା୪(ଡି.ଏନ୍.ଏ.): ଲକ୍ଡାଉନ ଯୋଗୁ ଭଦ୍ରକ ଜିଲା ଆରଡ଼ିସ୍ଥିତ ବାବା ଆଖଣ୍ଡଳମଣିଙ୍କ ମନ୍ଦିର ୨୦ ଦିନ ହେଲା ବନ୍ଦ ରହିଛି। ଫଳରେ ଭକ୍ତମାନେ ଦର୍ଶନ ପାଇ ପାରୁନାହାନ୍ତି। ସୋମବାର ସକାଳେ ମହାବିଷୁବ ସଂକ୍ରାନ୍ତି ଉପଲକ୍ଷେ ସ୍ଥାନୀୟ ଅଞ୍ଚଳର ବହୁ ଭକ୍ତ ପୀଠକୁ ଆସିଥିଲେ। ମାତ୍ର ପୀଠ ଭିଡ଼ ହେବା ସହ ସାମାଜିକ ଦୂରତା ରକ୍ଷାରେ ପ୍ରତିବନ୍ଧକ ସୃଷ୍ଟି ହେବା ଲକ୍ଷ୍ୟକରି ଆରଡ଼ି ଫାଣ୍ଡି ପୋଲିସ ଓ ଧୂଷୁରୀ ଥାନା ପୋଲିସ ପୀଠରେ ପହଞ୍ଚି ଭିଡ଼ ନିୟନ୍ତ୍ରଣ ପାଇଁ ପଦକ୍ଷେପ ନେଇଥିଲେ। ଭକ୍ତମାନଙ୍କୁ ପୀଠରୁ ବିତାଡ଼ିତ କରିବା ସହ ସେବାୟତମାନଙ୍କୁ ପୂଜା ସାମଗ୍ରୀ ନ ନେବାକୁ ତାଗିଦ୍ କରିଥିଲା। ଆରଡ଼ି ଫାଣ୍ଡି ଅଧିକାରୀ ପ୍ରଦୀପ ନାୟକ, ଧୂଷୁରୀ ଥାନା ଏଏସ୍ଆଇ ଧୃତରାଷ୍ଟ୍ର ମଲ୍ଲିକ ଭକ୍ତମାନଙ୍କୁ କରୋନା ପାଇଁ ଘରୁ ନ ବାହାରିବାକୁ ଅନୁରୋଧ କରିଥିଲେ।
