କଟକ ଅଫିସ,୨୨।୭- ଓଡ଼ିଶା ପୁଣି ଏକ ବିଶ୍ୱସ୍ତରୀୟ ଟେବୁଲ ଟେନିସ ଟୁର୍ନାମେଣ୍ଟ ଆୟୋଜନ କରିବା ସମ୍ଭାବନା ସୃଷ୍ଟି ହୋଇଛି। ଆଗାମୀ ଇଣ୍ଡିଆ ଓପନ ଟେବୁଲ ଟେନିସ ଏଠାରେ ହେବାର ଯୋଜନା ରହିଛି ବୋଲି ଟେବୁଲ ଟେନିସ ଫେଡେରେଶନ ଅଫ ଇଣ୍ଡିଆ(ଟିଟିଏଫ୍ଆଇ)ର ପରାମର୍ଶଦାତା ଧନରାଜ ଚୌଧୁରୀ ସୂଚନା ଦେଇଛନ୍ତି । ଏ ନେଇ ରାଜ୍ୟ ସରକାରଙ୍କୁ ଟିଟିଏଫଆଇ ପକ୍ଷରୁ ଖୁବଶୀଘ୍ର ପ୍ରସ୍ତାବ ଦିଆଯିବ । କଟକର ଜବାହରଲାଲ ନେହେରୁ ଇନଡୋର ଷ୍ଟାଡିୟମକୁ ଭେନ୍ୟୁ ଭାବେ ଏହି ପ୍ରସ୍ତାବରେ ଦର୍ଶାଯିବ ବୋଲି ଧନରାଜ କହିଛନ୍ତି । ଗତ ୧୭ରୁ ଜବାହରଲାଲ ନେହେରୁ ଇନଡୋର ଷ୍ଟାଡିୟମରେ ଚାଲିଥିବା ରାଜ୍ୟଗୋଷ୍ଠୀ ଟିଟି ଟୁର୍ନାମେଣ୍ଟ ସୋମବାର ଉଦ୍ଯାପିତ ହେବ। ପ୍ରତିଯୋଗିତାରେ ମୋଟ ୧୪ଟି ରାଷ୍ଟ୍ର ଅଂଶ ଗ୍ରହଣ କରିଛନ୍ତି। ଟେବୁଲ ଟେନିସର ଏହି ମେଗା ପ୍ରତିଯୋଗିତାକୁ ଆୟୋଜନ କରିବାରେ ଟିଟିଏଫଆଇ ଓ ଓଡ଼ିଶା ରାଜ୍ୟ ଟେବୁଲ ଟେନିସ ଆସୋସିଏଶନ(ଓଏସ୍ଟିଟିଏ) ଗୁରୁ ଦାୟିତ୍ୱ ଗ୍ରହଣ କରିଛନ୍ତି। ବର୍ତ୍ତମାନ ସୁଦ୍ଧା ଟୁର୍ନାମେଣ୍ଟ ଆୟୋଜନ ନେଇ ଖେଳାଳି ଓ ମ୍ୟାଚ୍ ଅଫିସିଆଲ ମାନେ ସନ୍ତୋଷ ପ୍ରକାଶ କରିଛନ୍ତି। ଫଳରେ ଟିଟିଏଫଆଇ ଏଠାରେ ଆଗାମୀ ଇଣ୍ଡିଆନ ଓପନ ଟିଟି ଟୁର୍ନାମେଣ୍ଟ ଆୟୋଜନ ପାଇଁ ଚିନ୍ତା କରୁଛି।