କଟକ ଅଫିସ,୬ା୪: କଟକ ସହରର ପଟାପୋଲ ଅଞ୍ଚଳରୁ ପ୍ରଥମ କରୋନା ଭୂତାଣୁ ଆକ୍ରାନ୍ତ ଚିହ୍ନଟ ହୋଇଛନ୍ତି। ଫଳରେ ଏହି ଅଞ୍ଚଳକୁ କଟକ ମହାନଗର ନିଗମ(ସିଏମ୍ସି)ପକ୍ଷରୁ ସିଲ୍ କରିଦିଆଯାଇଛି। ଏବେ ଘରକୁ ଘର ଯାଇ ସକ୍ରିୟ ନିରୀକ୍ଷଣ କରାଯାଉଛି। ଆଶା ଏବଂ ଅଙ୍ଗନଓ୍ବାଡ଼ି ଦିଦିମାନଙ୍କୁ ଏହି କାର୍ଯ୍ୟରେ ନିୟୋଜିତ କରାଯାଇଛି। ସିଏମ୍ସିର ଅଧିକାରୀମାନେ ମଧ୍ୟ ଏହାର ତଦାରଖ କରୁଛନ୍ତି। ରବିବାର ଗୋଟିଏ ଦିନରେ ପ୍ରାୟ ୫ ଶହରୁ ଅଧିକ ପରିବାର ଏବଂ ୨ ହଜାର ଲୋକଙ୍କଠାରୁ ତଥ୍ୟ ସଂଗ୍ରହ କରାଯାଇଛି। ଏଥିରେ ସମସ୍ତେ ସହଯୋଗ କରନ୍ତୁ ବୋଲି ସିଏମ୍ସି କମିଶନର ଅନନ୍ୟା ଦାସ ଆହ୍ବାନ ଦେଇଛନ୍ତି। ଏଥିସହ ଉକ୍ତ କାର୍ଯ୍ୟରେ ନିୟୋଜିତ କର୍ମଚାରୀଙ୍କୁ ସେ ପ୍ରଶଂସା କରିଛନ୍ତି।