ନିଶ୍ଚିନ୍ତକୋଇଲି,୫।୬(ସ୍ବ.ପ୍ର.): ଶ୍ରୀଶ୍ରୀ ଅଚ୍ୟୁତାନନ୍ଦ ମହାପୁରୁଷଙ୍କ ଶୂନ୍ୟସମାଧି ଦିବସ ଓ ଦେବସ୍ନାନ ପୂର୍ଣ୍ଣିମା କଡ଼ା ସୁରକ୍ଷା ବଳୟ ମଧ୍ୟରେ ପାରମ୍ପରିକ ରୀତିନୀତି ଅନୁଯାୟୀ ଶୁକ୍ରବାର ଶେଷ ହୋଇଛି। ପ୍ରତିବର୍ଷ ଏଠାରେ ଲକ୍ଷାଧିକ ଭକ୍ତଙ୍କ ସମାଗମ ହେଉଥିବା ବେଳେ ଚଳିତ ବର୍ଷ କରୋନା ପାଇଁ ସ୍ଥାନୀୟ ପ୍ରଶାସନ ଗତ ୧ ତାରିଖଠାରୁ ୬ ତାରିଖ ପର୍ଯ୍ୟନ୍ତ ପୀଠରେ ୨୦୦ ମିଟର ପରିଧି ମଧ୍ୟରେ ୧୪୪ ଧାରା ଲାଗୁ କରିଛନ୍ତି। ପୀଠର ଚତୁଃପାର୍ଶ୍ୱରେ ଘେରାବନ୍ଦୀ କରାଯିବା ସହ ବ୍ୟାପକ ପୋଲିସ ମୁତୟନ କରାଯାଇଛି। ଫଳରେ ପୀଠକୁ ଭକ୍ତମାନଙ୍କର ପ୍ରବେଶ ଉପରେ ସମ୍ପୂର୍ଣ୍ଣ ନିଷିଦ୍ଧାଦେଶ ଦେଖିବାକୁ ମିଳିଛି। ଟ୍ରଷ୍ଟବୋର୍ଡର ନିର୍ଦ୍ଦେଶ କ୍ରମେ ସ୍ଥାନୀୟ ସେବାୟତମାନେ ପ୍ରାତଃ ୩ ଘଟିକା ସମୟରେ ବେଢ଼ା ପ୍ରବେଶକରି ପୀଠ ଶୋଧନ କରିବା ସହ ୩.୧୫ରେ ମଙ୍ଗଳ ଆଳତି, ସୂର୍ଯ୍ୟପୂଜା, ଦ୍ୱାରପାଳ ପୂଜା ପରେ ୩.୨୫ରେ ମହାପୁରୁଷଙ୍କ ସ୍ନାନ ମାର୍ଜନା କରି ୪ଟାରେ ଚନ୍ଦନ ତୁଳସୀ ଲାଗି, ଚିତାଲାଗି, ଅଙ୍ଗଭୂଷଣ ଲାଗି ଓ ରୁପାମୁକୁଟ ଲାଗି କରାଯାଇଥିଲା। ୪.୨୦ରେ ତୁଳସୀ ଚୁଳମାଳ ଲାଗି କରାଯିବା ପରେ ୫ଟା ସମୟରେ ପହିଲି ଭୋଗ ଲାଗି କରାଯାଇଥିଲା। ୫.୩୦ରୁ ୧୨ଟା ସମୟ ପର୍ଯ୍ୟନ୍ତ ପ୍ରଭୁଙ୍କର ଭକ୍ତଙ୍କୁ ଦର୍ଶନ କରିବାର ଅବକାଶ ଥିବା ବେଳେ ଏହି ସମୟରେ ପୀଠ ଏକ ପ୍ରକାର ଶୂନ୍ୟତା ଦେଖିବାକୁ ମିଳିଥିଲା। ୧୨.୨୦ରେ ତୁଳସୀ ଟାହିଆ ଲାଗି କରାଯାଇ ମହାପ୍ରଭୁଙ୍କର ମହାସ୍ନାନ କରାଯାଇ କୋଠଭୋଗ, ଅମୃତମଣୋହି ଭୋଗ, କରପଲ୍ଲଭ ଭୋଗ, ଜଗନ୍ନାଥଙ୍କର ଅନ୍ନଳି ଭୋଗ ଲାଗି କରାଯାଇଛି।