ସୋରଡ଼ା,୧୫।୮(ଡି.ଏନ୍.ଏ.)-ଗଞ୍ଜାମ ପ୍ରସିଦ୍ଧ ମା’ କନ୍ଧୁଣୀ ଦେବୀଙ୍କ କଣ୍ଟାପୀଢ଼ା ଯାତ୍ରା ଓ କନ୍ଧୁଣୀ ଦେବୀ ମହୋତ୍ସବ ପାଇଁ ବୁଧବାର ବଡ଼କାଳି ମନ୍ଦିର ପରିସରରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା। ଗୁରୁବାର ଅପରାହ୍ନରେ ମନ୍ଦିର ପରିସରରୁ ଶୁଭଖୁଣ୍ଟିକୁ ପୂଜା କରାଯାଇ ଢୋଲ କିର୍ତ୍ତନ ସହ ଶୋଭାଯାତ୍ରାରେ ରଥପଦା, ବଡ଼ଦାଣ୍ଡ, ଆଡପମଣ୍ଡପ, ସାରୁଆ ସାହି, ଗଣିଛକ ଅଞ୍ଚଳ ଭ୍ରମଣ କରି ମନ୍ଦିର ପରିସରେ ସ୍ଥାପନ କରାଯାଇଛି। ଆସନ୍ତା ସେପ୍ଟମ୍ବର ୧୦ ତାରିଖରେ ବାଲିଯାତ୍ରା ଏବଂ ରଥପଦା ଅସ୍ଥାୟୀ ମଣ୍ଡପରେ କନ୍ଧୁଣୀ ଦେବୀ ମହୋତ୍ସବ ସେପ୍ଟେମ୍ବର ୧୮ରୁ ୨୨ ପର୍ଯ୍ୟନ୍ତ ୫ ଦିନ ବ୍ୟାପୀ ଅନୁଷ୍ଠିତ ହେବ। ୨୩ ସେପ୍ଟେମ୍ବରରେ କଣ୍ଟାପିଢ଼ା ଯାତ୍ରା ଉଦ୍ଯାପନ ସହ ଆମେ କଳାକାର ଦ୍ୱାରା ଅପେରା ମଞ୍ଚସ୍ଥ ହେବ। ବୈଠକରେ ବିଧାୟକ ପୂର୍ଣ୍ଣଚନ୍ଦ୍ର ସ୍ବାଇଁ, ଥାନାଧିକାରୀ ପ୍ରଭାତ ସାହୁ, କମିଟି ସମ୍ପାଦକ ଦୁର୍ଗାଚରଣ ଶତପଥୀଙ୍କ ସମେତ ସହରବାସୀ ଯୋଗଦେଇଥିଲେ।