ରସୁଲପୁର, ୬।୫(ଡି.ଏନ୍.ଏ.): ଯାଜପୁର ଜିଲା ରସୁଲପୁର ବ୍ଲକ ଅଧୀନ ନଠୁଆବର ପଞ୍ଚାୟତର ଜଣେ ୫୮ବର୍ଷୀୟ ବ୍ୟକ୍ତି କରୋନା ପଜିଟିଭ୍ (କ୍ରମିକ ନଂ.୧୭୬)ଙ୍କ ଚିହ୍ନଟ ହେବା ପରେ ପ୍ରଶାସନ ପକ୍ଷରୁ ତାଙ୍କ କଣ୍ଟାକ୍ଟ ଟ୍ରେସିଂ କରାଯାଇଛି। ତାଙ୍କ ସଂସ୍ପର୍ଶରେ ଆସିଥିବା ୩୬ଜଣଙ୍କୁ ମଧ୍ୟରୁ ୧୦ ଜଣ ପୂର୍ବରୁ କ୍ୱାରାଣ୍ଟାଇନରେ ରହୁଥିବା ବେଳେ ବୁଧବାର ଅନ୍ୟମାନଙ୍କୁ କ୍ୱାରାଣ୍ଟାଇନରେ ରଖାଯାଇଥିବା ସୂଚନା ମିଳିଛି। ଏଥିସହ ନଠୁଆବର ପଞ୍ଚାୟତର ଆଦମପୁର, କପିଳ, କୃଷ୍ଣପଡା, କୋରକୋରା, ନଗୁଆଁ ସମେତ ଓଡିଶୋ ପଞ୍ଚାୟତର ବାହାବଳପୁର, କରଞ୍ଜିଆରୀ, ମେଳକ, ବଡକଇଁଚି ପଞ୍ଚାୟତର କାଇଁଚବାଡ (କଇଁଚିଶାସନ, ବେଦମତି, ନାଉପାଳ) ଗୋପୀନାଥପୁର ପଡ଼ା (ମହାନ୍ତି ସାହି, ନିହାରୀ ସାହି)କୁ ପ୍ରଶାସନ ପକ୍ଷରୁ କଣ୍ଟେନମେଣ୍ଟ ଜୋନ୍ ଘୋଷଣା କରାଯାଇଛି। ଉକ୍ତ ଅଞ୍ଚଳଗୁଡ଼ିକରେ ମେ ୬ ତାରିଖ ସକାଳ ୬ଟାରୁ ୧୯ ତାରିଖ ସକାଳ ୬ଟା ପର୍ଯ୍ୟନ୍ତ କଣ୍ଟେନମେଣ୍ଟ ଜୋନ୍ କଟକଣା ବଳବତ୍ତର ରହିବ। ମେଡିକାଲ ଟିମ୍ ସେଠାକାର ପ୍ରତ୍ୟେକ ପରିବାର ସଦସ୍ୟଙ୍କ ରିପୋର୍ଟ ସଂଗ୍ରହ କରିବା ସହ ଉକ୍ତ ଜୋନ୍କୁ ପ୍ରବେଶ ଓ ପ୍ରସ୍ଥାନ ଉପରେ ମଧ୍ୟ କଟକଣା ରହିବ ବୋଲି ସୂଚନା ମିଳିଛି। ଏହାଛଡ଼ା କଣ୍ଟେନମେଣ୍ଟ ଜୋନ୍ରେ ବିଶୋଧନ ପ୍ରକ୍ରିୟା ଆରମ୍ଭ ହୋଇଛି। ରସୁଲପୁର ତହସିଲଦାର ଜ୍ୟୋତିକାନ୍ତ ଭୁଜବଳ, ବିଡିଓ ଉମାକାନ୍ତ ପରିଡା, କୁଆଖିଆ ଥାନା ଅଧିକାରୀ ମନୋଜ କୁମାର ସ୍ବାଇଁ, ରସୁଲପୁର ବ୍ଲକ ଜନ ସ୍ବାସ୍ଥ୍ୟ ଅଧିକାରୀ ଡା. ସୁଧୀର କୁମାର ସାହୁ ପ୍ରମୁଖ କଣ୍ଟେନମେଣ୍ଟ ଜୋନ୍ରେ ପହଞ୍ଚତ୍ ବିଭିନ୍ନ କାର୍ଯ୍ୟ ତଦାରଖ କରୁଛନ୍ତି।
ମିଳିଥିବା ସୂଚନା ଅନୁସାରେ, କରୋନା ଆକ୍ରାନ୍ତ (କ୍ରମିକ ନଂ.୧୭୬) ମାର୍ଚ୍ଚ ୨୮ ତାରିଖରେ କଲିକତାରୁ ଆସିବା ପରେ ଗାଁ ମନ୍ଦିରରେ ପୂଜାପାଠ କରିବା ସହ ପ୍ରସାଦ ସେବନର ବନ୍ଦୋବସ୍ତ କରାଇଥିଲେ।