କଣ୍ଟେନ୍ମେଣ୍ଟ ଜୋନ୍ରେ ଏମସ୍ର କେନ୍ଦ୍ରୀୟ ଟିମ୍: ୧୬୫ ସ୍ବାବ୍ ରିପୋର୍ଟ ନେଗେଟିଭ୍
21 ବାହାନଗା,୩ା୫(ଡି.ଏନ୍.ଏ.)-ବାଲେଶ୍ୱର ଜିଲା ବାହାନଗା ବ୍ଲକ ବିଷ୍ଣୁପୁର ଗ୍ରାମର ହୋଇଥିବା କଣ୍ଟେନମେଣ୍ଟ ଜୋନରେ ଭୁବନେଶ୍ୱରସ୍ଥିତ ଏମସ୍ର କେନ୍ଦ୍ରୀୟ ଟିମ୍ ତଦନ୍ତ ପାଇଁ ପହଞ୍ଚିଥିଲେ। ଏହି ୩ଜଣିଆ କେନ୍ଦ୍ରୀୟ ଟିମ୍ ସହିତ ବିଡିଓ ରଘୁନାଥ ମହାପାତ୍ର ଉପସ୍ଥିତ ରହି କରୋନା ସଂକ୍ରମିତଙ୍କ ଘରକୁ ଯାଇ ପରିବାର ସଦସ୍ୟଙ୍କ ସହ ଆଲୋଚନା କରିଥିଲେ। କଲିକତାରୁ ଫେରି କ୍ୱାରାଣ୍ଟାଇନ୍ରେ ଥିବା କେତେକ ଲୋକଙ୍କ ଘରକୁ ଯାଇ ସେମାନେ ବୁଝାବୁଝି କରିଥିଲେ ା ପରେ ସଂଗୃହୀତ ସ୍ବାବ ବାବଦରେ ତଥ୍ୟ ସଂଗ୍ରହ କରିବା ସହିତ ସମସ୍ତଙ୍କର ସ୍ବାସ୍ଥ୍ୟ ସମ୍ପର୍କରେ ପଚାରି ବୁଝିଥିଲେ। ଦୁଇ ଦିନରେ ସଂଗ୍ରହ ହୋଇଥିବା ୧୬୫ଜଣଙ୍କର ସ୍ବାବ ରିପୋର୍ଟ ନେଗେଟିଭ ରହିଛି ା ଗତ ୨୭ତାରିଖରେ ବିଷ୍ଣୁପୁର ଗ୍ରାମରେ ଜିଲାର ୧୬ ନମ୍ବର କରୋନା ସଂକ୍ରମଣ ଚିହ୍ନଟ ହେବା ପରେ ସେହି ରାତିରୁ ଜିଲାପାଳ ଗ୍ରାମର ସମସ୍ତ ପ୍ରବେଶ ପଥକୁ ସିଲ୍ କରି କଣ୍ଟେନମେଣ୍ଟ ଜୋନ ଘୋଷଣା କରିଥିଲେ। ୨୮ତାରିଖଠାରୁ ବିଷ୍ଣୁପୁର ପଞ୍ଚାୟତର ସମସ୍ତ ସାହିରେ ଲୋକଙ୍କ ସ୍ବାବ ସଂଗ୍ରହ କରାଯାଉଛି। ପ୍ରଥମ ଦିନରେ ସଂଗ୍ରହ କରାଯାଇଥିବା ୧୦୭ ସ୍ବାବ ଓ ଦ୍ୱିତୀୟ ଦିନ ସଂଗ୍ରହ ହୋଇଥିବା ୫୮ଜଣଙ୍କ ସ୍ବାବ ମିଶି ମୋଟ୍ ୧୬୫ଜଣଙ୍କ ରିପୋର୍ଟ ଶୁକ୍ରବାର ଓ ଶନିବାର ପ୍ରକାଶ ପାଇଛି ା ସମସ୍ତ ସ୍ବାବ ପରୀକ୍ଷଣ ରିପୋର୍ଟ ନେଗେଟିଭ ରହିଛି। ଏହା ଜଣାପଡିବା ପରେ ଗ୍ରାମବାସୀ ଆଶ୍ୱସ୍ଥ ହୋଇଛନ୍ତି। ତୃତୀୟ ଦିନରେ ୩୦ଜଣଙ୍କ ସ୍ବାବ ଓ ୪ର୍ଥ ଦିନରେ ୪୦ଜଣଙ୍କ ସ୍ବାବ ସଂଗ୍ରହ କରାଯାଇଛି ା
ତଥ୍ୟ ସଂଗ୍ରହ ପାଇଁ ଅଙ୍ଗନୱାଡି କର୍ମୀ, ଆଶା କର୍ମୀ, ଏଏନଏମ୍ ସମେତ ଜଣେ ନୋଡାଲ ଅଫିସରଙ୍କୁ ନିଯୁକ୍ତି କରାଯାଇଛି। ଏହି କର୍ମଚାରୀମାନେ ଗ୍ରାମର ଲୋକଙ୍କ ଘରକୁ ଯାଇ ସମସ୍ତ ତଥ୍ୟ ଆଣିବା ସହିତ ଯେଉଁମାନେ ଅନ୍ୟ ରାଜ୍ୟରେ ଥିଲେ ବା ଯେଉଁମାନଙ୍କୁ ଥଣ୍ଡା ହୋଇଛି ସେମାନଙ୍କ ନିକଟରୁ ସ୍ବାବ ସଂଗ୍ରହ କରାଯାଇ କେନ୍ଦ୍ରକୁ ଅଣାଯାଉଛି। ବାଲେଶ୍ୱରର ଭେଷଜ ବିଶେଷଜ୍ଞ ଡା. ମୃତ୍ୟୁଞ୍ଜୟ ମିଶ୍ରଙ୍କ ନେତୃତ୍ୱରେ ସ୍ବାସ୍ଥ୍ୟ ବିଭାଗର ଏକ ଟିମ୍ ରହି ସ୍ବାବ ସଂଗ୍ରହ କରୁଛନ୍ତି। ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଡାକ୍ତର ଅଭୟ କୁମାର ପଣ୍ଡା ସହାୟତା କରୁଛନ୍ତି। ଏଥିରେ ମାଇକ୍ରୋବାୟୋଲୋଜିର ଏକ୍ସପର୍ଟ, ଜଣେ ସ୍ବାସ୍ଥ୍ୟ ବିଭାଗର ସୁପରଭାଇଜରଙ୍କ ସମେତ ନୋଡାଲ ଅଫିସର ଭାବେ ନିଯୁକ୍ତି ପାଇଥିବା ସୌଭାଗ୍ୟ ମଞ୍ଜରୀ ତ୍ରିପାଠୀ ସହଯୋଗ କରୁଛନ୍ତି। ପଞ୍ଚାୟତର ୧୨ ପ୍ରବେଶ ପଥକୁ ପ୍ରଶାସନ ସିଲ୍ କରିଛି।