କଟକ ଅଫିସ୍,୨୭।୪: ଲକ୍ଡାଉନ୍ ଯୋଗୁ କଟକ ସହରର ବ୍ୟବସାୟିକ ପ୍ରତିଷ୍ଠାନଗୁଡ଼ିକ ଦୀର୍ଘ ଦିନ ହେଲା ବନ୍ଦ ରହିଛି। ତେବେ ଦୋକାନ ବଜାର ଖୋଲିବା ନେଇ ଶୁକ୍ରବାର ବିଳମ୍ବିତ ରାତିରେ ପ୍ରଥମେ କେନ୍ଦ୍ର ଗୃହ ମନ୍ତ୍ରଣାଳୟ ଏବଂ ପରେ ରାଜ୍ୟ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ତରଫରୁ ବିଜ୍ଞପ୍ତି ପ୍ରକାଶ ପାଇଥିଲା। କିନ୍ତୁ ଚୂଡ଼ାନ୍ତ ନିଷ୍ପତ୍ତି ସ୍ଥାନୀୟ ପ୍ରଶାସନ ନେବ ବୋଲି କୁହାଯାଇଛି। ରବିବାର କଟକ ମହାନଗର ନିଗମ(ସିଏମ୍ସି) ପକ୍ଷରୁ ଏ ସମ୍ପର୍କରେ ସ୍ପଷ୍ଟ ନିର୍ଦ୍ଦେଶନାମା ପ୍ରକାଶ ପାଇଛି। ଜାରି ନିର୍ଦ୍ଦେଶରେ କୁହାଯାଇଛି, କଟକର ସ୍ଥିତି ନେଇ ସମୀକ୍ଷା କରାଯାଇଛି। ଅଣ-ଅତ୍ୟାବଶ୍ୟକ ସାମଗ୍ରୀ ବିକ୍ରି କରୁଥିବା ବ୍ୟବସାୟିକ ପ୍ରତିଷ୍ଠାନଗୁଡ଼ିକ ସମ୍ପର୍କରେ ନିଷ୍ପତ୍ତି ନିଆଯାଇଛି । ଓଡ଼ିଶା ଶପ୍ ଆଣ୍ଡ କମର୍ସିଆଲ୍ ଏଷ୍ଟାବ୍ଲିଶମେଣ୍ଟ ଆକ୍ଟ-୧୯୫୬ରେ ପଞ୍ଜୀକୃତ ତଥା ଏକକ ଦୋକାନ, ଆବାସିକ କମ୍ପ୍ଲ୍ଳେକ୍ସରେ ଥିବା ଦୋକାନ ଖୋଲା ରହିବ। କିନ୍ତୁ ଏକ କିମ୍ବା ବହୁ ବ୍ରାଣ୍ଡ ବିକ୍ରି କରୁଥିବା ବଲ୍ ଏବଂ ମାର୍କେଟ୍ କମ୍ପ୍ଲ୍ଳେକ୍ସ ବନ୍ଦ ରହିବ। ରେଷ୍ଟୁରାଣ୍ଟରୁ କେବଳ ପାର୍ସଲ୍ ପାଇଁ ହିଁ ଅନୁମତି ଦିଆଯିବ। ଗ୍ରାହକମାନେ ସେଠାରେ ଖାଇପାରିବେ ନାହିଁ । ସେହିଭଳି ଅଳଙ୍କାର ଦୋକାନ ଏବଂ ଶୋ’ରୁମ୍, ସୁଇମିଂପୁଲ୍, ସେଲୁନ୍ ଏବଂ ଜିମ୍କୁ ବନ୍ଦ ରଖାଯିବ। ଇ-କମର୍ସ ବ୍ୟବସ୍ଥା ଚାଲୁ ରହିବ। କିନ୍ତୁ କେବଳ ଅତ୍ୟାବଶ୍ୟକ ସାମଗ୍ରୀ ହିଁ ବିକ୍ରି ହୋଇପାରିବ । ମାଦକ ଦ୍ରବ୍ୟ, ତମାଖୁ, ପାନ, ସୁପାରି ବିକ୍ରି କରୁଥିବା ବ୍ୟବସାୟିକ ପ୍ରତିଷ୍ଠାନଗୁଡ଼ିକୁ ବନ୍ଦ ରଖାଯିବ ବୋଲି ସିଏମ୍ସି ତରଫରୁ କୁହାଯାଇଛି ।
ଅପରପକ୍ଷେ ଅଣ-ଅତ୍ୟାବଶ୍ୟକ ସାମଗ୍ରୀ ବିକ୍ରି କରୁଥିବା ତଥା ଉପରୋକ୍ତ ରିଟେଲ୍ ବ୍ୟବସାୟିକ ପ୍ରତିଷ୍ଠାନଗୁଡ଼ିକ ପୂର୍ବାହ୍ନ ୧୧ରୁ ଅପରାହ୍ନ ୫ଟା ପର୍ଯ୍ୟନ୍ତ ଖୋଲା ରହିବ। କିନ୍ତୁ ହୋଲ୍ସେଲ୍ ଦୋକାନଗୁଡ଼ିକ ସକାଳ ୬ରୁ ପୂର୍ବାହ୍ନ ୧୧ଟା ପର୍ଯ୍ୟନ୍ତ ଖୋଲାଯିବ। ଯେଉଁ ବ୍ୟବସାୟିକ ପ୍ରତିଷ୍ଠାନଗୁଡ଼ିକରେ ଉଭୟ ହୋଲ୍ସେଲ୍ ଏବଂ ରିଟେଲ୍ ରହୁଛି, ସେଗୁଡ଼ିକୁ ସକାଳ ୬ରୁ ପୂର୍ବାହ୍ନ ୧୧ଟା କିମ୍ବା ପୂର୍ବାହ୍ନ ୧୧ଟାରୁ ଅପରାହ୍ନ ୫ଟା ପର୍ଯ୍ୟନ୍ତ, ଗୋଟିଏ ସମୟରେ ହିଁ ଖୋଲା ରହିବ। ସମସ୍ତ ବ୍ୟବସାୟିକ ପ୍ରତିଷ୍ଠାନ ୫୦ପ୍ରତିଶତ କର୍ମଚାରୀଙ୍କୁ ନେଇ କାର୍ଯ୍ୟ କରିବ। ସାମାଜିକ ଦୂରତା ପାଳନ କରାଯିବ। କର୍ମଚାରୀମାନେ ମାସ୍କ ପିନ୍ଧିବାକୁ ବାଧ୍ୟ ହେବେ। ଦୋକାନଗୁଡ଼ିକୁ ନିୟମିତ ସାନିଟାଇଜ୍ ଉପରେ ଗୁରୁତ୍ୱ ଦିଆଯିବ। ତେବେ ଟ୍ରାଫିକ କଟକଣା ବଳବତ୍ତର ରହୁଥିବା ଯୋଗୁ ଦୋକାନୀ ଏବଂ କର୍ମଚାରୀମାନେ ବୈଧ ପରିଚୟପତ୍ର ଯଥା ଟ୍ରେଡ୍ ଲାଇସେନ୍ସ, ହୋଲ୍ଡିଂ ଟ୍ୟାକ୍ସ ରସିଦ୍ କିମ୍ବା ପଞ୍ଜୀକରଣ ଫର୍ମ ଧରିବାକୁ ସିଏମ୍ସି ପକ୍ଷରୁ କୁହାଯାଇଛି ।