କୋକସରା, ୧୮ା୭(ଡି.ଏନ୍.ଏ): କୋକସରା ବ୍ଲକ କାଉଡ଼ୋଲା ଗାଁର ନୀଲାମ୍ବର ରାଉତକଁର ଦିବ୍ୟାଙ୍ଗ ଝି’ ଭୂମିସୂତା(୧୭)କୁଁ ବ୍ଲକ ପରଶାସନ ଦେଇଥିବାର ପରତିଶୁରତି ପାଲନ କରିଛେ। ଭୂମିସୂତା ଜନମୁ ଦିବ୍ୟାଙ୍ଗ ଥିଲାବେଲେ ଭିନ୍ନକ୍ଷମ ପରମାନପତର ଅଭାବୁ ସେ ଭତା ପାଏବାରୁ ବଁଚିତ୍ ହେଇ ରହିଥିଲେ। ଇ ବାବ୍ଦେ ଧରିତ୍ରୀ ସମ୍ବଲପୁର ସଂସ୍କରଣରେ ଲାଗ୍ ଲାଗ୍ ଖବର ବାହାରଲାରୁ ଥାନୀୟ ପରଶାସନର ଚେତା ପସିଥିଲା। କୋକସରା ବିଡିଓ ବସନ୍ତ କୁମାର ସେଠି ଭିନ୍ନକ୍ଷମ ଭୂମିସୂତାକଁର ଘରେ ପୁହୁଁଚି ଦରକାରୀ କାଗଜପତର ନେଇଥିଲେ। ସେ ନିଜେ ଭୂମିସୂତାକଁର ଭିନ୍ନକ୍ଷମ ପରମାନପତର ଲାଗି ଅନ୍ଲାଇନ ଆବେଦନ କରିଥିଲେ। ଭୂମିସୂତାକଁର ଭିନ୍ନକ୍ଷମ ପରମାନପତର ମିଲ୍ଲା ଉତାରୁ ତାହାକୁ ଭତା ଯୋଜନାରେ ସାମିଲ କରାଯାଇଛେ। ବୁଧୁବାର କାଉଡ଼ୋଲା ସରପଁଚ୍ ଜମ୍ବୁବତୀ ସାହୁ ଆର ପଁଚେତ୍ କାର୍ଯ୍ୟନିର୍ବାହୀ ଅଧ୍କାରୀ ନିଲାନ୍ଦ୍ରି ମେହେର ଭୂମିସୂତାକୁଁ ଭିନ୍ନକ୍ଷମ ଭତା ଦେଇଛନ୍। ସେନ୍ତା ଭୂମିସୂତାକୁଁ ଆଗ୍ରୁ ବ୍ଲକ ପରଶାସନ ଗୁଟେ ହ୍ବିଲ ଚେୟାର ଯୁଗେଇ ଦେଇଛେ। ବ୍ଲକ ପରଶାସନର ଇ ମହତ୍ କାଯ୍କେ ଗଁାବାସୀ ବଡ଼ଭାରି ପରଶଁସା କରିଛନ୍।