ରସୁଲପୁର,୨୯।୧୧(ଡିଏନଏ): ଯାଜପୁର ଜିଲା ରସୁଲପୁର ବ୍ଲକ ନରସିଂହପୁର ପଞ୍ଚାୟତ ସୀମାଦେଇ ବହିଯାଇଥିବା କଦଳା ଗଣ୍ଡ (ଗୋବରୀ ନାଳ)ର ପୁନରୁଦ୍ଧାର ପାଇଁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ସ୍ଥାନୀୟ ଅଞ୍ଚଳବାସୀ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ବର୍ଷତମାମ ଏହି ଜଳଧାରା ସଚଳ ରହେ। ଏହି ନାଳ ଉପରେ ନରସିଂହପୁର ପଞ୍ଚାୟତ ଲୋକଙ୍କ ବ୍ୟତୀତ ଯାଜପୁର ବ୍ଲକର ମହେଶ୍ୱରପୁର ପଞ୍ଚାୟତ ବ୍ରାହ୍ମଣବାଚ୍ଚପୁର, ଗୋପିନାଥପୁର, ନିଶ୍ଚନ୍ତା, ବେଣାପୁର, ଜଗଦିଶପୁର ଗ୍ରାମର ଲୋକମାନେ ନିର୍ଭର କରି ଚଳନ୍ତି। ଖରାଦିନରେ ଏହି ନାଳ ସ୍ଥାନୀୟ ଅଞ୍ଚଳର ଜଳ ସମସ୍ୟା ସମାଧାନ କରିବାରେ ପ୍ରମୁଖ ଭୂମିକା ଗ୍ରହଣ କରିଥାଏ। ଗୋରୁଗାଈଙ୍କ ପାଇଁ ତାହାକୁ ପାଣି ପିଇବାର ବିକଳ୍ପ ବ୍ୟବସ୍ଥା ଭାବରେ ଧରାଯାଏ। ବର୍ଷବର୍ଷ ଧରି ଏହି ନାଳର ଜଳ ଉତ୍ସ ବିଲାତି ଦଳରେ ଭର୍ତ୍ତି ହୋଇଛି। ପାଣି ନିଷ୍କାସନ ହୋଇପାରୁ ନଥିବାରୁ ନାଳର ପାଣି ଦୂଷିତ ହୋଇଯାଇଛି। ଏହି ପାଣି ବ୍ୟବହାରଯୋଗ୍ୟ ହୋଇପାରୁ ନାହିଁ। ଏହି ନାଳରୁ ବିଲାତି ଦଳ ଉଦ୍ଧାର କରିବା ସହ ଦୂଷିତ ପାଣି ନିଷ୍କାସନ କରି ସାଧାରଣ ବ୍ୟବହାର ଯୋଗ୍ୟ କରିବା ପାଇଁ ଗ୍ରାମବାସୀ ଯାଜପୁର ଜିଲାପାଳଙ୍କ ଦୃଷ୍ଟି ଆକର୍ଷଣ କରିଆସୁଛନ୍ତି।