ଆଠମଲ୍ଲିକ,୧୨ା୬(ଡି.ଏନ.ଏ.)-ଆଠମଲ୍ଲିକ ଥାନା ଜାମୁଡୋଲି ଫାଣ୍ଡିର ଜଣେ କନଷ୍ଟେବଳଙ୍କୁ ମାଡ଼ ମାରିବା ଅଭିଯୋଗରେ ପୋଲିସ ମଙ୍ଗଳବାର ୫ ଜଣଙ୍କୁ ଗିରଫ କରିଛି। ସେମାନେ ହେଲେ ଆଠମଲ୍ଲିକ ଥାନା କଣ୍ଟାପାବୁଲି ଗ୍ରାମର ମଧୁସୂଦନ ଗୁଡାୟକ (୨୬), ପୁରୁଣାକୋଟ ଥାନା ଟିକରପଡା ଗ୍ରାମର ଦିଲୀପ ସେଠ (୨୧), ହରଭଙ୍ଗା ଥାନା ହରଭଙ୍ଗା ଗ୍ରାମର ଅଜିତ ପଟ୍ଟନାୟକ (୨୩), ବାଉଁଶୁଣୀ ଥାନା କଙ୍କଲା ଗ୍ରାମର ମାନଭଞ୍ଜନ ବେହେରା (୨୧) ଓ ଡମ୍ବରୁ କର୍ମୀ (୨୧)।
ପୋଲିସ ସୁତ୍ରରୁ ପ୍ରକାଶ, ଜାମୁଡୋଲି ଫାଣ୍ଡିର କନଷ୍ଟେବଳ ପ୍ରତାପ ପ୍ରଧାନ ଫାଣ୍ଡିକୁ ଯାଉଥିବା ବେଳେ ଆଠମଲ୍ଲିକ-ବିନିକେୟୀ ରାସ୍ତାର ତିତିଗାଁ ମଦଭାଟି ସମ୍ମୁଖ ମୁଖ୍ୟ ରାସ୍ତା ଉପରେ ଅଭିଯୁକ୍ତମାନେ ମଦ୍ୟପାନ କରୁଥିଲେ। ଅଭିଯୁକ୍ତଙ୍କ ଗାଡିଗୁଡିକ ରାସ୍ତା ମଝିରେ ରଖାଯାଇଥିଲା। ଫଳରେ ଟ୍ରାଫିକ୍ ସମସ୍ୟା ଉପୁଜିଥିଲା। ଏହି ସମୟରେ ପ୍ରତାପ ମଧ୍ୟ ତାଙ୍କ ଗାଡ଼ିକୁ ଆଗକୁ ନେଇ ପାରି ନ ଥିଲେ। ଏ ନେଇ ସେ ଅଭିଯୁକ୍ତମାନଙ୍କୁ ପଚାରିବାରୁ ସେମାନେ ଉତ୍କ୍ଷିପ୍ତ ହୋଇ ତାଙ୍କୁ ମାଡ଼ ମାରିଥିଲେ। ଏଥିସହ ତାଙ୍କର ଦୁଇଟି ମୋବାଇଲ ମଧ୍ୟ ନେଇଯାଇଥିବା ପ୍ରତାପ ଅଭିଯୋଗରେ ଦର୍ଶାଇଛନ୍ତି। ଏ ସଂକ୍ରାନ୍ତରେ ଆଠମଲ୍ଲିକ ପୋଲିସ ନଂ. ୫୪/୧୯ରେ ମାମଲା ରୁଜୁ କରିଛି। ବୁଧବାର ଅଭିଯୁକ୍ତଙ୍କୁ କୋର୍ଟଚାଲାଣ କରାଯିବ।